ភ្នំពេញៈ ក្រុមហ៊ុនមូលធន និងអ្នកគ្រប់គ្រងមូលនិធិ OBOR Management កាលពីថ្ងៃ ៣១ ខែសីហាបានទទួលអាជ្ញាប័ណ្ណអនុញ្ញាតជាផ្លូវការពីគណៈកម្មការមូលបត្រកម្ពុជា (SECC) នឹងដើរតួជាប្រភពមូលនិធិថ្មីមួយទៀតសម្រាប់អាជីវកម្មសហគ្រាសធុនតូច និងមធ្យម (SMEs) របស់ប្រទេសកម្ពុជា។
SECC ចាប់ផ្ដើមចេញអាជ្ញាប័ណ្ណគ្រប់គ្រងមូលនិធិនេះចាប់តាំងពីពាក់កណ្ដាលឆ្នាំ ២០១៨ ដែលអនុញ្ញាតឲ្យរូបវន្ត បុគ្គល ឬអង្គភាពនានា អាចដាក់ពាក្យសុំដើម្បីដើរតួជាអ្នកគ្រប់គ្រងមូលនិធិក្នុងគម្រោងនៃការវិនិយោគរួម (CISs) ដែលមានន័យថាមានតែក្រុមហ៊ុនដែលមានអាជ្ញាប័ណ្ណប៉ុណ្ណោះ ដែលមានសិទ្ធិបង្កើនមូលនិធិ ហើយអាចប្រើប្រាស់មូលនិធិនេះក្នុងការវិនិយោគក្នុងនាមជាបុគ្គល។
លោក Christophe Forsinetti ប្រធានក្រុមហ៊ុន OBOR Management បានឲ្យដឹងថា ក្រុមហ៊ុនរបស់លោកកំពុងវិនិយោគលើក្រុមហ៊ុនមួយចំនួននៅប្រទេសកម្ពុជាក្នុងរយៈពេល ១០ ឆ្នាំកន្លងមក។
លោកថ្លែងថា៖ «យុទ្ធសាស្ដ្រវិនិយោគរបស់យើងនឹងកាន់តែរីកចម្រើនបន្ថែមទៀតនៅក្នុងបរិបទដែលមានបទប្បញ្ញត្តិរឹងមាំមួយក៏ដូចជាបទពិសោធន៍របស់ក្រុមគ្រប់គ្រងរបស់យើងនៅលើទីផ្សារជុំវិញពិភពលោក»។
លោកលើកឡើងថា៖ «អាជ្ញាប័ណ្ណនេះនឹងផ្ដល់នូវភាពជឿទុកចិត្តដល់វិនិយោគិន និងអាចឲ្យពួកយើងអាចប្រមូលផ្ដុំការវិនិយោគសំខាន់ៗកាន់តែច្រើនឡើងៗដល់សហគ្រាសធុនតូច និងមធ្យម (SMEs) របស់ប្រទេសកម្ពុជា។ លើសពីនេះទៀត មធ្យោបាយវិនិយោគទុនបានអនុញ្ញាតក្រោមអាជ្ញាប័ណ្ណនេះដែរនឹងពង្រីកយុទ្ធសាស្ដ្រហិរញ្ញប្បទាន សម្រាប់សហគ្រាសធុនតូច និងមធ្យម, អាជីវកម្ម Startup ពីប្រាក់កម្ចីពីធនាគារ និងមីក្រូហិរញ្ញវត្ថុ (MFIs) ខណៈដែលមានការអនុញ្ញាតឱ្យអ្នកវិនិយោគទុនក្នុងប្រទេសធ្វើការវិនិយោគភាគហ៊ុនរបស់ខ្លួនទៅក្នុងប្រភេទទ្រព្យថ្មីដែលពីមុនបានកំណត់ចំពោះការទិញអចលនទ្រព្យ និងប្រាក់បញ្ញើពីធនាគារ។ យើងកំពុងទន្ទឹងរង់ចាំនូវការបើកបង្កើតមូលនិធិសហគ្រាសធុនតូច និងមធ្យមជាលើកដំបូងរបស់យើងនៅក្នុងប្រទេសកម្ពុជា (Cambodian SME Fund)” ។
លោក ស៊ូសុជាតិ អគ្គនាយកនៃគណៈកម្មការមូលបត្រកម្ពុជាបានឲ្យដឹងថា ដើម្បីទទួលបានអាជ្ញាប័ណ្ណនេះរាល់ការស្នើសុំទាំងអស់ត្រូវបានពិនិត្យពិច័យដោយយកចិត្តទុកដាក់ និងត្រូវបង្ហាញនូវសំណៅឯកសារដើមនៃដើមទុនសុទ្ធ ភាពរឹងមាំនៃធនធានមនុស្ស ហេដ្ឋារចនាសម្ព័ន្ធបែបឌីជីថលគួរទុកចិត្តបាន ឆន្ទៈនៃតម្លាភាព និងកំណត់ត្រាអាជីវកម្មទៅរកប្រាក់ចំណេញកាន់តែច្រើនឡើង ព្រមទាំងមាននិរន្តរភាពកាន់តែខ្លាំងឡើង។
លោកបញ្ជាក់ថា៖ «វាជាការប្រសើរណាស់ដែលមានក្រុមហ៊ុនជាច្រើនបានកំពុងធ្វើការជាមួយគណៈកម្មការមូលបត្រកម្ពុជា និងចូលរួមចំណែកក្នុងការបង្កើតនូវភាពរឹងមាំមួយក្នុងបរិបទនៃបទប្បញ្ញត្ដិសម្រាប់សហគ្រិន និងក្រុមហ៊ុនកម្ពុជាទាំងអស់»។
កាលពីឆ្នាំមុន SECC បានព្រមានជាសាធារណៈទាក់ទិននឹងគម្រោងការវិនិយោគរួមដែលសន្យាថានឹងផ្តល់ភាគលាភខ្ពស់ ប៉ុន្តែមិនបានទទួលការយល់ព្រមណាមួយពីនិយតករឡើយ ហើយ SECC អំពាវនាវឲ្យជនរងគ្រោះដោយសារផែនការនេះ ដាក់ពាក្យបណ្ដឹងទៅអាជ្ញាធរមូលដ្ឋានរបស់ខ្លួន។
តាមលោក សុជាតិ ក្រុមហ៊ុនគ្រប់គ្រងមូលនិធិប្រតិបត្តិការក្រោមច្បាប់ និងត្រូវបានគ្រប់គ្រងដោយ SECC។
លោក សុជាតិ បញ្ជាក់ថា៖ «អ្នកដែលមានប្រាក់ច្រើនមួយចំនួន ហើយមិនដឹងរបៀបក្នុងការវិនិយោគ ខ្ញុំផ្ដល់យោបល់ឲ្យពួកគេប្រើប្រាស់ក្រុមហ៊ុនគ្រប់គ្រងមូលនិធិនេះ»៕LA