.jpg)
លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា (SECC) ថ្លែងនាពេលកន្លងមក។ ហ៊ាន រង្សី
ភ្នំពេញៈ គណៈកម្មការមូលបត្រកម្ពុជា (SECC) កំពុងធ្វើសេចក្តីព្រាងប្រកាសស្តីពីការបោះផ្សាយលក់មូលបត្រកម្មសិទ្ធិជាសាធារណៈរបស់ក្រុមហ៊ុនហូលឌីង (Equity Securities of Holding Company) ដើម្បីអាចឱ្យក្រុមហ៊ុននេះចេញលក់ភាគហ៊ុននៅលើក្រុមហ៊ុនផ្សារមូលបត្រកម្ពុជា (CSX) ដែលជាវិធានការឆ្ពោះទៅរកការធ្វើពិពិធកម្មទីផ្សារនៃការអភិវឌ្ឍទីផ្សារមូលធននៅកម្ពុជា។
លោក ស៊ូ សុជាតិ អគ្គនាយកនៃគណៈកម្មការមូលបត្រកម្ពុជា (SECC) ប្រាប់ ភ្នំពេញ ប៉ុស្ដិ៍ ថា SECC កំពុងដឹកនាំការពិគ្រោះយោបល់ជាមួយដៃគូពាក់ព័ន្ធដើម្បីស្វែងរកធាតុចូលឱ្យបានកាន់តែច្រើនមុននឹងស្វែងរកការអនុម័តប្រកាសនេះ។
លោកថ្លែងថា៖ «បច្ចុប្បន្ននេះយើងធ្វើការពិគ្រោះយោបល់ជាសាធារណៈដើម្បីទទួលបាននូវធាតុចូលបន្ថែមពីភាគីពាក់ព័ន្ធ ហើយយើងនឹងពិចារណាធាតុចូលណាមួយសមរម្យ ដែលអាចនឹងដាក់ចូលក្នុងប្រកាសនេះ ដើម្បីស្វែងរកការអនុម័ត។ សេចក្ដីព្រាងនេះធ្វើឡើងសម្រាប់ក្រុមហ៊ុន Holding Company ដែលមានន័យថា ជាករណីពិសេសដែលក្រុមហ៊ុន Holding អាចគ្រប់គ្រងភាគហ៊ុនមួយចំនួនជាមួយក្រុមហ៊ុនផ្សេងទៀត ប៉ុន្តែក្រុមហ៊ុនទាំងនោះមិនចូលរួមសកម្មភាពអាជីវកម្មណាមួយរបស់ក្រុមហ៊ុនដែលពួកគេកំពុងកាន់កាប់នោះទេ»។
លោកបន្ថែមថា៖ «ដូច្នេះយើងធ្វើនីតិវិធីពិសេសមួយសម្រាប់ពួកគេ ដោយអាចអនុញ្ញាតឱ្យចេញលក់ភាគហ៊ុនរបស់ពួកគេនៅលើផ្សារហ៊ុន ហើយពេលនេះនីតិវិធីនេះមិនបានប៉ះពាល់ដល់ក្រុមហ៊ុនចេញលក់ភាគហ៊ុនដែលមានស្រាប់របស់យើងនោះទេ។ វាជាការបំពេញបន្ថែមមួយដើម្បីលើកកម្ពស់ការចេញលក់មូលបត្រនៅលើផ្សារមូលធនរបស់យើង»។
លោក Jong Weon Ha អនុប្រធាន CSX បានប្រាប់ ភ្នំពេញ ប៉ុស្ដិ៍ ថា សេចក្តីព្រាងប្រកាសនេះមិនបានផ្លាស់ប្តូរដំណើរការ IPO ច្រើនទេ។ ទោះយ៉ាងណា លក្ខខណ្ឌតម្រូវ និងលក្ខខណ្ឌមួយចំនួនត្រូវបានកែតម្រូវដោយផ្អែកលើលក្ខណៈផ្សេងៗគ្នារបស់ក្រុមហ៊ុន។
