ភ្នំពេញៈ ក្រុមហ៊ុន Smart Axiata ដែលគ្រប់គ្រងដោយវិនិយោគិនម៉ាឡេស៊ី និងជាក្រុមហ៊ុនបុត្រសម្ព័ន្ធរបស់ក្រុមហ៊ុនមេ Axiata Group បានវិនិយោគ ៩០ លានដុល្លារបន្ថែមទៀត ដើម្បីវិនិយោគលើហេដ្ឋារចនាសម្ព័ន្ធទូរស័ព្ទចល័តរបស់ខ្លួនក្នុងឆ្នាំ ២០២១ នេះតាមរយៈការពង្រីក និងធ្វើឱ្យប្រសើរឡើងនូវបណ្ដាញទំនាក់ទំនងខ្លួនដើម្បីធានាឱ្យបាននូវស្ថិរភាព និងល្បឿននៃបណ្ដាញអ៊ីនធឺណិតសម្រាប់អតិថិជនទូទាំងប្រទេសកម្ពុជា។
យោងតាមសេចក្ដីប្រកាសព័ត៌មានរបស់ក្រុមហ៊ុនកាលពីថ្ងៃទី ៣០ ខែមីនា ការវិនិយោគនេះគឺផ្ដោតសំខាន់ទៅលើកម្មវិធីកែលម្អហេដ្ឋារចនាសម្ព័ន្ធបណ្ដាញទំនាក់ទំនងឆ្នាំ ២០២១ និងពង្រឹងបណ្ដាញប្រព័ន្ធ 4G LTE សម្រាប់អ្នកប្រើប្រាស់ទូទាំងប្រទេស ព្រមទាំងធានាថា បណ្ដាញទំនាក់ទំនងបានត្រៀមរួចរាល់នៅពេលមានការរៀបចំដំឡើងប្រព័ន្ធ 5G ដ៏ធំមួយនៅពេលខាងមុខ ខណៈរដ្ឋាភិបាលបានផ្ដល់ការអនុញ្ញាតឱ្យប្រើបច្ចេកវិទ្យាដ៏ថ្មីបំផុតនេះដែលនឹងផ្ដល់គុណភាពនៃល្បឿនអ៊ីនធឺណិតកាន់តែប្រសើរ។
សេចក្ដីប្រកាសបន្តថា ប្រព័ន្ធទូរគមនាគមន៍ចល័តពិតជាមានសារៈសំខាន់ណាស់ ពិសេសការលើកកម្ពស់សេដ្ឋកិច្ចកម្ពុជាឆ្ពោះទៅកាន់យុគសម័យឌីជីថល។ ការប្រើប្រព័ន្ធ 4G មានសារៈសំខាន់សម្រាប់អតិថិជន ព្រោះវាអាចផ្ដល់ឱ្យពួកគេនូវព័ត៌មានថ្មីអំពីជំងឺកូវីដ ១៩ ជួយដំណើរការប្រតិបត្តិការអាជីវកម្មរបស់ពួកគេ ការសិក្សាតាមអនឡាញ ធ្វើប្រតិបត្តិការទូទាត់លើទូរស័ព្ទចល័ត និងភ្ជាប់ទំនាក់ទំនងជាមួយមិត្តភកិ្ដ និងក្រុមគ្រួសារ។
លោក Thomas Hundt នាយកប្រតិបត្តិក្រុមហ៊ុន Smart Axiata ឱ្យដឹងថា ការវិនិយោគលើហេដ្ឋារចនាសម្ព័ន្ធសំខាន់ៗ និងការធ្វើឱ្យប្រសើរឡើងនូវសេវាកម្មរបស់ក្រុមហ៊ុនជាប្រចាំសម្រាប់អតិថិជនគឺតែងតែជាគោលសំខាន់ៗនៃប្រតិបត្តិការអាជីវកម្មរបស់ក្រុមហ៊ុន Smart។
លោកថ្លែងថា៖ «ឆ្នាំនេះមិនខុសពីឆ្នាំមុនៗឡើយ ថ្វីដ្បិតមានបញ្ហាប្រឈមជាមួយជំងឺកូវីដ ១៩ ក៏បញ្ហាប្រឈមទាំងនេះជំរុញឱ្យយើងធានាបានថា អតិថិជនរបស់យើងអាចពឹងផ្អែកលើបណ្ដាញទំនាក់ទំនងយើង ដើម្បីរក្សាទំនាក់ទំនងយ៉ាងសកម្មជាមួយអ្នកដទៃ ទោះបីពួកគេកំពុងអនុវត្តវិធានការរក្សាគម្លាតសុវត្ថិភាពក្នុងគ្រាដ៏លំបាកនេះក៏ដោយ»។
