.jpg)
លោក ស៊ូ សុជាតិ (ឆ្វេង) និងលោក Chen Xin កាលពីថ្ងៃម្សិលមិញ។ ហ៊ាន រង្សី
ភ្នំពេញៈ គណៈកម្មការមូលបត្រកម្ពុជា (SECC) និង Ruifengtianfu Investment Co ជាក្រុមហ៊ុនពហុផលិតផលរបស់ចិនចាប់ដៃគ្នាអភិវឌ្ឍទីផ្សារខុម៉ូឌីធីនៅកម្ពុជា។ ទីផ្សារនេះក៏នឹងបង្កើត Platform មួយសម្រាប់លើកកម្ពស់ការជួញដូរផលិតផល កសិកម្មនៅពេលអនាគត។
លោក ស៊ូ សុជាតិ អគ្គនាយក SECC បានប្រាប់ក្រុមអ្នកយកព័ត៌មាននៅក្រៅជំនួបនៃពិធីចុះហត្ថលេខាកាលពីថ្ងៃចន្ទថា ក្រុមហ៊ុននេះ និង SECC ក្នុងការពិគ្រោះយោបល់ និងសិក្សាអំពីបញ្ហាបច្ចេកទេសនានាសម្រាប់ការអភិវឌ្ឍទីផ្សារខុម៉ូឌីធីសម្រាប់ការជួញដូរផលិតផល ២ ប្រភេទគឺផលិតផលហិរញ្ញវត្ថុដូចជាមាសដែលរំពឹងថានឹងចាប់ផ្ដើមក្នុងពេលឆាប់ៗ និងក្រៅពីហិរញ្ញវត្ថុដូចជាទំនិញកសិកម្ម។
លោកថ្លែងថា៖ «អនុស្សរណៈនៃការយោគយល់គ្នា (MoU) នេះនឹងបើកផ្លូវសម្រាប់ទាំង SECC និងក្រុមហ៊ុនក្នុងការចាប់ផ្ដើមការសិក្សា និងដើម្បីពិភាក្សាសម្រាប់ការបង្កើតពិគ្រោះយោបល់ និងការគាំទ្រផ្នែកបច្ចេកទេសសម្រាប់ការអភិវឌ្ឍទីផ្សារខុម៉ូឌីធីនៅកម្ពុជា។ វាជាទីផ្សារថ្មីមួយដែលមិនជាប់ទាក់ទងនឹងផ្សារហ៊ុននោះទេ»។
លោកលើកឡើងថា៖ «ទីផ្សារខុម៉ូឌីធីជាអ្វីដែល SECC ពិតជាចង់បាន ដោយសារវាអាចបង្កើតច្រកជួញដូរថ្មីសម្រាប់ផលិតផលកសិកម្មក្នុងការធ្វើកិច្ចព្រមព្រៀងនៅពេលអនាគត។ នោះជាមូលហេតុដែលយើងត្រូវការក្រុមហ៊ុនមួយមានស្ថានភាពហិរញ្ញវត្ថុរឹងមាំ និងបទពិសោធខ្ពស់ ដូចជាក្រុមហ៊ុននេះ ព្រោះពួកគេជាក្រុមហ៊ុនធំមួយ»។
លោក Chen Xin អ្នកចាត់ការទូទៅក្រុមហ៊ុន Ruifengtianfu Investment បានឲ្យដឹងថា ក្រុមហ៊ុននេះមានបទពិសោធខាងការវិនិយោគនៅក្នុងវិស័យជាច្រើននៅចិនជាមួយគោលបំណងវិនិយោគនៅកម្ពុជា គឺអនុវត្តតាមគោលការណ៍គំនិតផ្តួចផ្ដើមខ្សែក្រវាត់ និងផ្លូវរបស់ប្រធានាធិបតី ស៊ី ជីនភីង។
