ភ្នំពេញ: ក្រុមហ៊ុន Gold Whale Co.,Ltd បានប្រកាសដាក់ដំណើរការអាជីវកម្ម «គ្រប់គ្រងមូលនិធិ» របស់ខ្លួនដែលធ្វើឲ្យវាក្លាយជាក្រុមហ៊ុនគ្រប់គ្រងមូលនិធិទី ៤ ដែលទទួលបានអាជ្ញាប័ណ្ណពីគណៈកម្មការមូលបត្រកម្ពុជា (SECC)។
ថ្លែងក្នុងពិធីប្រគល់អាជ្ញាប័ណ្ណ និងដាក់សម្ពោធជាផ្លូវការកាលពីថ្ងៃម្សិលមិញ លោក ស៊ូ សុជាតិ អគ្គនាយកគណៈកម្មការមូលបត្រកម្ពុជា (SECC) បានថ្លែងថា ក្រុមហ៊ុនគ្រប់គ្រងមូលនិធិនេះទទួលបានអាជ្ញាប័ណ្ណធ្វើអាជីវកម្មចំនួន ៣ រួមមានអាជីវកម្មបង្កើត គ្រប់គ្រង និងចាត់ចែងមូលនិធិសាធារណៈ អាជីវកម្មបង្កើត គ្រប់គ្រង មូលនិធិឯកជន និងអាជីវកម្មបង្កើត គ្រប់គ្រង និងចាត់ចែងមូលនិធិសាធារណៈ និងឯកជនតាមរយៈប្រព័ន្ធបច្ចេកវិទ្យា។
លោកថ្លែងថា៖ «ក្រុមហ៊ុនគ្រប់គ្រងមូលនិធិមានសិទ្ធិប្រមូលប្រាក់ពីសាធារណជនមកវិនិយោគលើគម្រោងណាមួយ ហើយរាល់គម្រោងរបស់ក្រុមហ៊ុនត្រូវទទួលបានការចុះបញ្ជីនៅ SECC ជាមុនសិន»។
តាមលោក ស៊ូ សុជាតិ ក្រុមហ៊ុនគ្រប់គ្រងមូលនិធិគឺសំដៅដល់អាជីវកម្មដែលទទួលបានអាជ្ញាប័ណ្ណពី SECC ក្នុងការរៀបចំគម្រោងវិនិយោគដែលគេឲ្យឈ្មោះថា គម្រោងវិនិយោគរួមដែលមានការចូលរួមពីសាធារណជនតាមរយៈការដាក់សាច់ប្រាក់ចូលទៅក្នុងគម្រោងនេះ ដើម្បីទទួលបានផលប្រយោជន៍ត្រឡប់មកវិញ។
លោក Jones Kam-Fung Chan នាយកប្រតិបត្តិនៃក្រុមហ៊ុន Gold Whale Co.,Ltd បានថ្លែងថា អាជីវកម្មគ្រប់គ្រងមូលនិធិនឹងផ្តោតលើការវិនិយោគ និងបង្កើតប្រាក់ចំណេញសម្រាប់អ្នកវិនិយោគ។
លោកថ្លែងថា៖ «យើងផ្តោតលើការវិនិយោគដែលផ្តល់ប្រាក់ចំណេញដល់អ្នកចូលរួមគម្រោងតាមរយៈការរៀបចំរចនាសម្ព័ន្ធហិរញ្ញវត្ថុ ការគ្រប់គ្រងវិនិយោគ ការគ្រប់គ្រងផលបត្រ ការអភិវឌ្ឍផលិតផល ការិយាល័យកណ្តាល និងការគ្រប់គ្រងហានិភ័យជាដើម»។
បើតាមលោក Jones ក្រោយពីទទួលបានអាជ្ញាប័ណ្ណពី SECC ក្រុមហ៊ុនបានចាប់អារម្មណ៍លើគម្រោងវិនិយោគក្នុងវិស័យអចលនទ្រព្យ ថាមពល និងហេដ្ឋារចនាសម្ព័ន្ធនៅកម្ពុជា។ លោកបន្ថែមថាសេដ្ឋកិច្ចប្រទេសកម្ពុជា បានបង្ហាញពីសក្តានុពល និងភាពអនុគ្រោះសម្រាប់ក្រុមហ៊ុនរបស់លោកក្នុងការជួយទាក់ទាញ វិនិយោគិនបរទេសកាន់តែច្រើនមកកម្ពុជា។
លោកបានថ្លែងថា៖ «អាជីវកម្មក្រុមហ៊ុនរបស់យើងនឹងផ្តល់ទ្រព្យសម្បត្តិដ៏អស្ចារ្យសម្រាប់វិនិយោគិន ដើម្បីចាក់ឫសនៅក្នុងទីផ្សារក្នុងស្រុក»។
បើតាមលោក សុជាតិ មកដល់ពេលនេះមានក្រុមហ៊ុន ៤ ហើយដែលទទួលអាជ្ញាប័ណ្ណជាក្រុមហ៊ុនគ្រប់គ្រងមូលនិធិ ខណៈក្រុមហ៊ុន ២ ទៀតកំពុងដាក់ពាក្យស្នើសុំ៕ LA