ភ្នំពេញ៖ ក្រុមហ៊ុន Smart Axiata ដែលជាប្រតិបត្តិករទូរស័ព្ទចល័តឈានមុខគេរបស់ប្រទេសកម្ពុជាបានប្រកាសកាលពីថ្ងៃច័ន្ទថា ខ្លួននឹងវិនិយោគទឹកប្រាក់លើសពី ៩០ លានដុល្លាលើហេដ្ឋារចនាសម្ព័ន្ធបណ្តាញទូរស័ព្ទចល័តរបស់ខ្លួនក្នុងឆ្នាំ ២០២១ នេះ ដោយពង្រីកនិងធ្វើឲ្យប្រសើរឡើងនូវបណ្តាញទំនាក់ទំនងរបស់ខ្លួនដើម្បីធានាឲ្យបាននូវស្ថេរភាព និង ល្បឿននៃបណ្ដាញ អ៊ីនធឺណិតសម្រាប់អតិថិជនក្រុមហ៊ុន។
ចំណុចសំខាន់នៃកម្មវិធីកែលម្អហេដ្ឋារចនាសម្ព័ន្ធបណ្តាញទំនាក់ទំនងឆ្នាំ ២០២១នឹងពង្រឹងបណ្តាញប្រព័ន្ធ 4G LTE សម្រាប់អ្នកប្រើប្រាស់ទូទាំងប្រទេស ព្រមទាំងធានាឲ្យបានថា បណ្ដាញទំនាក់ទំនងបានត្រៀមរួចរាល់ ពេលរៀបចំតំឡើងប្រព័ន្ធ 5G ដ៏ធំមួយ ខណៈពេលរាជរដ្ឋាភិបាលផ្តល់ការអនុញ្ញាតឱ្យប្រើប្រាស់បច្ចេកវិទ្យាដ៏ថ្មីបំផុតនេះដែលនឹងផ្ដល់គុណភាពនៃល្បឿនអ៊ិនធឺណិតកាន់តែប្រសើរ។
បច្ចុប្បន្ន ក្រុមហ៊ុន Smart មានស្ថាននីយ៍បណ្តាញចំនួន ៣ ០០០ ជាងទីតាំងនៅទូទាំងប្រទេសកម្ពុជាដែលអនុញ្ញាតឱ្យអតិថិជនចំនួន ៨ លាននាក់ទទួលបានបទពិសោធន៍ឌីជីថលពិសេសលើបណ្តាញ 4G LTE ដែលផ្ដល់សេវាជូនប្រជាពលរដ្ឋចំនួន ៩១,៥% នៃចំនួនប្រជាជន។
លោក ថូម៉ាស ហ៊ុន (Thomas Hundt) នាយកប្រតិបត្តិក្រុមហ៊ុន Smart Axiata មានប្រសាសន៍ថា៖ «ការវិនិយោគលើហេដ្ឋារចនាសម្ព័ន្ធសំខាន់ៗ និង ការធ្វើឲ្យប្រសើរឡើងនូវសេវាកម្មរបស់ក្រុមហ៊ុនជាប្រចាំសម្រាប់អតិថិជនរបស់ពួកយើងតែងតែជាគោលសំខាន់នៃប្រតិបត្តិការអាជីកម្មរបស់ក្រុមហ៊ុន Smart នៅកម្ពុជា ហើយឆ្នាំនេះមិនខុសប្លែកពីឆ្នាំមុនៗឡើយ ថ្វីត្បិត ជាមានបញ្ហាប្រឈមជាមួយជំងឺកូវីដ១៩ក៏ដោយ។ បញ្ហាប្រឈមទាំងនេះក៏ជំរុញឱ្យយើងធានាឲ្យបានថា អតិថិជនរបស់យើងអាចពឹងផ្អែកលើបណ្តាញទំនាក់ទំនងរបស់យើងដើម្បីរក្សាទំនាក់ទំនងយ៉ាងសកម្មជាមួយអ្នកដទៃ ទោះបីពួកគេកំពុងអនុវត្តវិធានការរក្សាគម្លាតសុវត្ថិភាពក្នុងគ្រាលំបាកនេះក៏ដោយ។»
គិតត្រឹមចុងឆ្នាំ ២០២០ ក្រុមហ៊ុន Smart បានវិនិយោគទឹកប្រាក់ចំនួន ១,៨៨ ពាន់លានដុល្លារនៅកម្ពុជា ខណៈពេលដែលក្រុមហ៊ុនក៏បានបង់ពន្ធចំនួន ៥៦២ លានដុល្លារលើពន្ធអាករ និង កម្រៃនិយ័តកម្មដល់រតនាគារកម្ពុជា៕