ភ្នំពេញៈ ក្នុងកិច្ចខិតខំប្រឹងប្រែងដើម្បីបង្កើនការអភិវឌ្ឍសេដ្ឋកិច្ចឌីជីថលក្នុងរយៈពេល ២-៣ ឆ្នាំខាងមុខ ក្រសួងប្រៃសណីយ៍ និងទូរគមនាគមន៍ កាលពីពេលថ្មីៗនេះត្រូវបានក្រសួងព័ត៌មានសម្រេចថា នឹងផ្តល់ជូននូវហ្វ្រេកង់ប្រមាណ ៧០០ MHz សម្រាប់យកទៅអភិវឌ្ឍបន្ថែមនូវប្រព័ន្ធ 5G ដែលនេះជាវិធានការមួយក្នុងការលោតផ្លោះទៅរកការប្រែក្លាយកម្ពុជាទៅជាសេដ្ឋកិច្ចឌីជីថលសម្រាប់កំណើនថ្មីរបស់ខ្លួន។
លោក Thomas Hundt អគ្គនាយកក្រុមហ៊ុន Smart Axiata ដែលជាប្រតិបត្តិករទូរស័ព្ទចល័តឈានមុខគេមួយនៅក្នុងប្រទេសកម្ពុជាបានផ្តល់បទសម្ភាសឲ្យលោក ម៉ៃ គុណមករា ការីនិពន្ធព័ត៌មានសេដ្ឋកិច្ចកាសែតភ្នំពេញប៉ុស្ដិ៍អំពីផែនការវិនិយោគរបស់ក្រុមហ៊ុននេះសម្រាប់ការផ្ដល់សេវាបណ្ដាញ 5G នៅក្នុងប្រទេសកម្ពុជា។
តើរហូតមកដល់ពេលនេះការអភិវឌ្ឍលើបណ្ដាញ 5G របស់ក្រុមហ៊ុន Smart Axiata ឈានដល់ណាហើយ?
ចាប់តាំងពីការដាក់បង្ហាញឲ្យសាកល្បងផ្សាយផ្ទាល់ប្រព័ន្ធ 5G ជាលើកដំបូងកាលពីខែកក្កដា ឆ្នាំ ២០១៩ បច្ចុប្បន្ននេះក្រុមហ៊ុន Smart Axiata កំពុងដាក់ឲ្យអនុវត្តការសាកល្បងបណ្ដាញ 5G នៅតាមទីតាំងមួយចំនួននៅក្នុងទីក្រុងភ្នំពេញដោយប្រើប្រាស់អាជ្ញាប័ណ្ណសាកល្បងដែលចេញដោយនិយតករទូរគមនាគមន៍របស់ប្រទេសកម្ពុជា។
យើងបានរៀបចំដើម្បីសម្រេចបាននូវល្បឿននៃជីហ្គាបៃ និង latencies ដ៏ល្អ ខណៈការស្វែងរកការសាកល្បងថ្មីនៃការប្រើប្រាស់ដែលរួមមានគំនិតផ្ដួចផ្ដើមកាលពីពេលថ្មីៗនេះជាមួយនឹងក្រុមហ៊ុន Huawei ដែលជាក្រុមហ៊ុនដៃគូរបស់យើងនៃការដាក់ពង្រាយនូវមជ្ឈមណ្ឌលត្រួតពិនិត្យសម្រាប់សម្របសម្រួលកូវីដ១៩ តាមទីតាំងបណ្ដោះអាសន្នរបស់ក្រសួងសុខាភិបាលដែលធ្វើការតភ្ជាប់ជាមួយមន្ទីរពេទ្យមិត្តភាពខ្មែរ-សូវៀត និងមណ្ឌលសុខភាពចាក់អង្រែតាមរយៈការធ្វើសន្និសីទវីដេអូដោយប្រើប្រាស់ ហ្វ្រេកង់សាកល្បងនៃបណ្ដាញ 5G។
យើងមានបំណងបន្តការសាកល្បងនេះក្នុងរយៈពេល ២-៣ ខែទៀត រហូតដល់រដ្ឋាភិបាលផ្ដល់ភាពច្បាស់លាស់បន្ថែមទៀតលើការផ្ដល់អាជ្ញាប័ណ្ណបណ្ដាញ 5G និងក្របខ័ណ្ឌគោលនយោបាយដែលអាចផ្ដល់ដល់ប្រតិបត្តិករ ដូចជាក្រុមហ៊ុន Smart Axiata នូវឱកាសនៅក្នុងការផ្ដល់សេវាបណ្ដាញ 5G ជាលក្ខណៈពាណិជ្ជកម្មដល់សាធារណជន។
តើលោកមានទស្សនៈបែបណាអំពីផែនការរបស់រដ្ឋាភិបាលក្នុងការពង្រីក ហ្វ្រេកង់ ៧០០ MHz សម្រាប់ការអភិវឌ្ឍប្រព័ន្ធ 5G?
