ភ្នំពេញ: មជ្ឈមណ្ឌលវេជ្ជសាស្ត្រសិង្ហបុរី Singapore Medical Center (SGMC) នឹងបើកដំណើរការលើកដំបូងក្នុងប្រទេសកម្ពុជាចុងខែកញ្ញានេះក្រោមការវិនិយោគទឹកប្រាក់ជាង ៨ លានដុល្លារ។ នេះបើតាមសេចក្តីប្រកាសរបស់ក្រុមហ៊ុនកាលពីថ្ងៃម្សិលមិញ។
មជ្ឈមណ្ឌលវេជ្ជសាស្ត្រដែលត្រូវបានអះអាងថា នឹងបំពាក់ដោយឧបករណ៍បរិក្ខារពេទ្យទំនើប និងយកតាមស្តង់ដាសិង្ហបុរីនឹងចាប់ផ្តើមផ្តល់សេវានៅកម្ពុជាដំបូងនៅថ្ងៃទី ២៣ ខែកញ្ញានេះ។ នេះបើតាមនាយកគ្រប់គ្រង SGMC កាលពីថ្ងៃម្សិលមិញ។
មជ្ឈមណ្ឌលវេជ្ជសាស្ត្រសិង្ហបុរីមានទីតាំងស្ថិតនៅក្នុងសង្កាត់ទន្លេបាសាក់ អគារ The Bridge ជាន់ទី ៣ ដែលមានទំហំ ១ ៤០០ ម៉ែត្រការ៉េ។
លោក Anthony Jude Tan នាយកប្រតិបត្តិ Dr Map (Cambodia) ដែលជាក្រុមហ៊ុនប្រឹក្សាឱសថ និងគ្រប់គ្រងដំណោះស្រាយបានឲ្យដឹងថា SGMC នឹងបើកបម្រើសាធារណជនសម្រាប់សេវាកម្ម វេជ្ជសាស្ត្រទូទៅ ការពិនិត្យសុខភាព និងសេវាថែទាំសុខភាពទូទៅហើយ SGMC នឹងបើកកញ្ចប់សេវាកម្មសុខុមាលភាព និងសេវាកម្មព្យាបាលពេញលេញចាប់ពីថ្ងៃទី ១៨ ខែ វិច្ឆិកា ឆ្នាំ ២០១៩ ខាងមុខ។
លោកថ្លែងថា៖ «SGMC មានការប្ដេជ្ញាចិត្តខ្ពស់នៅក្នុងការកសាងគោលដៅនៃការរស់នៅប្រកបដោយសុខុមាលភាពដំបូងគេ និងល្អជាងគេនៅកម្ពុជា»។
SGMC នឹងផ្ដល់សេវាកម្មវេជ្ជសាស្ត្រទូទៅពិនិត្យសុខភាព និងការថតឆ្លុះធ្វើរោគវិនិច្ឆ័យ សុខភាពស្ត្រី វះកាត់ទូទៅ ផ្នែកកែសម្ផស្ស ការព្យាបាលដោយកាំរស្មីឡាស៊ែរ ការព្យាបាលដោយអ៊ីយ៉ុងអវិជ្ជមាន និងកាំរស្មីអ៊ីនហ្វ្រា (NIFI) ការព្យាបាលដោយប្រើកម្អែខ្សាច់ភ្នំភ្លើង (Volcanic Sand Bath Therapy) ការព្យាបាលដោយផ្ដល់ជាតិទឹកសេរ៉ូម IV និងសេវាកម្មអាហារូបត្ថម្ភជាដើម។ នេះបើតាមលោក Tan។
លោកថ្លែងថា៖ «យើងនឹងផ្ដល់សេវាកម្មថែទាំវេជ្ជសាស្ត្រឈានមុខគេស្របទៅតាមស្តង់ដាឯកទេស និងទឹកចិត្តដ៏ល្អប្រពៃរបស់វេជ្ជបណ្ឌិតជំនាញឯកទេសសិង្ហបុរី និងកម្ពុជា»។
លោកបន្តថា សេវាកម្មនេះក៏ជាផ្នែកមួយនៃការទាក់ទាញទេសចរសុខភាពមកកម្ពុជាផងដែរ។ លោកបានបន្តថា៖ «ទាំងប្រជាជនខ្មែរ និងជនបរទេសដែលរស់នៅកម្ពុជាតែងតែធ្វើដំណើរទៅក្រៅប្រទេសដើម្បីទៅទទួលសេវាវេជ្ជសាស្ត្រ និងថែទាំសុខភាព ប៉ុន្តែចាប់ពីពេលនេះពួកគាត់អាចទទួលបានសេវាកម្មប្រកបដោយគុណភាពកម្រិតដូចនៅប្រទេសសិង្ហបុរីមាននៅភ្នំពេញតែម្ដង»។
SGMC មានក្រុមវេជ្ជបណ្ឌិតសរុប ១២ នាក់ក្នុងនោះមានវេជ្ជបណ្ឌិតមកពីសិង្ហបុរី អាមេរិក និងខ្មែរ។
លោកវេជ្ជបណ្ឌិត Roy Koh Kiok Miang ឯកទេសផ្នែកវះកាត់ប្រព័ន្ធសរសៃប្រសាទបានឲ្យដឹងថា SGMC នឹងផ្តល់សេវាកម្មដល់អតិថិជនគោរពតាមបទដ្ឋានសុវត្ថិភាព និងក្រមសីលធម៌កម្រិតខ្ពស់។
លោក Anthony Jude Tan បានឲ្យដឹងថា SGMC ក៏មានគម្រោងពង្រីកនៅខេត្តព្រះសីហនុ និងសៀមរាបនៅពេលអនាគតផងដែរ។
តាមទិន្នន័យក្រសួងសុខាភិបាល មន្ទីរពេទ្យនៅទូទាំងប្រទេសសរុប ១៣០ ក្នុងនោះមន្ទីរពេទ្យជាតិ មន្ទីរពេទ្យស្រុក/ខេត្ត ចំនួន ១១០ និងមន្ទីរពេទ្យឯកជនដែលមានគ្រែចាប់ពី ៨០ មានចំនួន ២០។ ទិន្នន័យបង្ហាញថា មណ្ឌលសុខភាពនៅទូទាំងប្រទេសជាង ១ ០០០ កន្លែង និងមន្ទីរសម្រាកព្យាបាលជាង ៤០០ កន្លែង៕