ភ្នំពេញៈ គណៈកម្មការមូលបត្រកម្ពុជា (SECC) កំពុងកែសម្រួលនូវលក្ខខណ្ឌមួយចំនួនក្នុងការជួញដូរឧបករណ៍និស្សន្ទដែលនេះជាកិច្ចខិតខំប្រឹងប្រែងមួយដើម្បីបង្កើនការទាក់ទាញវិនិយោគ និងការជួញដូរពីសាធារណជន ខណៈទីផ្សារនេះកំពុងមានសម្ទុះកើនឡើងយ៉ាងខ្លាំងក្នុងរយៈពេលថ្មីៗនេះ។
យោងតាមសេចក្តីជូនដំណឹងកាលពីថ្ងៃទី ១១ ខែឧសភា បានឲ្យដឹងថា SECC នឹងធ្វើការកែតម្រូវលើលក្ខខណ្ឌតម្រូវសម្រាប់ការផ្ដល់អាជ្ញាប័ណ្ណ និងការគ្រប់គ្រងអាជីវកម្មនៃសកម្មភាពជួញដូរឧបករណ៍និស្សន្ទនៅក្នុងប្រទេសកម្ពុជាក្នុងគោលបំណងគ្រប់គ្រងទីផ្សារឧបករណ៍និស្សន្ទឲ្យកាន់តែមានប្រសិទ្ធភាព និងឲ្យស្របតាមដំណើរការជាក់ស្តែងនៃទីផ្សារ។
សេចក្ដីប្រកាសបានសរសេរថា៖ «គណៈកម្មការមូលបត្រកម្ពុជាសូមជូនដំណឹងដល់ប្រធានក្រុមហ៊ុនជើងសារឧបករណ៍និស្សន្ទ និងសាធារណជនឲ្យបានជ្រាបថា SECC បានអនុម័តលើប្រកាសលេខ ០០៥/២០ ចុះកាលបរិច្ឆេទកាលពីថ្ងៃទី ៥ ខែ ឧសភា ឆ្នាំ ២០២០ ស្ដីពីការកែតម្រូវនៃប្រកាសលេខ ០០៤/១៥ ចុះកាលបរិច្ឆេទកាលពីថ្ងៃទី ២ ខែកក្កដា ឆ្នាំ ២០១៥ ស្ដីពីការផ្ដល់អាជ្ញាប័ណ្ណ និងការគ្រប់គ្រងការជួញដូរឧបករណ៍និស្សន្ទក្នុងគោលដៅដើម្បីគ្រប់គ្រងទីផ្សារឧបករណ៍និស្សន្ទឲ្យកាន់តែមានប្រសិទ្ធភាព និងឲ្យស្របតាមដំណើរការជាក់ស្តែងនៃទីផ្សារកន្លងមក»។
លោក ស៊ូ សុជាតិ អគ្គនាយក SECC បានប្រាប់ភ្នំពេញប៉ុស្ដិ៍កាលពីថ្ងៃចន្ទថា ការកែតម្រូវនេះនឹងកាត់បន្ថយលក្ខខណ្ឌតម្រូវស្ដីពីការផ្ដល់អាជ្ញាប័ណ្ណ និងមូលធនសម្រាប់ក្រុមហ៊ុនជើងសារនៃឧបករណ៍និស្សន្ទ។ លោកបន្តថា៖ «យើងកែតម្រូវលក្ខខណ្ឌតម្រូវមួយចំនួនស្ដីពីការផ្ដល់អាជ្ញាប័ណ្ណ ជាពិសេសមូលធនសម្រាប់ក្រុមហ៊ុនជើងសារឧបករណ៍និស្សន្ទ។ តាមរយៈការធ្វើដូចនេះ មិនប៉ះពាល់ដល់ក្រុមហ៊ុនជើងសារឧបករណ៍និស្សន្ទទាំងអស់ស្ដីពីលក្ខខណ្ឌតម្រូវថ្មីនេះទេ»។
លោកបានបន្ថែមថា៖ «ខណៈដែលទីផ្សារចាប់ផ្ដើមរីកចម្រើន យើងទាមទារឲ្យមានធនធានមនុស្ស អ្នកជំនាញ និងបទពិសោធកាន់តែច្រើន។ លក្ខខណ្ឌតម្រូវមួយចំនួនដែលបានតាក់តែងឡើងគឺក្នុងគោលបំណងនៃការការពារវិនិយោគិន»។
លោក សុជាតិ បានពន្យល់ប្រាប់ភ្នំពេញប៉ុស្ដិ៍លើកមុនថា ផលិតផលឧបករណ៍និស្សន្ទ ឬជាអ្វីដែលហៅថា កិច្ចព្រមព្រៀងសម្រាប់ភាពខុសគ្នាលើរូបិយប័ណ្ណ ឬផលិតផលផ្សេងទៀត (Forex) គឺជាផលិតផលហិរញ្ញវត្ថុប្រភេទថ្មីមួយនៅក្នុងផ្សារមូលបត្រកម្ពុជាដែលអាចផ្ដល់អត្ថប្រយោជន៍សម្រាប់វិនិយោគិនក្នុងរយៈពេលវែង។ ទោះយ៉ាងណាលោកបានឲ្យដឹងថា មុនពេលធ្វើការសម្រេចចិត្តលើការវិនិយោគ គេត្រូវស្វែងយល់ឲ្យដឹងច្បាស់អំពីព័ត៌មានលម្អិតនៃផលិតផលឧបករណ៍និស្សន្ទប្រភេទណាមួយ។
ទំហំជួញដូរឧបករណ៍និស្សន្ទបានកើនឡើងដល់ ៨៤ លានដុល្លារ កាលពីឆ្នាំ ២០១៨ ដល់ ២០០ លានដុល្លារ កាលពីឆ្នាំ ២០១៩។ នេះបើយោងតាមទិន្នន័យពី SECC៕ LA