ចំពោះហ្វ្រេកង់ ៧០០MHz (ឬត្រូវបានគេស្គាល់យ៉ាងទូលំទូលាយថាជា APT700 នៅក្នុងតំបន់របស់យើង) គឺជាអ៊ីនធឺណិតល្អបំផុតសម្រាប់ទីជនបទដោយសារវាមានលក្ខណៈនៃការផ្សាយល្អបំផុត នេះក៏មានន័យថា វានឹងកាន់តែមានភាពសន្សំសំចៃសម្រាប់ប្រតិបត្តិករទូរស័ព្ទចល័តក្នុងការដោះស្រាយសេវាទូរស័ព្ទចល័តកាន់តែលឿនជាមួយនឹង APT 700 នេះ។
យើងពិតជាត្រូវបានលើកទឹកចិត្តដោយសេចក្ដីប្រកាសរបស់លោកនាយករដ្ឋមន្ដ្រីកាលពីដើមឆ្នាំនេះ និងការអភិវឌ្ឍនៅពេលថ្មីៗរបស់ក្រសួងប្រៃសណីយ៍ និងទូរគមនាគមន៍ ក្រសួងព័ត៌មានព្រមទាំងក្រសួងសេដ្ឋកិច្ច និងហិរញ្ញវត្ថុស្ដីពីប្រធានបទនៃការផ្លាស់ប្តូរឌីជីថលថ្នាក់ជាតិដែលនឹងអាចឲ្យមានការដាក់ចេញ APT700 សម្រាប់សេវាទូរស័ព្ទចល័ត។
យើងត្រូវដឹងថា បណ្ដាប្រទេសជាច្រើននៅក្នុងតំបន់បានដាក់ចេញ ឬកំពុងដាក់ចេញនូវអ៊ីនធឺណិតនេះជាបន្តបន្ទាប់ដើម្បីភ្ជាប់គម្លាតនៃការអភិវឌ្ឍប្រព័ន្ធឌីជីថលនេះ ខណៈដែលទូរស័ព្ទចល័តជាច្រើនអាចប្រើអ៊ីនធឺណិតនេះរួចហើយ។
ខណៈមានបណ្ដាប្រទេសជាច្រើនផ្ដល់បណ្ដាញ APT700 សម្រាប់ប្រព័ន្ធ 5G វាមានសារៈសំខាន់ណាស់សម្រាប់ប្រទេសកម្ពុជាក្នុងការធានាថា អ៊ីនធឺណិត APT700 ត្រូវបានផ្ដល់ដោយវាមិនគ្រាន់តែសម្រាប់ការអភិវឌ្ឍប្រព័ន្ធ 5G ប៉ុណ្ណោះទេ ប៉ុន្តែថែមទាំងភាពអព្យាក្រឹតផ្នែកបច្ចេកវិទ្យា ប្រតិបត្តិករទូរស័ព្ទចល័តគួរត្រូវបានអនុញ្ញាតឲ្យប្រើប្រាស់ APT700 ដើម្បីធ្វើឲ្យប្រសើរឡើងនូវភាពអាចរកបានបណ្ដាញអ៊ីនធឺណិត 4G LTE ដែលនៅតែមានការជាប់ពាក់ព័ន្ធយ៉ាងខ្លាំងនៅក្នុងប្រទេសនេះ (ជាពិសេសនៅតាមតំបន់ជនបទ) និងបច្ចេកវិទ្យាផ្សេងទៀតនៅពេលអនាគត ខណៈទូរស័ព្ទចល័តដែលអាចប្រើប្រាស់បាន បានកើនឡើងកាន់តែច្រើន។
តើប្រទេសកម្ពុជាត្រៀមខ្លួនរួចហើយ ឬនៅក្នុងការទទួលយកបច្ចេកវិទ្យាទំនើបនេះ ជាពិសេសទាក់ទងនឹងហេដ្ឋារចនាសម្ព័ន្ធគាំទ្រ? តើក្រុមហ៊ុនរបស់លោកកំពុងវិនិយោគលើហេដ្ឋារចនាសម្ព័ន្ធដែលជាឆ្នឹងខ្នងដើម្បីបម្រើការដាក់ឲ្យប្រើប្រាស់បណ្ដាញ 5G យ៉ាងណាហើយ?
