ភ្នំពេញៈ ក្រុមហ៊ុន Post Media ដែលដំណើរការកាសែតភ្នំពេញប៉ុស្ដិ៍ដែលជាសារព័ត៌មានវ័យចំណាស់ជាងគេនៅកម្ពុជាបានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយគណៈកម្មការមូលបត្រកម្ពុជា (SECC) សម្រាប់កិច្ចសហប្រតិបត្តិការភាពជាដៃគូក្នុងការផ្ដល់ការអប់រំ ព័ត៌មាន និងការណែនាំនៃបទប្បញ្ញត្តិផ្សេងៗដល់សាធារណជនដែលជាការរួមចំណែកនៃការអភិវឌ្ឍទីផ្សារមូលបត្រនៅកម្ពុជា។
MoU ត្រូវបានចុះហត្ថលេខារវាងលោក លី តៃសេង ជាចាងហ្វាង និងអគ្គនាយកភ្នំពេញប៉ុស្ដិ៍ និង លោក ស៊ូ សុជាតិ អគ្គនាយក SECC នៅការិយាល័យរបស់ SECC កាលពីថ្ងៃសុក្រ។ ពិធីនេះក៏ត្រូវបានចូលរួមដោយមន្ដ្រីជាច្រើនរូបរបស់ SECC និង លោក ចូសហូ ពូរ៉ូសុតមេន ជានិពន្ធនាយកកាសែតភ្នំពេញ-ប៉ុស្ដិ៍ និងសហការីជាច្រើនរូប។
លោក លី តៃសេង បានឲ្យដឹងថា កិច្ចសហប្រតិបត្តិការនេះនឹងផ្ដល់ឲ្យ SECC នូវវេទិកាថ្មីមួយមិនធ្លាប់មានហៅថា «Post Securities» ក្នុងការចែករំលែកការអប់រំ ព័ត៌មាន និងដំណឹងនៃការបោះពុម្ពផ្សាយនៅលើទំព័រកាសែតភ្នំពេញប៉ុស្ដិ៍ទាំង ២ ភាសាគឺភាសាខ្មែរ និងភាសាអង់គ្លេសប្រកបដោយគុណភាព ១ សប្ដាហ៍ម្ដង។ ក្រៅពីនេះវានឹងក្លាយជាឧបករណ៍ដ៏សំខាន់មួយសម្រាប់ការរួមចំណែកការអភិវឌ្ឍទីផ្សារមូលធនដែលកំពុងមានសក្តានុពលរបស់កម្ពុជា។
លោកថ្លែងថា៖ «យើងប្ដេជ្ញាថានឹងផ្ដល់ SECC នូវវេទិកាមួយដែលអ្នកអាចប្រើប្រាស់ពួកយើងក្នុងការអប់រំប្រជាជនអំពីទីផ្សារមូលបត្រ របៀបប្រតិបត្តិការទីផ្សារ ការអភិវឌ្ឍ ច្បាប់ និងបទប្បញ្ញត្តិរបស់ឧស្សាហកម្មនេះ»។
លោកបន្ថែមថា៖ «ខ្ញុំអាចមើលឃើញថា SECC បានធ្វើរួចហើយនូវការងារដ៏អស្ចារ្យបំផុតជាច្រើនដូចជាការបង្កើតច្បាប់ បទប្បញ្ញត្តិនានា ជាពិសេសប្រកាស។ ដូច្នេះយើងនឹងខិតខំឲ្យអស់ពីសមត្ថភាពក្នុងការគាំទ្រ SECC ដើម្បីចូលរួមអភិវឌ្ឍទីផ្សារមូលបត្រនេះជាពិសេសលើការវិនិយោគ ការជួញដូរភាគហ៊ុន។ល។ យើងរីករាយយ៉ាងខ្លាំងសម្រាប់ MoU នេះដែលយើងធ្វើឲ្យមានទំនាក់ទំនងជាផ្លូវការ»។
លោក ចូសហូ ពូរ៉ូសុតមេន បានឲ្យដឹងថា ចាប់តាំងពីទីផ្សារភាគហ៊ុនពិភពលោក និងក្នុងតំបន់កំពុងធ្លាក់ចុះដោយសារតែការរីករាលដាលនៃជំងឺកូវីដ១៩នៅពេលបច្ចុប្បន្ន ការធ្វើជាដៃគូរវាងស្ថាប័នទាំង ២ នេះនឹងជាចលករថ្មីមួយក្នុងការលើកកម្ពស់ និងស្វែងរកមធ្យោបាយក្នុងការចាប់យកឱកាសសម្រាប់ការអភិវឌ្ឍទីផ្សារនេះ។
លោកថ្លែងថា៖ «យើងមើលឃើញថា មានឱកាសច្រើនដែលអាចអភិវឌ្ឍឧស្សាហកម្មនេះ និងដើម្បីធ្វើឲ្យក្រុមវិនិយោគិនទាំងអស់មានភាពជឿជាក់គឺមានភាពស្មុគស្មាញបំផុត។ តាមរយៈកិច្ចសហប្រតិបត្តិការ និងការសហការនេះ ខ្ញុំជឿថា យើងអាចជួយ SECC ក្នុងការអប់រំបន្ថែមអំពីឧស្សាហកម្មនេះ។ ខ្ញុំជឿជាក់ថា យើងនឹងមានការអប់រំ និងព័ត៌មានដ៏អស្ចារ្យក្នុងការចែករំលែកដល់សាធារណជន និងក្រុមវិនិយោគិន»។
