.jpg)
ពិធីចុះកិច្ចព្រមព្រៀងកិច្ចសហប្រតិបត្តិការរវាង SECC និង Maybank Kim Eng កាលពីម្សិលមិញ ។ ហេង ជីវ័ន
ភ្នំពេញៈ អគ្គនាយកគណៈកម្មការមូលបត្រកម្ពុជា (SECC ) បានឲ្យដឹងថា កិច្ចសហប្រតិបត្តិការរបស់ក្រុមហ៊ុន Maybank Kim Eng Group (MKE Group) នឹងជួយបង្កើតក្របខ័ណ្ឌការងារបទប្បញ្ញត្តិដ៏រឹងមាំក្នុងការទាក់ទាញក្រុមវិនិយោគិនកាន់តែច្រើនមកក្នុងទីផ្សារមូលធនកម្ពុជា។
លោក ស៊ូ សុជាតិ អគ្គនាយក SECC បានថ្លែងទៅកាន់ក្រុមអ្នកយកព័ត៌មាននៅក្នុងពិធីចុះហត្ថលេខាលើអនុស្សរណៈនៃការយោគយល់គ្នារវាងគណៈកម្មការមូលបត្រកម្ពុជា និងក្រុមហ៊ុន Maybank Kim Eng ថាដោយមានអ្នកជំនាញបរទេស និងបទពិសោធជាពិសេសបណ្ដាញដ៏ធំរបស់ Maybank Kim Eng នឹងមិនគ្រាន់តែផ្ដល់ក្របខ័ណ្ឌកិច្ចសហប្រតិបត្តិការ និងជំនួយបច្ចេកទេសប៉ុណ្ណោះទេ ប៉ុន្តែថែមទាំងដើម្បីទាក់ទាញក្រុមវិនិយោគិនកាន់តែច្រើនសម្រាប់ការអភិវឌ្ឍឧស្សាហកម្មមូលបត្រនៅកម្ពុជាផងដែរ។
លោកថ្លែងថា៖ «យើងទាំងអស់គ្នាដឹងអំពីធនាគារ Maybank ដែលគ្រប់ៗគ្នាដឹងហើយនៅពេលនេះធនាគារ Maybank Kim Eng សហការជាមួយ SECC ដែលមានន័យថា វានឹងបង្កើតរូបភាពដ៏ល្អបំផុតមួយ និងទំនុកចិត្តកាន់តែខ្លាំងសម្រាប់ក្រុមវិនិយោគិន ពិសេសក្រុមវិនិយោគិនបរទេសនៅក្នុងផ្សារហ៊ុនយើង។ ខ្ញុំមានទំនុកចិត្តថា MoU នេះនឹងទទួលយកភាគជាដៃគូរបស់យើងឆ្ពោះទៅរកជំហានដ៏សំខាន់ផ្សេងទៀត»។
លោក Mohamad Yasin Abdullah ប្រធានប្រតិបត្តិការ ក្រុមហ៊ុន MKE Group បានឲ្យដឹងថា កិច្ចសហការជាមួយ SECC នឹងជួយអភិវឌ្ឍទីផ្សារមូលធនរបស់កម្ពុជា ដោយសារតែសេដ្ឋកិច្ចរបស់ប្រទេសនេះកំពុងរីកចម្រើនយ៉ាងរហ័សនៅលើពិភពលោក។ លោកបន្តថា៖ «ក្នុងនាមជាប្រទេសមួយក្នុងចំណោមប្រទេសជាច្រើនមានសេដ្ឋកិច្ចរីកចម្រើនរហ័សបំផុតលើពិភពលោក ឧស្សាហកម្មហិរញ្ញវត្ថុរបស់កម្ពុជាបានបន្តពង្រីកយ៉ាងខ្លាំង»។
លោកបានបន្ថែមថា៖ «គោលបំណងនៃ MoU គឺជាការជួយដល់ SECC ដើម្បីអភិវឌ្ឍទីផ្សារ និងឧស្សាហកម្ម និងពិតហើយត្រូវធ្វើដូច្នេះ យើងចាំបាច់ត្រូវមានក្របខ័ណ្ឌច្បាប់ហេដ្ឋារចនាសម្ព័ន្ធ និងអ្វីៗផ្សេងទៀតកំពុងដំណើរការ មុនពេលយើងនាំចូលមកអតិថិជនមកពីគ្រប់ផ្នែករបស់តំបន់នេះ»។
ស្ថិតក្រោមកិច្ចព្រមព្រៀងរយៈពេល ៣ ឆ្នាំនេះក្រុមហ៊ុន MKE Group និង SECC នឹងសហការគ្នាលើគ្រប់វិស័យសម្រាប់គោលបំណងនៃការអភិវឌ្ឍទីផ្សារមូលធនរបស់កម្ពុជាដែលរួមមានការចែករំលែកការអនុវត្តល្អបំផុត និងស្ដង់ដាលើវិស័យជាច្រើននៃការគ្រប់គ្រងហានិភ័យ អភិបាលកិច្ចសាជីវកម្ម និងការគោរពច្បាប់ ការអភិវឌ្ឍផលិតផល និងស្ដង់ដាប្រព័ន្ធរាយការណ៍នៃហិរញ្ញវត្ថុ និងគណនេយ្យ។
ប្រទេសកម្ពុជាបានចាប់ផ្ដើមដំណើរការទីផ្សារមូលធនជិត ១០ ឆ្នាំមកហើយ និងបានធ្វើឲ្យរីកចម្រើនដល់ផលិតផលមូលបត្រជាបន្តបន្ទាប់។ ដោយចាប់ផ្ដើមពីការអភិវឌ្ឍហេដ្ឋារចនាសម្ព័ន្ធច្បាប់រហូតមកដល់ពេលនេះ ផ្សារមូលបត្រកម្ពុជាមានក្រុមហ៊ុនចុះបញ្ជី ៥ ក្នុងនោះក្រុមហ៊ុន ៣ បោះផ្សាយបណ្ណបំណុលសាជីវកម្ម។
កាលពីឆ្នាំ ២០១៩ មូលធននីយកម្មទីផ្សារកើនឡើង ១៥៧ ភាគរយ ដល់ជាង ៨០០ លានដុល្លារ។ មានគ្រឹះស្ថានហិរញ្ញវត្ថុ និងក្រុមហ៊ុន ៧ កំពុងដំណើរការការរៀបចំដើម្បីចេញមូលបត្រភាគហ៊ុន និងបណ្ណបំណុលដែលរំពឹងថានឹងបញ្ចប់ក្នុង ២០២០៕LA
