ភ្នំពេញ៖ ក្រុមហ៊ុន Smart Axiata ដែលជាប្រតិបត្តិករទូរគមនាគមន៍ឈានមុខគេនៅក្នុងព្រះរាជាណាចក្រកម្ពុជា បានចាប់ដៃគូជាមួយ DirexPlay ជាក្រុមហ៊ុន អភិវឌ្ឍន៍ហ្គេមចល័តក្នុងស្រុក ដើម្បីកែលម្អហ្គេម កំហឹងអ្នកប្រយុទ្ធ (Wrath of Fighters) ដែលជាការពង្រីកវិស័យហ្គេមកម្សាន្តនេះនៅកម្ពុជា។
យោងតាមសេចក្ដីប្រកាសរបស់ក្រុមហ៊ុន Smart កាលពីថ្ងៃទី ១២ ខែមេសា អ្នកលេងហ្គេមជុំវិញពិភពលោក និងអាចជួយអ្នកលេងហ្គេមស្វែងយល់ពីសិល្បៈ និងវប្បធម៌កម្ពុជាផងដែរ ក្នុងអំឡុងពេលលេងជាមួយមិត្តភក្ដិរបស់ពួកគេ។ អ្នកលេងហ្គេមអាចបង្កើត និងកែសម្រួលអ្នកប្រយុទ្ធផ្ទាល់របស់ពួកគេ ជាមួយនឹងសម្លៀកបំពាក់ផ្សេងៗគ្នាជាច្រើន ដែលបង្កើតឡើងទៅតាមកំណាព្យវីរកថា ដែលមានមូលដ្ឋានលើរឿង រាមយាណៈ និងមហាភាតរៈ។ អ្នកលេងអាចជ្រើសរើសផែនទី និងបរិយាកាសផ្សេងៗគ្នាជាច្រើន ដែលស្ថិតក្នុងប្រទេសកម្ពុជា ដូចជានៅប្រាសាទបុរាណកម្ពុជា អង្គរធំ រាជធានីភ្នំពេញ និងទីជនបទក្នុងខេត្តសៀមរាបជាដើម។
លោក ឈួម ពិសិដ្ឋ អគ្គនាយកក្រុមហ៊ុន DirexPlay បានថ្លែងថា៖ «គំនិតរបស់ហ្គេមនេះ គឺដើម្បីនាំយកសិល្បៈ និងវប្បធម៌ក្នុងស្រុកទៅកាន់ពិភពកម្សាន្តឌីជីថល ដូច្នេះអ្នកណាម្នាក់ នៅទីណាក៏ដោយ មកពីប្រភពវប្បធម៌ណាក៏ដោយ អាចរីករាយ ភ្ជាប់ទំនាក់ទំនង និងទទួលបានបទពិសោធន៍ជាមួយសិល្បៈ និងវប្បធម៌ខ្មែរតាមអនឡាញក្នុងអំឡុងពេលទំនេរពីការងារ ឬការរៀនសូត្ររបស់ពួកគេ»។
ក្រុមហ៊ុន DirexPlay ក៏បានអភិវឌ្ឍហ្គេមចល័ត និងកម្មវិធីផ្សេងៗទៀតផងដែរ ដែលសាច់រឿងរបស់ហ្គេមយកតាមរឿងព្រេង និងប្រពៃណីរបស់កម្ពុជា ដូចជា រឿងដំណើរផ្សងព្រេងរបស់ សុខ និងសៅ និងកម្មវិធី Khmer eCard ជាដើម។
លោកបន្តថា៖ «យើងមានក្ដីរំភើបរីករាយខ្លាំង ដែលបានចាប់ដៃគូជាមួយក្រុមហ៊ុន Smart សម្រាប់រដូវកាលថ្មីនេះ។ ក្រុមហ៊ុន Smart ពិតជាចាប់អារម្មណ៍ចំពោះការគាំទ្រ និងការលើកកម្ពស់ក្រុមហ៊ុនអភិវឌ្ឍន៍ហ្គេម ដូចជាពួកយើង។ ភាពជាដៃគូនេះអាចឲ្យយើងនាំយកហ្គេមខ្មែររបស់យើងទៅកាន់កម្រិតបន្ទាប់ទៀត ទទួលបានអតិថិជនបន្ថែមទៀត និងចែកចាយបទពិសោធន៍ដ៏រីករាយបន្ថែមទៀតដល់អ្នកលេងហ្គេមកម្ពុជា ជាពិសេសអតិថិជនរបស់ក្រុមហ៊ុន Smart»។
លោក Thomas Hundt នាយកប្រតិបត្តិក្រុមហ៊ុន Smart Axiata បានឲ្យដឹងថា យើងមានការកោតសរសើរ ដែលក្រុមហ៊ុនអភិវឌ្ឍន៍ហ្គេមកម្ពុជា កំពុងបង្កើតហ្គេមទូរស័ព្ទ ដែលអាចឲ្យមនុស្សចូលលេងបាននៅទូទាំងប្រទេស ហើយក៏មានសក្ដានុពលទាក់ទាញអ្នកលេងហ្គេមអន្តរជាតិផងដែរ។ វាបង្ហាញវឌ្ឍនភាពដ៏គួរឲ្យភ្ញាក់ផ្អើលនៃវិស័យហ្គេមទូរស័ព្ទរបស់កម្ពុជា និងបង្ហាញថា កម្ពុជាអាចដើរតួនាទីដ៏ធំមួយ ក្នុងកំណើនកីឡាអេឡិចត្រូនិក ក្នុងតំបន់ និងពិភពលោក។
លោក Thomas លើកឡើងថា៖ «នេះមិនមែនជាលើកទី ១ ទេ ដែលយើងបានសហប្រតិបត្តិការជាមួយក្រុមហ៊ុន DirexPlay។ កាលពីឆ្នាំមុន យើងបានសហការគ្នាផលិតហ្គេមមួយឈ្មោះថា Oum Touk by Smart ដើម្បីអបអរដល់ពិធីអុំទូករបស់កម្ពុជា។ តាមរយៈការទាញយកទេពកោសល្យដ៏ស្ទាត់ជំនាញក្នុងស្រុក យើងអាចគ្រប់គ្រងអំណាចបច្ចេកវិទ្យាក្នុងស្រុកបាន ដើម្បីប្រាប់រឿងរ៉ាវរបស់កម្ពុជា ដោយប្រើប្រាស់សំឡេងរបស់កម្ពុជាពិតប្រាកដ»។
ក្រុមហ៊ុន Smart Axiata បន្តនាំមុខគេខាងផ្នែកកំណើនកីឡាអេឡិចត្រូនិកក្នុងប្រទេសកម្ពុជា តាមរយៈកម្មវិធីប្រកួតហ្គេមផ្សេងៗ និងភាពជាដៃគូជាមួយក្រុមហ៊ុនអភិវឌ្ឍន៍ក្នុងស្រុក។ កាលពីឆ្នាំ ២០២០ ក្រុមហ៊ុន Smart បានចូលរួមរៀបចំការប្រកួតលេងហ្គេម Kingdom of Legends ដែលជាព្រឹត្តិការណ៍ប្រកួតហ្គេមអេឡិចត្រូនិកធំបំផុតនៅកម្ពុជា ដែលមានប្រាក់រង្វាន់សរុបចំនួន ៣២ ០០០ ដុល្លារ។ Leng Center ផ្ដល់ជូនអ្នកនូវមុខងារថ្មីៗជាច្រើន ដែលផ្ដល់ឲ្យអ្នកនូវបទពិសោធន៍លេងហ្គេមដ៏សម្បូរបែប៕LA