ភ្នំពេញៈ ក្រុមហ៊ុនបណ្តាញទូរស័ព្ទចល័ត Smart Axiata បានសហការជាមួយក្រុមហ៊ុនបច្ចេកវិទ្យា Huawei ក្នុងការតេស្តសាកល្បងលើបច្ចេកវិទ្យា 5G លើកដំបូងគេនៅកម្ពុជាកាលពីថ្ងៃម្សិលមិញ ដោយក្រុមហ៊ុន Smart អះអាងថា បានត្រៀមទឹកប្រាក់វិនិយោគរាប់រយលានដុល្លារទៅលើបច្ចេកវិទ្យានេះ។
លោក Thomas Hundt នាយកប្រតិបត្តិក្រុមហ៊ុន Smart Axiata បាននិយាយថា ការប្រកាសពីគម្រោងសាកល្បង 5G នៅថ្ងៃនេះជាឆ្នាំដ៏មមាញឹករបស់ក្រុមហ៊ុន Smart ដែលបានដាក់ចេញសេវាបច្ចេកវិទ្យាបង្កើតថ្មីជាច្រើន រួមជាមួយនឹងការវិនិយោគលើបណ្តាញដ៏ធំ។ លោកថ្លែងថា៖ «បេសកកម្មរបស់យើងគឺដើម្បីបង្កើនភាពសម្បូរបែបនៃការរស់នៅរបស់ប្រជាជនកម្ពុជារាប់លាននាក់តាមរយៈបណ្តាញពិភពលោក និងបទពិសោធឌីជីថល»។
លោកបន្តថា៖ «យើងនឹងបន្តវិនិយោគដើម្បីបង្កើនបណ្តាញ 4.5G ដែលមានស្រាប់របស់យើង ខណៈត្រៀមសម្រាប់បណ្តាញ 5G នៅពេលបន្ទាប់»។
បើតាមលោក Thomas ការរៀបចំបណ្តាញ និងកម្មវិធីសម្រាប់ប្រើប្រាស់ 5G នឹងរួចរាល់នៅក្នុងឆ្នាំ ២០១៩ នេះដោយក្រុមហ៊ុនគ្រោងនឹងចំណាយប្រាក់រាប់រយលានដុល្លារលើការងារនេះ។ លោកបានថ្លែងថា៖ «ទិសដៅរបស់យើងគឺធ្វើឲ្យកាន់តែប្រសើរឡើងសម្រាប់ការរស់នៅរបស់ប្រជាជនរាប់លាននាក់ តាមរយៈបណ្តាញបច្ចេកវិទ្យាលំដាប់ថ្នាក់ពិភពលោក និងបច្ចេកវិទ្យាឌីជីថល»។
លោក Aaron Wang ប្រធានផ្នែកបច្ចេកវិទ្យា (CTO) របស់ Huawei Wireless Network បាននិយាយថា ប្រព័ន្ធ 5G នឹងក្លាយជាផ្នែកដ៏សំខាន់សម្រាប់ការផ្លាស់ប្តូរ បច្ចេកវិទ្យា ព័ត៌មានវិទ្យា និងទូរគមនាគមន៍ (ICT) និងកិច្ចសហប្រតិបត្តិការបើកទូលាយលើគ្រប់ឧស្សាហកម្ម។
លោកថ្លែងថា៖ «យើងកំពុងនិយាយអំពីឌីជីថលកម្ពុជា និង 5G។ វាពិតជាធ្វើឲ្យអ្នកអាចសម្រេចបាននូវគោលដៅទាំងនោះ។ ក្រុមហ៊ុន Huawei តែងតែធ្វើការរួមគ្នាជាមួយកម្ពុជា និងក្រុមហ៊ុន Smart Axiata ដើម្បីស្ថាបនាបណ្តាញដ៏ពេញលេញនៅប្រទេស កម្ពុជា»។
លោកថ្លែងបន្តថា៖ «កម្ពុជា គឺជាប្រទេសឈានមុខគេដែលបានដាក់ពង្រាយ 4G នៅអាស៊ីអាគ្នេយ។ ខ្ញុំសង្ឃឹមថា ប្រទេស កម្ពុជា នឹងក្លាយជាប្រទេសឈានមុខគេម្តងទៀតសម្រាប់ប្រព័ន្ធ 5G»។
លោក ម៉ៅ ចរិយា នាយកបញ្ញត្តិករទូរគមនាគមន៍កម្ពុជា (TRC) បាននិយាយថា នេះគ្រាន់តែជាដំណាក់កាលដំបូងដែលក្រុមហ៊ុន Smart Axiata ប្រកាសពីការចាប់ផ្តើមធ្វើតេស្តសាកល្បងតែប៉ុណ្ណោះ។
លោកថ្លែងថា៖ «បច្ចុប្បន្នយើងគ្រាន់តែបើកឲ្យក្រុមហ៊ុនសាកល្បងសិន ព្រោះយើងចង់ដឹងថា តើវានឹងមានការប៉ះពាល់អ្វីខ្លះ ដូចជាល្បឿន Download និងការគ្របដណ្តប់បណ្តាញសេវាជាដើម»។
លោកបន្តថា រហូតមកដល់ពេលនេះលោកមិនច្បាស់ថា 5G អាចនឹងត្រូវរដ្ឋាភិបាលអនុញ្ញាតឲ្យប្រើប្រាស់ជាផ្លូវការនៅពេលណានោះទេ ខណៈបច្ចុប្បន្នអាជ្ញាធរកំពុងពង្រឹងការគ្របដណ្តប់សេវា 4G ឲ្យបានទូលំទូលាយនៅទូទាំងប្រទេសជាមុនសិន។ លោកថ្លែងថា៖ «ការអនុញ្ញាតឲ្យប្រើប្រាស់ប្រព័ន្ធ 5G នឹងឈានមកដល់ ប៉ុន្តែមិនមែនភ្លាមៗនោះទេ»។
រដ្ឋាភិបាលកម្ពុជាកាលពីខែមេសាបានចុះ MOU ជាមួយក្រុមហ៊ុន Huawei ក្នុងការនាំយកបច្ចេកវិទ្យា 5G មកប្រទេស កម្ពុជា៕ LA