.jpg)
បុគ្គលិកកំពុងធ្វើការនៅក្នុងបន្ទប់ជួញដូរភាគហ៊ុនរបស់ CSX កន្លងមក។ ហុង មិនា
ភ្នំពេញៈ គណៈកម្មការមូលបត្រកម្ពុជា (SECC) កាលពីម្សិលមិញបានចេញផ្សាយសេចក្តីជូនដំណឹងមួយតម្រូវឲ្យវិនិយោគិនក្នុងវិស័យមូលបត្រដែលបានកែប្រែព័ត៌មានពីពាក្យស្នើសុំលេខអត្តសញ្ញាណវិនិយោគិនរបស់ពួគគេត្រូវធ្វើបច្ចុប្បន្នភាពព័ត៌មាននោះទៅកាន់ SECC ដើម្បីបញ្ចៀសការលុបចោលលេខអត្តសញ្ញាណ។
SECC បានទុកពេលបីខែចាប់ថ្ងៃចេញសេចក្តីជូនដំណឹងនេះសម្រាប់វិនិយោគិនធ្វើការដាក់ពាក្យស្នើសុំកែប្រែព័ត៌មាន។ សេចក្តីជូនដំណឹងរបស់ SECC បានបញ្ជាក់ថា៖ «វិនិយោគិនដែលមិនអនុវត្តតាមការកំណត់នេះ SECC នឹងពិនិត្យលទ្ធភាពធ្វើការលុបចោលលេខអត្តសញ្ញាណវិនិយោគិនក្នុងអំឡុងពេល ៣ ខែបន្ទាប់ [ពីចេញសេចក្តីជូនដំណឹង]»។
រាល់ការជួញដូរមូលបត្រនៅក្នុងផ្សារមូលបត្រកម្ពុជាមិនថា វិនិយោគិនជារូបវន្តបុគ្គល និងនីតិបុគ្គលអាចធ្វើការជួញដូរបានដោយការបើកលេខអត្តសញ្ញាណវិនិយោគិនជាមុនសិនមុននឹងអាចបើកគណនីជួញដូរបាន។ លេខអត្តសញ្ញាណវិនិយោគិនអាចបើកបានតាមរយៈក្រុមហ៊ុនមូលបត្រណាមួយក៏បាន ឬ ក៏ទៅ SECC ផ្ទាល់។
សន្ទស្សន៍ផ្សារមូលបត្រកម្ពុជាកាលពីថ្ងៃចន្ទបានធ្លាក់ចុះបន្តិចគឺធ្លាក់ចុះ ០,៥៥ ភាគរយពីការបិទការជួញដូរកាលពីថ្ងៃសុក្រដោយបានធ្លាក់ពីចំនួន ៥៨៧,០៨ ពិន្ទុមកត្រឹម ៥៨៣,៨៥ ពិន្ទុ។ ភាគហ៊ុនរបស់ក្រុមហ៊ុនចំនួន ៤ ដែលជួញដូរក្នុងផ្សារហ៊ុនបានធ្លាក់ចុះកាលពីថ្ងៃម្សិលមិញ និងមានតែក្រុមហ៊ុនមួយប៉ុណ្ណោះរក្សាបានស្ថិរភាព។ បរិមាណជួញដូរភាគហ៊ុនសរុបកាលពីថ្ងៃម្សិលមិញមានចំនួន ១ ៩៣៧ ហ៊ុន។
ប្រាក់ចំណេញរបស់ក្រុមហ៊ុនចុះបញ្ជីក្នុងផ្សារហ៊ុនភាគច្រើនសុទ្ធតែបង្ហាញពីកំណើននៅក្នុងត្រីមាសទី ៤ ឆ្នាំ ២០១៨ ដែលបង្ហាញពីកំណើនប្រតិបត្តិការល្អរបស់ក្រុមហ៊ុនទាំងនោះ។ នេះបើយោងតាមរបាយការណ៍ដែលបានចេញផ្សាយក្នុងផ្សារហ៊ុនកាលពីសប្តាហ៍មុន៕