លោកថ្លែងថា៖ «ប្រកាសថ្មីនេះបើកឱកាសសម្រាប់ប្រភេទក្រុមហ៊ុនផ្សេងៗ ជាពិសេសក្រុមហ៊ុន Holding ដើម្បីប្រមូលមូលនិធិ និងចុះបញ្ជីនៅក្នុងប្រទេសកម្ពុជា»។
លោកបន្តថា Holding គឺជាក្រុមហ៊ុនគ្រប់គ្រងភាគហ៊ុនរបស់ក្រុមហ៊ុនផ្សេងទៀត ដែលខុសគ្នាពីក្រុមហ៊ុនប្រតិបត្តិការដែលមានប្រតិបត្តិការអាជីវកម្មផ្ទាល់ខ្លួនរបស់ពួកគេ។ បទប្បញ្ញតិ្តដែលមានស្រាប់មិនមានប្រសិទ្ធភាពគ្របដណ្ដប់ និងកំណត់នីតិវិធីនៃ IPO និងកាតព្វកិច្ច បន្ទាប់ពីការចុះបញ្ជីរបស់ក្រុមហ៊ុន Holding ដែលបានបង្កើតឡើងនៅកម្ពុជានោះទេ។
លោកនិយាយថា៖ «អាស្រ័យដូច្នេះ គម្រោងនេះត្រូវបានផ្តួចផ្ដើមឡើង និងមកដល់ដំណាក់កាលនេះដែលសេចក្តីព្រាងបានដាក់លើតុពិភាក្សា»។
យោងតាមលោក ស៊ូ សុជាតិ ក្របខ័ណ្ឌពេលវេលាលើការអនុម័តប្រកាសនេះ នៅមិនទាន់កំណត់ទេ ខណៈប្រកាសនេះនៅតែត្រូវការស្វែងរកធាតុចូលបន្ថែមទៀតពីភាគីពាក់ព័ន្ធ មុនពេលស្វែងរកការអនុម័តពីរដ្ឋាភិបាល។ លោកបន្តថា៖ «រហូតមកដល់ពេលនេះ យើងមិនទាន់កំណត់ក្របខ័ណ្ឌពេលវេលានៅឡើយទេ ដោយសារយើងត្រូវការធាតុចូលចាំបាច់បន្ថែមទៀតពីភាគីពាក់ព័ន្ធ»។
បច្ចុប្បន្នមានក្រុមហ៊ុនចុះបញ្ជីចំនួន ១៣ នៅកម្ពុជា ដោយក្នុងចំណោមក្រុមហ៊ុនទាំងនោះក្រុមហ៊ុន ៧ ចុះបញ្ជីភាគហ៊ុន និងក្រុមហ៊ុន ៦ ចុះបញ្ជីសញ្ញាបណ្ណសាជីវកម្ម។ ក្រុមហ៊ុនទាំង ១៣ បានប្រមូលមូលនិធិរួមគ្នាចំនួន ២៥៣ លានដុល្លារ គិតត្រឹមថ្ងៃទី ៣០ ខែកញ្ញា និងសន្ទស្សន៍ភាគហ៊ុនកើន ៥៨,៣៧ ភាគរយ ក្នុងឆ្នាំ ២០១៩ ធៀបឆ្នាំ ២០១៨។ ទោះយ៉ាងណា វាបានធ្លាក់ចុះ ១៤,៩៣ ភាគរយ កាលពីឆ្នាំ ២០២០។ នេះបើតាមទិន្នន័យរបស់ CSX។
ទិន្នន័យបង្ហាញថា កាលពីឆ្នាំ ២០២០ មានក្រុមហ៊ុន ២ បានចុះបញ្ជីភាគហ៊ុន និង ៣ ចុះបញ្ជីមូលបត្របំណុល។ ក្រុមហ៊ុនទាំង ៥ បានប្រមូលមូលនិធិរួមគ្នា ៩២ លានដុល្លារចាប់ពីខែមករា ដល់ខែកញ្ញា៕ LA