លោកបន្តថា៖ «យើងទទួលបានការគាំទ្រពីមេដឹកនាំរបស់ប្រទេសចិន ដើម្បីវិនិយោគនៅក្នុងប្រទេសកម្ពុជាក្នុងការអភិវឌ្ឍទីផ្សារខុម៉ូឌីធីនៅកម្ពុជា។ បន្ទាប់ពីការសិក្សា និងការពិភាក្សាគ្នាជាមួយ SECC ក្រុមហ៊ុនរបស់យើងនឹងសម្រេចចិត្តវិនិយោគនៅក្នុងវិស័យផ្សេងៗ នៅក្នុងប្រទេសកម្ពុជា»។
លោកបញ្ជាក់ថា៖ «ដូចដែលអ្នកបានដឹងហើយថា ប្រទេសកម្ពុជា និងចិននឹងសម្រេចបានកិច្ចព្រមព្រៀងពាណិជ្ជកម្មសេរីក្នុងពេលឆាប់ៗ និងមានទំនាក់ទំនងជិតស្និទ្ធរវាងប្រទេសទាំង ២ ក្រុមហ៊ុនយើងមានចំណាប់អារម្មណ៍ក្នុងការអភិវឌ្ឍទីផ្សារខុម៉ូឌីធីនៅកម្ពុជា»។
ទោះយ៉ាងណាពេលវេលាជាក់លាក់នៃការបង្កើតផ្សារនេះមិនទាន់ត្រូវបានកំណត់នោះទេ ដោយវាអាស្រ័យលើលទ្ធផលនៃការសិក្សារួមគ្នានេះ ខណៈដែល SECC ក៏កំពុងស្ថិតនៅក្នុងដំណាក់កាលបញ្ចប់នៃការព្រាងបទប្បញ្ញត្តិនានាសម្រាប់ការគ្រប់គ្រងទីផ្សារនេះផងដែរ។ នេះបើតាមលោក សុជាតិ។
លោកលើកឡើងថា៖ «ចាប់ពីពេលនេះយើងនឹងសិក្សារួមគ្នា ហើយបន្ទាប់មកយើងនឹងបញ្ជូនលទ្ធផលនេះទៅថ្នាក់លើរបស់យើង ដើម្បីសម្រេចលើការបង្កើតទីផ្សារនេះ»។
លោក សុជាតិ ថ្លែងថា៖ «យើងសង្ឃឹម យើងអាចបង្កើតទីផ្សារនៅឆ្នាំក្រោយ នៅពេលយើងទទួលបានលទ្ធផលល្អពីការសិក្សា ដោយសារតែវាអាចជួយបង្កើតច្រកជួញដូរថ្មីមួយសម្រាប់ផលិតផលកសិកម្មក្នុងការរួមចំណែកដល់ការអភិវឌ្ឍសេដ្ឋកិច្ចជាតិ»។
ទិន្នន័យនាំចេញផលិតផលកសិកម្មរបស់ក្រសួងកសិកម្ម រុក្ខាប្រមាញ់ និងនេសាទ បង្ហាញថាប្រទេសកម្ពុជាបានរំពឹងថា ការនាំចេញផលិតផលកសិកម្មនឹងកើនឡើងដល់ជាង ៥ លានតោននៅឆ្នាំនេះ ខណៈក្នុងរយៈពេល ៥ ខែមុន ការនាំចេញកសិផលមានចំនួនជាង ១,៩ លានតោន កើនឡើងជាង ៧ ភាគរយធៀបរយៈពេលដូចគ្នាកាលពីឆ្នាំ ២០១៩។
កាលពីឆ្នាំ ២០១៩ ការនាំចេញសរុបរបស់ប្រទេសកម្ពុជាទៅទីផ្សារអន្តរជាតិមានចំនួន ៤,៨៧ លានតោន ក្នុងចំណោមនោះជាង ៤ លានតោននាំចេញទៅបណ្ដាប្រទេសអាស៊ាន ៣៤០ តោន ទៅប្រទេសចិន ២៦១ ០០០ តោនទៅទីផ្សារសហភាពអឺរ៉ុប និង ១៣៥ ០០០ តោនទៅបណ្ដាប្រទេសផ្សេងទៀត៕LA
