ភ្នំពេញ: ក្រុមហ៊ុន Smart សហការជាមួយ Impact Hub Phnom Penh ដើម្បីផ្តល់ការបណ្តុះបណ្តាលតាមអនឡាញសម្រាប់សហគ្រិនក្នុងស្រុក ដើម្បីជម្នះបញ្ហាប្រឈមក្នុងអំឡុងពេលវេលាដ៏ពិបាកនៃការរីករាលដាលជំងឺកូវីដ ១៩។
ជាមួយនឹងមូលនិធិ ១ លានដុល្លារដើម្បីប្រឆាំងនឹងជំងឺកូវីដ ១៩ វគ្គសិក្សាអនឡាញដោយមិនគិតប្រាក់នេះ ត្រូវបានដាក់ឱ្យដំណើរការកាលពីថ្ងៃព្រហស្បតិ៍ក្នុងគោលបំណងដើម្បីជួយដល់សហគ្រិននៅកម្ពុជា ដើម្បីជម្នះបញ្ហាដែលបានបង្កឡើងដោយជំងឺរាតត្បាតសកលកូវីដ ១៩។ កម្មវិធីនេះបង្កើតឡើង ជាពិសេសសម្រាប់អ្នកដឹកនាំអាជីវកម្មធុនតូច និងមធ្យមដែលត្រូវការដំណោះស្រាយ ដើម្បីជួយឱ្យអាជីវកម្មរបស់ពួកគេប្រសើរឡើង និងបង្កើតក្រុមហ៊ុនដែលធន់នឹងគ្រោះមហន្តរាយផ្សេងៗ។
កញ្ញា Olivia Hough នាយិកាគ្រប់គ្រងរបស់ Impact Hub Phnom Penh បានឱ្យដឹងថា គោលដៅនៃកម្មវិធីពង្រឹងអាជីវកម្ម ធុនតូច និងមធ្យមគឺដើម្បីនាំយកចំណេះដឹងដល់សហគ្រិននៅទូទាំងប្រទេសកម្ពុជា និងជួយពួកគេបង្កើតអាជីវកម្មប្រកបដោយនិរន្តរភាព និងភាពធន់ដែលអាចជម្នះវិបត្តិ ដូចជាជំងឺរាតត្បាតសកលកូវីដ ១៩។
កញ្ញា Olivia ថ្លែងថា៖ «យើងបានចាប់ដៃគូជាមួយក្រុមហ៊ុន Spring Activator ជាក្រុមហ៊ុនកាណាដាដែលគាំទ្រដល់អាជីវកម្មទើបបង្កើតថ្មី និងមានបទពិសោធក្នុងការឆ្លងកាត់វិបត្តិសេដ្ឋកិច្ចចំនួន ៣ លើកដែលនេះហើយ ជាកត្តាធ្វើឱ្យក្រុមហ៊ុនមានបទពិសោធដោយផ្ទាល់ក្នុងការដឹកនាំអាជីវកម្មឆ្លងកាត់ពេលវេលាលំបាកដោយសារតែភាពមិនប្រាកដប្រជា និងហានិភ័យ។ យើងបានដាក់បញ្ចូលការសិក្សា និងបកប្រែខ្លឹមសារឱ្យស័ក្ដិសមនឹងបរិបទសង្គមសម្រាប់សហគ្រាសធុនតូច និងមធ្យមនៅកម្ពុជា»។
លោក Thomas Hundt នាយកប្រតិបត្តិក្រុមហ៊ុន Smart បានឱ្យដឹងថា SME មានសារៈសំខាន់សម្រាប់កំណើនសេដ្ឋកិច្ចរបស់កម្ពុជា ខណៈដែលពួកគេកំពុងប្រឈមនឹងបញ្ហាពីការរីករាលដាលជំងឺកូវីដ ១៩ ។
លោកថា៖ «យើងមានមោទនភាពណាស់ ដែលបានគាំទ្រដល់កម្មវិធីពង្រឹងអាជីវកម្មរបស់ Impact Hub។ ភាពជោគជ័យរបស់អាជីវកម្មទើបបង្កើតថ្មី និងសហគ្រាសធុនតូច និងមធ្យមគឺមានសារៈសំខាន់ខ្លាំងណាស់ ដើម្បីកសាងសេដ្ឋកិច្ចឱ្យរឹងមាំក្នុងអំឡុងពេលដែលអាជីវកម្មកំពុងប្រឈមនឹងបញ្ហាធ្ងន់ធ្ងរ ដូចជាការផ្លាស់ប្តូរក្នុងទីផ្សារ ការបាត់បង់អតិថិជន និងបញ្ចូលសកម្មភាពទៅអនឡាញ»៕LA