លោកបន្តថា៖ «ក្នុងរយៈពេលប៉ុន្មានខែខាងមុខទៀត អតិថិជននឹងឃើញមានការរីកចម្រើនគួរឱ្យកត់សម្គាល់នៅក្នុងបណ្ដាញទំនាក់ទំនងរបស់ពួកយើង ហើយក្រុមហ៊ុននឹងអាចផ្ដល់ជូននូវបទពិសោធអ៊ីនធឺណិតកាន់តែល្អប្រសើរជាងមុន សម្រាប់ការសិក្សាតាមអនឡាញ ការលេងហ្គេម វីដេអូ និងតន្ដ្រី»។
ទិន្នន័យចុងក្រោយពី TRC បង្ហាញថា គិតត្រឹមខែឧសភា ចំនួនការជាវអ៊ីនធឺណិតតាមទូរស័ព្ទចល័តដ៏សកម្មរបស់ប្រតិបត្តិការទាំង ៦ នៅប្រទេសកម្ពុជា គឺ ២០ ៤៨១ ០៥១ ធ្លាក់ចុះ ០,០៨ ភាគរយធៀបនឹងរយៈពេលដូចគ្នាកាលពីឆ្នាំមុន។
ជាមួយគ្នានេះដែរ ចំនួននៃការជាវអ៊ីនធឺណិតលើតុ និងអ៊ីនធឺណិតខ្សែមានចំនួន ៥២ ៤៨០ ប៉ុណ្ណោះ គិតត្រឹមចុងខែឧសភា ឆ្នាំ ២០២០ ធ្លាក់ចុះ ២១,៦២ ភាគរយ ធៀបនឹងចុងខែឧសភា ឆ្នាំ ២០១៩។
បច្ចុប្បន្នក្រុមហ៊ុន Smart មានស្ថានីយជាង ៣ ០០០ ទីតាំងនៅទូទាំងប្រទេសកម្ពុជា ដែលអនុញ្ញាតឱ្យអតិថិជន ៨ លាននាក់ទទួលបានបទពិសោធឌីជីថលពិសេសលើបណ្ដាញ 4G LTE ដែលផ្ដល់សេវាជូនប្រជាពលរដ្ឋចំនួន ៩១,៥ ភាគរយនៃចំនួនប្រជាជន។
គិតត្រឹមចុងឆ្នាំ ២០២១ ក្រុមហ៊ុន Smart Axiata គ្រោងសង់ស្ថានីយបណ្ដាញចំនួន ៣៥០ កន្លែងបន្ថែមទៀត ដើម្បីបំពេញតម្រូវការប្រើប្រាស់សេវាអ៊ីនធឺណិតចល័តដែលកំពុងកើនឡើងយ៉ាងខ្លាំងក្នុងការតភ្ជាប់ទំនាក់ទំនង។ លើសពីការសាងសង់ស្ថានីយបណ្ដាញថ្មី ក្រុមហ៊ុនក៏មានបំណងអភិវឌ្ឍស្ថានីយដែលមានស្រាប់ផងដែរ។
ក្នុងខណៈដែលអតិថិជន Smart បានចាប់ផ្ដើមការប្រើប្រាស់ 4G យ៉ាងរហ័ស ក្រុមហ៊ុនក៏នឹងមានគម្រោងបញ្ឈប់បណ្ដាញសេវា 3G របស់ខ្លួនក្នុងឆ្នាំ ២០២១ ដោយផ្លាស់ប្តូរវិសាលគមន៍ ហ្វ្រេកង់វិទ្យុ ដែលនៅសល់ពីបណ្ដាញ 3G ទៅជា 4G។
គិតត្រឹមចុងឆ្នាំ ២០២០ ក្រុមហ៊ុន Smart បានវិនិយោគទឹកប្រាក់ចំនួន ១,៨៨ ពាន់លានដុល្លារនៅកម្ពុជា ខណៈក្រុមហ៊ុនបានបង់ពន្ធចំនួន ៥៦២ លានដុល្លារ និងកម្រៃនិយតកម្មដល់រតនាគារកម្ពុជា៕ LA