ភ្នំពេញ: គណៈកម្មការមូលបត្រកម្ពុជា (SECC) បានដាក់ឲ្យសាកល្បងការស្នើសុំអត្តសញ្ញាណវិនិយោគិន (Investor ID) តាមអនឡាញ ដើម្បីជួយសម្រួលដល់សាធារណជនដែលចង់ចូលរួមការជួញដូរមូលបត្រនៅលើផ្សារហ៊ុនកម្ពុជា ដែលនេះជាការខិតខំប្រឹងប្រែងដើម្បីទាក់ទាញវិនិយោគិនឲ្យចាប់អារម្មណ៍វិនិយោគលើផ្សារហ៊ុន ខណៈការរីករាលដាលជំងឺកូវីដ ១៩ នៅតែបន្ត។
លោក ស៊ូ សុជាតិ អគ្គនាយក SECC បានប្រាប់ភ្នំពេញប៉ុស្ដិ៍កាលពីថ្ងៃព្រហស្បតិ៍ថា Investor ID អនឡាញគឺជាគំនិតផ្តួចផ្ដើមថ្មីមួយដើម្បីផ្តល់ឱកាសដល់សាធារណជនមានភាពងាយស្រួលក្នុងការចូលរួមជាមួយផ្សារហ៊ុន និងជួយកាត់បន្ថយ ការទៅជួបភ្នាក់ងារក្នុងការចុះឈ្មោះដោយផ្ទាល់អំឡុងពេលកូវីដ ១៩។
លោកថ្លែងថា៖ «នេះជាគំនិតផ្តួចផ្ដើមថ្មីដើម្បីជួយសម្រួលដល់ក្រុមវិនិយោគិន ក្នុងការទទួលបាន ID សម្រាប់ការជួញដូរនៅលើទីផ្សារហ៊ុនរបស់យើង។ កាលពីមុនក្រុមវិនិយោគិនចាំបាច់ត្រូវការឈ្មួញជើងសាក្នុងការស្នើសុំ ID សម្រាប់ការជួញដូរ។ ចាប់ពីពេលនេះតទៅ ក្រុមវិនិយោគិនអាចដាក់ពាក្យសុំតាមអនឡាញ ដើម្បីទទួលបាន ID នេះ។ វាកាន់តែមានភាពងាយស្រួល រហ័ស និងមិនចាំបាច់ទៅជួបដោយផ្ទាល់សម្រាប់ប្រតិបត្តិការនៅក្នុងពេលវេលាដ៏ពិបាកនេះនោះទេ»។
លោកបន្ថែមថា៖ «ពេលនេះវាស្ថិតនៅក្នុងពេលសាកល្បង។ យើងនឹងអនុវត្តជាផ្លូវការក្នុងពេលឆាប់ៗ ប្រសិនបើប្រព័ន្ធនេះដំណើរដោយរលូន។ ក្រុមហ៊ុនឈ្មួញជើងសា នឹងធ្វើការជូនដំណឹងជាសាធារណៈចំពោះយន្តការថ្មីនេះ»។
លោក Jong Weon Ha អនុប្រធានក្រុមហ៊ុនផ្សារមូលបត្រកម្ពុជា (CSX) បាននិយាយថា បន្ទាប់ពីសេចក្ដីប្រកាសជាផ្លូវការពី SECC សាធារណជនដែលមានចំណាប់អារម្មណ៍លើផ្សារហ៊ុនអាចដាក់ពាក្យសុំ Investor ID ដោយផ្ទាល់ទៅ SECC តាមរយៈ https://id.secc.gov.kh. ។
លោកថ្លែងថា៖ «យើងយល់ថា មានវិនិយោគិនជាច្រើនចាប់អារម្មណ៍លើផ្សារហ៊ុនរបស់យើង ប៉ុន្តែពួកគេមិនមានពេលវេលាទៅបើកគណនីដោយផ្ទាល់ជាមួយក្រុមហ៊ុនជើងសា ដើម្បីស្នើសុំ Investor ID និងគណនីជួញដូរ (Trading Accounts)។ គំនិតនេះនឹងជួយសម្រួលដល់ពួកគេក្នុងការដាក់ពាក្យសុំ Investor ID អនឡាញពីកន្លែងណាក៏បាន»។
លោកបញ្ជាក់ថា៖ «យើងនឹងឃើញការកើនឡើងនៃ Investor ID នៅផ្សារហ៊ុននេះក្នុងពេលឆាប់ៗនេះ»។
លោកឲ្យដឹងថា បច្ចុប្បន្ន CSX ក៏កំពុងព្យាយាមក្នុងការស្វែងរកយន្តការ និងការធ្វើការងារជាមួយក្រុមហ៊ុនមូលបត្រ និង SECC ដើម្បីឲ្យមានការបើកគណនីជួញដូរអនឡាញ។ ដូច្នេះសាធារណជនមិនចាំបាច់មកជួបក្រុមហ៊ុនមូលបត្រឡើយ។ លោកបន្តថា៖ «យើងសង្ឃឹមថានឹងធ្វើឲ្យវាកើតឡើងក្នុងពេលឆាប់ៗ»៕LA