ភ្នំពេញៈ អគ្គនាយកគណៈកម្មការមូលបត្រកម្ពុជា (SECC) អំពាវនាវឲ្យមានការចូលរួមកាន់តែច្រើនពីសាធារណជន និងក្រុមវិនិយោគិនក្នុងការវិនិយោគលើផលិតផលជួញដូរឧបករណ៍និស្សន្ទ។
ការជួញដូរឧបករណ៍និស្សន្ទ ជាកិច្ចព្រមព្រៀងហិរញ្ញវត្ថុរវាងភាគី ២ លើតម្លៃពីប្រតិបត្តិការទ្រព្យសកម្មដូចជាទំនិញ រូបិយប័ណ្ណ ឬភាគហ៊ុន។ គោលបំណងរបស់ពួកគេគឺការពារអាជីវកម្មប្រឆាំងនឹងហានិភ័យដូចជាការប្រែប្រួលតម្លៃ ឬការកើនឡើងអត្រាការប្រាក់។
លោក ស៊ូ សុជាតិ អគ្គនាយក SECC បានឲ្យដឹងថា ផលិតផលឧបករណ៍និស្សន្ទ ឬកិច្ចព្រមព្រៀងតម្លៃលើរូបិយប័ណ្ណ ឬផលិតផលផ្សេងទៀត (Forex) គឺជាប្រភេទថ្មីនៃផលិតផលហិរញ្ញវត្ថុនៅក្នុងផ្សារមូលបត្រកម្ពុជាដែលអាចផ្ដល់អត្ថប្រយោជន៍សម្រាប់ក្រុមវិនិយោគិនក្នុងរយៈពេលវែង។ ប៉ុន្តែលោកបានឲ្យដឹងថា មុនពេលធ្វើការសម្រេចចិត្តលើការវិនិយោគសាធារណជនត្រូវតែយល់ដឹងពីព័ត៌មានលម្អិតនៃប្រភេទផលិតផលឧបករណ៍និស្សន្ទនេះ។
លោកថ្លែងថា៖ «ដើម្បីបង្កើនការយល់ដឹងសាធារណជនអំពីវិស័យនេះ យើងបានធ្វើការបណ្ដុះបណ្ដាល ៥៦ វគ្គដល់ក្រុមហ៊ុនចេញមូលបត្របំណុលក្រុមវិនិយោគិន អ្នកជំនាញនៅទីផ្សារនេះតាមបណ្តាខេត្ត ១៥ ដែលមានអ្នកចូលរួម ៥៦៦២ នាក់។ យើងបានបង្កើនកិច្ចសហប្រតិបត្តិការអន្តរជាតិជាមួយនិយតករទីផ្សារក្នុងស្រុក និងពិភពលោកតាមរយៈការចុះហត្ថលេខាលើអនុស្សរណៈនៃការយោគយល់គ្នាជាមួយកូរ៉េ ចិន មីយ៉ាន់ម៉ា ថៃ វៀតណាម»។ល។
លោកបន្តថា៖ «ដើម្បីទទួលបានការជួញដូរប្រកបដោយជោគជ័យលើផលិតផលឧបករណ៍និស្សន្ទក្រុមវិនិយោគិនត្រូវតែសិក្សាឲ្យបានល្អអំពីភាពស្របច្បាប់របស់ក្រុមហ៊ុនថា តើក្រុមហ៊ុនទាំងនោះទទួលបានអាជ្ញាប័ណ្ណការជួញដូរពី SECC ដែរឬអត់។ ជាមួយគ្នានេះដែរ ក្រុមវិនិយោគិនក៏ត្រូវតែដឹងពីព័ត៌មានកាន់តែច្រើនអំពីក្រុមហ៊ុនដើម្បីចៀសផុតពីការវិនិយោគជាមួយក្រុមហ៊ុនដែលមិនមានអាជ្ញាប័ណ្ណ»។
លោកបញ្ជាក់ថា ជាមួយគ្នានេះដែរក្រុមហ៊ុនដែលទទួលបានអាជ្ញាប័ណ្ណត្រូវតែផ្សព្វផ្សាយព័ត៌មានដល់ក្រុមវិនិយោគិនអំពីហានិភ័យណាមួយ។
ទំហំជួញដូរឧបករណ៍និស្សន្ទបានកើនឡើងដល់ ៨៤ លានដុល្លារកាលពីឆ្នាំ ២០១៨ ដល់ ១២០ លានដុល្លារកាលពីឆ្នាំ ២០១៩។ នេះបើយោងតាមទិន្នន័យបានពី SECC។ គិតត្រឹមឆ្នាំ ២០១៩ មានការកើនឡើងយ៉ាងខ្លាំងនៃអ្នកចូលរួមក្នុងទីផ្សារនេះ ដូចជា សមភាគីកណ្ដាល ៥ ក្រុមហ៊ុនសម្រាប់ទីផ្សារឧបករណ៍និស្សន្ទ ក្រុមហ៊ុនជើងសារឧបករណ៍និស្សន្ទ ២៧ ក្រុមហ៊ុន ក្រុមហ៊ុនគ្រប់គ្រងមូលនិធិ ៥ ដែលបានទទួលអាជ្ញាប័ណ្ណនៅឆ្នាំនេះ និងក្រុមហ៊ុនធានាទុកទ្រព្យ ៥ ដែលផ្ដល់អាជ្ញាប័ណ្ណរួចហើយដោយ SECC៕LA