ក្រុមហ៊ុន Smart Axiata វិនិយោគចន្លោះពី ៧០ ទៅ ៨០ លានដុល្លារក្នុង ១ ឆ្នាំ ជាពិសេសសម្រាប់ការពង្រីកបណ្ដាញគ្របដណ្តប់។ ការប្ដេជ្ញាចិត្តនេះនៅតែរក្សាដដែលសម្រាប់ឆ្នាំ ២០២០ ទោះបីជាយើងបានបង្កើនការវិនិយោគ (CAPEX) ដើម្បីគាំទ្រនិន្នាការនៃការប្រើប្រាស់ខ្ពស់ និងការរំពឹងទុកក្នុងអំឡុងពេលស្ថានការណ៍កូវីដ១៩ដែលមិនធ្លាប់មាននេះក៏ដោយ។
ទាក់ទងទៅនឹងហេដ្ឋារចនាសម្ព័ន្ធដើម្បីគាំទ្រប្រព័ន្ធ 5G យើងមើលឃើញថា កម្ពុជានឹងទទួលយកជាលើកដំបូងនូវស្ថាបត្យកម្មមិនមែនមានតែប្រព័ន្ធ 5G នេះទេ។ សម្រាប់ប្រព័ន្ធនេះ យើងពិតជាបានត្រៀមខ្លួនជាស្រេច យើងបានធ្វើឲ្យប្រសើរឡើងចំណុចស្នូលរបស់យើងដើម្បីអាចប្រើប្រាស់បណ្ដាញ 5G បានចាប់តាំងពីឆ្នាំមុន ហើយកំពុងបន្តការសាកល្បងទៅលើទិដ្ឋភាពជាច្រើន។ នៅពេលយើងទទួលបានអាជ្ញាប័ណ្ណ និងការយល់ព្រមសម្រាប់ការប្រើប្រាស់វិសាលគមបណ្ដាញ 5G យើងនឹងអាចធ្វើឲ្យបណ្ដាញ 5G ក្លាយជាការពិតនៅក្នុងប្រទេសកម្ពុជាក្នុងរយៈពេលតែ ២-៣ ខែប៉ុណ្ណោះ។
ប្រសិនបើយើងចង់ក្លាយជាប្រទេសដំបូងគេនៅក្នុងតំបន់អាស៊ាន ភាគីពាក់ព័ន្ធទាំងអស់ចាំបាច់ត្រូវធ្វើការងារជាមួយគ្នា បើមិនអ៊ីចឹងទេ យើងនឹងចេញដំណើរមិនទាន់គេទេ ខណៈបណ្ដាប្រទេសជាច្រើនផ្សេងទៀតកំពុងរៀបចំផែនការដាក់ឲ្យដំណើរការបណ្ដាញ 5G ត្រឹមត្រីមាសទី ៤ ឆ្នាំ ២០២០។ នៅក្នុងពេលវេលាដ៏ពិសេសនេះយើងក៏នឹងចង់ចង្អុលបង្ហាញថា បណ្ដាញ 5G ត្រូវបានរំពឹងថានឹងមានការចំណាយទុន (CAPEX) ខ្ពស់ អាស្រ័យហេតុនេះវាមានសារៈសំខាន់ណាស់ដែលរដ្ឋាភិបាលធ្វើឲ្យមានវិសាលគមបណ្ដាញ 5G គ្រប់គ្រាន់នៅពេលអនាគតនៅក្នុងតម្លៃសមរម្យ។
បើមិនអ៊ីចឹងទេនិរន្តរភាពនៃឧស្សាហកម្មទូរស័ព្ទចល័តអាចមានភាពមិនច្បាស់លាស់នៅពេលអនាគត ដូច្នេះការការពារសក្ដានុពលរបស់បណ្ដាញ 5G និងឧបករណ៍ទូរស័ព្ទចល័តផ្សេងទៀតត្រូវបានប្រើប្រាស់យ៉ាងពេញលេញ៕LA