ភ្នំពេញ: គណៈកម្មាធិការមូលបត្រកម្ពុជា (SECC) បានចុះអនុស្សរណៈយោគយល់គ្នា (MoU) ជាមួយក្រុមហ៊ុនចំនួន ៣ ដើម្បីជួយផ្តល់ប្រឹក្សាយោបល់ និងផ្គត់ផ្គង់បច្ចេកវិទ្យាទំនើបដល់ស្ថាប័ននេះក្នុងការជំរុញបច្ចេកវិទ្យាហិរញ្ញវត្ថុរបស់ខ្លួន។ នេះបើតាមសេចក្តីប្រកាសព័ត៌មាន SECC កាលពីថ្ងៃសុក្រ។
សេចក្តីប្រកាសព័ត៌មានបានឲ្យដឹងថាលោក ស៊ូ សុជាតិ អគ្គនាយកនៃអគ្គនាយកគណៈកម្មាធិការមូលបត្រកម្ពុជាបានចុះហត្ថលេខាលើអនុស្សរណៈយោគយល់គ្នាស្តីពីការផ្តល់ប្រឹក្សាយោបល់លើប្រព័ន្ធបច្ចេកវិទ្យាព័ត៌មានជាមួយក្រុមហ៊ុន Mobile C&C (Cambodia) Co., Ltd ក្រុមហ៊ុន Pathmazing Inc. និងក្រុមហ៊ុន We Alliance Co., Ltd។
លោក សុជាតិ បានឲ្យដឹងក្នុងសេចក្តីប្រកាសព័ត៌មានថា MoU នេះមានបំណងផ្តល់ការប្រឹក្សាយោបល់ និងផ្គត់ផ្គង់បច្ចេកវិទ្យាទំនើបសម្រាប់សេវាកម្មហិរញ្ញវត្ថុ បច្ចេកវិទ្យាហិរញ្ញវត្ថុ និងប្រព័ន្ធហេដ្ឋារចនាសម្ព័ន្ធសង្គមដែលមានមូលដ្ឋានផ្អែកលើបច្ចេកវិទ្យា។
សេចក្តីប្រកាសព័ត៌មានបានឲ្យដឹងថា ក្រុមហ៊ុនទាំង ៣ នឹងរួមគ្នាក្នុងការផ្តល់ប្រឹក្សាយោបល់ផ្នែកបច្ចេកវិទ្យា ចំណេះដឹង ជំនាញវិជ្ជាជីវៈ ព្រមទាំងផ្តល់ជំនួយបច្ចេកទេសដល់គណៈកម្មាធិការមូលបត្រកម្ពុជា ដើម្បីកំណត់តម្រូវការប្រព័ន្ធបច្ចេកវិទ្យាក្នុងក្របខ័ណ្ឌគតិយុត្ត។
សេចក្តីប្រកាសព័ត៌មានបន្តថា៖ «ការត្រួតពិនិត្យប្រព័ន្ធបច្ចេកវិទ្យារបស់ក្រុមហ៊ុនដែលទទួលបានអាជ្ញាប័ណ្ណ និងការអនុញ្ញាត ឬការអភិវឌ្ឍឌីជីថលសម្រាប់ផ្តល់របាយការណ៍របស់ក្រុមហ៊ុនចុះបញ្ជីលក់មូលបត្រ និងក្រុមហ៊ុនទទួលបានអាជ្ញាប័ណ្ណ ព្រមទាំងជួយប្រែក្លាយគណៈកម្មាធិការមូលបត្រទៅជាស្ថាប័នឌីជីថល»។
គណៈកម្មាធិការមូលបត្រកំពុងខិតខំប្រឹងប្រែងកិច្ចការរបស់ខ្លួនក្នុងការទាក់ទាញវិនិយោគិនមកធ្វើការវិនិយោគលើផលិតផលជួញដូរឧបករណ៍និស្សន្ទ ខណៈទំហំជួញដូរឧបករណ៍និស្សន្ទបានកើនឡើងពី ៨៤ លានដុល្លារកាលពីឆ្នាំ ២០១៨ ដល់ ១២០ លានដុល្លារកាលពីឆ្នាំ ២០១៩។ នេះបើយោងតាមទិន្នន័យពី SECC។
គិតត្រឹមឆ្នាំ ២០១៩ មានការកើនឡើងយ៉ាងច្រើននៃអ្នកចូលរួមក្នុងទីផ្សារនេះ រួមមានសមភាគីកណ្តាល ៥ ក្រុមហ៊ុន សម្រាប់ទីផ្សារឧបករណ៍និស្សន្ទ ក្រុមហ៊ុនជើងសាឧបករណ៍និស្សន្ទ ២៧ ក្រុមហ៊ុន ក្រុមហ៊ុនគ្រប់គ្រងមូលនិធិ ៥ ដែលបានទទួលអាជ្ញាប័ណ្ណនៅឆ្នាំនេះ និងក្រុមហ៊ុនធានាទុកទ្រព្យ ៥ ដែលផ្តល់អាជ្ញាប័ណ្ណរួចហើយដោយ SECC។
កាលពីឆ្នាំ ២០១៩ មូលធននីយកម្មទីផ្សារកើនឡើង ១៥៧ ភាគរយដល់ជាង ៨០០ លានដុល្លារ។ មានគ្រឹះស្ថានហិរញ្ញវត្ថុ និងក្រុមហ៊ុន ៧ កំពុងដំណើរការរៀបចំដើម្បីចេញមូលបត្រភាគហ៊ុន និងបណ្ណបំណុលដែលរំពឹងថា នឹងបញ្ចប់ក្នុងឆ្នាំ ២០២០ នេះ៕