លោកបន្ថែមថា៖ «ដូច្នេះយើងសម្លឹងមើលថា នេះជាឱកាសដ៏ល្អអស្ចារ្យ ជាពិសេសនៅពេលនេះយើងអាចមើលឃើញទីផ្សារលើពិភពលោកធ្លាក់ចុះ។ នេះជាមធ្យោបាយមួយដែលយើងអាចចាប់យកទីផ្សារនេះលើអ្វីដែលត្រូវធ្វើ។ ដូច្នេះយើងនឹងសម្លឹងទៅមុខសម្រាប់កិច្ចសហប្រតិបត្តិការល្អជាមួយ SECC»។
លោក ស៊ូ សុជាតិ បានឲ្យដឹងថាភាពជាដៃគូថ្មីទាំង ២ នេះមិនគ្រាន់តែផ្ដល់ការចែករំលែកព័ត៌មានប៉ុណ្ណោះទេ ប៉ុនែ្តថែមទាំងការអប់រំសាធារណជនផងដែរ។ លោកសង្ឃឹមថា ភាពជាដៃគូនេះក៏នឹងជួយបង្កើតទីផ្សារល្អប្រសើរសម្រាប់វិនិយោគិន និងជួយការពារវិនិយោគិន។
លោកលើកឡើងថា៖ «ជាមួយនឹងភាពជាដៃគូនេះ ខ្ញុំក៏ចង់បង្ហាញថា កាសែតភ្នំពេញប៉ុស្ដិ៍ដែលជាប្រព័ន្ធផ្សព្វផ្សាយដ៏រឹងមាំមួយនៅក្នុងប្រទេសកម្ពុជាក្នុងការគាំទ្រ SECC ជាមួយនឹងទិសដៅផ្សេងទៀតដែលយើងចង់ធ្វើគឺការការពារវិនិយោគិន។ វាមិនគ្រាន់តែអប់រំប៉ុណ្ណោះទេ ប៉ុន្ដែថែមទាំងការពារវិនិយោគិនផងដែរ»។
លោកបន្ថែម៖ «ខ្ញុំចង់ធ្វើការងារជាមួយគ្នាលើរបៀបក្នុងការបង្កើតទីផ្សារដ៏រឹងមាំមួយ និងការពារវិនិយោគិន។ ប៉ុន្តែវាមិនមានន័យថា យើងចង់ឲ្យកាសែត-ភ្នំពេញប៉ុស្ដិ៍និយាយល្អអំពី SECC នោះទេ វាមិនមែនជាគោលបំណងរបស់ខ្ញុំនោះទេ។ ប៉ុន្ដែខ្ញុំចង់ឲ្យកាសែតភ្នំពេញប៉ុស្ដិ៍និយាយអំពីការពិត ច្បាស់លាស់ដែលល្អសម្រាប់ក្រុមវិនិយោគិន»។ លោកបញ្ជាក់ថា៖ «ដោយមានការគាំទ្រពីប្រព័ន្ធផ្សព្វផ្សាយ (កាសែតភ្នំពេញប៉ុស្ដិ៍) នឹងជួយបង្កើនទំនុកចិត្តដល់វិនិយោគិនតាមរយៈការផ្ដល់ដល់ពួកគេនូវការអប់រំ បទប្បញ្ញត្តិពិត ឬច្បាប់ និងដើម្បីការពារវិនិយោគិន»។
លោក តៃសេង បានឲ្យដឹងថា ក្នុងនាមជាប្រព័ន្ធផ្សព្វផ្សាយដែលមានវិជ្ជាជីវៈ កាសែតភ្នំពេញប៉ុស្ដិ៍កំពុងបំពេញតួនាទីដ៏សំខាន់មួយក្នុងការផ្ដល់ព័ត៌មានពិត និងច្បាស់លាស់ដើម្បីបម្រើសាធារណជន ក្រុមវិនិយោគិន និងសង្គមស៊ីវិល។
លោកថ្លែងថា៖ «យើងយល់ស្របជាមួយឯកឧត្តម ស៊ូ សុជាតិ ត្រង់ថា យើងនឹងដើរតួនាទីដ៏សំខាន់ក្នុងការការពារវិនិយោគិន។ យើងប្រកាន់ខ្ជាប់ក្រមសីលធម៌វិជ្ជាជីវៈរបស់យើង ហើយយើងក៏មិនមកទីនេះដើម្បីបំផ្លាញប្រទេស ឬនរណាម្នាក់នោះទេ យើងមិនមានសត្រូវណាមួយនោះទេ ប៉ុន្តែយើងនៅទីនេះដើម្បីផ្ដល់ព័ត៌មានពិត យើងប្រយុទ្ធប្រឆាំងនឹងព័ត៌មានក្លែងក្លាយ»។
លោក តៃសេង បញ្ជាក់ថា៖ «ជាការពិត យើងមិនអាចការពារការធ្វើខុសនោះទេ។ ដូច្នេះទាក់ទងនឹងទីផ្សារមូលបត្រនេះ យើងចង់មើលឃើញទីផ្សារមួយនេះរីកចម្រើន ហើយយើងក៏ចង់មើលឃើញសេដ្ឋកិច្ចរបស់ប្រទេសកម្ពុជារីកចម្រើនផងដែរ ដែលមានន័យថា ជីវភាពរស់នៅរបស់ប្រជាជនក៏នឹងរីកចម្រើនផងដែរ»៕
វីដេអូ៖