ភ្នំពេញៈ ក្រុមហ៊ុនទូរស័ព្ទចល័ត Smart ដែលជាបុត្រសម្ព័ន្ធរបស់ក្រុមហ៊ុន Axiata Group Berhad មានមូលដ្ឋាននៅក្នុងម៉ាឡេស៊ីបានបោះទុនប្រមាណ ១,៤ ពាន់លានដុល្លារ ក្នុងការពង្រីកអាជីវកម្មរបស់ខ្លួននៅកម្ពុជា។ នេះបើយោងតាមប្រធានក្រុមហ៊ុន។
លោក តាន់ស្រ៊ី ចាមាលូឌីន អ៊ីប្រាហ៊ីម ប្រធានក្រុមហ៊ុន Axiata Group Berhad ថ្លែងបែបនេះក្នុងជំនួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាពកាលពីថ្ងៃអង្គារ។
លោកបានថ្លែងថា៖ «ក្រុមហ៊ុន Smart Axiata បានបោះទុនវិនិយោគនៅកម្ពុជាអស់ប្រមាណ ១,៤ ពាន់លានដុល្លារហើយ ហើយក្រុមហ៊ុនកំពុងមានគម្រោងវិនិយោគបន្ថែមទៀតលើបច្ចេកវិទ្យាថ្មី ទំនើប រួមទាំងប្រព័ន្ធល្បឿនលឿន 5G ផងដែរ។ ការវិនិយោគរបស់ក្រុមហ៊ុន Smart Axiata គឺមិនត្រឹមតែដើម្បីរកផលចំណេញនោះទេ ប៉ុន្តែក៏មានគោលដៅចូលរួមចំណែកអភិវឌ្ឍសេដ្ឋកិច្ចកម្ពុជាក៏ដូចជាសង្គមជាតិកម្ពុជាផងដែរ»។
លោក ហ៊ុន សែន បានថ្លែងអំណរគុណយ៉ាងខ្លាំងចំពោះលោក តាន់ស្រ៊ី និងក្រុមហ៊ុន Smart ដែលបានចូលរួមចំណែកក្នុងការអភិវឌ្ឍកម្ពុជាតាមកម្មវិធីមនុស្សធម៌នានារបស់ក្រុមហ៊ុន។
លោកនាយរដ្ឋមន្ត្រីក៏បានសុំឲ្យក្រុមហ៊ុនពិចារណាពង្រីកវិសាលភាពរបស់ក្រុមហ៊ុនឲ្យគ្របដណ្ដប់ទៅលើទីជនបទឲ្យបានច្រើនទូលំទូលាយ ពិសេសលោកនាយករដ្ឋមន្ត្រីបានស្នើឲ្យក្រុមហ៊ុនពិចារណាក្នុងការជួយផ្តល់នូវសេវាអ៊ីនធឺណិតដល់សាលារៀន រួមទាំងសាកលវិទ្យាល័យ និងវិទ្យាល័យព្រមទាំងនៅតាមបណ្ណាល័យជាដើម និងមន្ទីរពេទ្យដើម្បីធ្វើយ៉ាងណាឲ្យគ្រូបង្រៀន និស្សិត និងសិស្សានុសិស្សមានឱកាសប្រើប្រាស់បច្ចេកវិទ្យាតាមអ៊ីនធឺណិត ដើម្បីបង្កើនការសិក្សាស្រាវជ្រាវពង្រីកចំណេះវិជ្ជា ដើម្បីពង្រឹងគុណភាព និងសមត្ថភាពធនធានមនុស្សឲ្យកាន់តែរីកចម្រើន។
ជាមួយគ្នានេះដែរលោកនាយករដ្ឋមន្ត្រីបានស្នើសុំឲ្យក្រុមហ៊ុន Smart Axiata ពិចារណាពិនិត្យមើលប្រព័ន្ធស្មាតនៅក្រៅប្រទេស (Roaming) ផងដែរ គឺធ្វើយ៉ាងណាឲ្យប្រព័ន្ធស្មាតអាចដំណើរការទៅបានទាំងការហៅចេញចូល និងប្រព័ន្ធអ៊ីនធឺណិតឲ្យបានល្អនៅក្រៅប្រទេសឲ្យបានច្រើន ព្រោះពេលលោកនាយករដ្ឋមន្ត្រីអញ្ជើញទៅបំពេញបេសកកម្មក្រៅប្រទេសគឺប្រព័ន្ធស្មាតមិនសូវមានដែលលំបាកក្នុងការប្រើប្រាស់។
លោកថ្លែងថា៖ «តាមរយៈការពង្រីកវិសាលភាពថែមទៀតទាំងនៅក្នុងស្រុក និងក្រៅស្រុកគឺនឹងធ្វើឲ្យកាន់តែពេញនិយមពីប្រជាពលរដ្ឋ និងយុវជនសិស្សានុសិស្សជាមិនខាន ព្រោះសព្វថ្ងៃនេះក្រុមហ៊ុន Smart Axiata កំពុងមានសក្ដានុពលខ្លាំងផ្នែកវិស័យទូរគមនាគមន៍ដែលទាក់ទាញបានជំនឿជឿជាក់យ៉ាងខ្លាំងពីប្រជាពលរដ្ឋកម្ពុជា»។
បើយោងតាមលោក តាន់ស្រ៊ី ក្រៅពីការផ្តោតលើអាជីវកម្ម បច្ចុប្បន្ននេះក្រុមហ៊ុន Smart បានចូលរួមចំណែកយ៉ាងច្រើនក្នុងកិច្ចការសង្គមដូចជាលើវិស័យអប់រំ វិស័យសុខាភិបាលក៏ដូចជាវិស័យបរិស្ថាន និងកីឡា។
លោកថ្លែងថា៖ «ក្រុមហ៊ុន Smart Axiata នឹងបន្តពង្រីកវិសាលភាពរបស់ក្រុមហ៊ុនបន្តទៀតដែលនឹងគ្របដណ្ដប់ទៅតាមទីជនបទនៅទូទាំងប្រទេស»។
ក្រុមហ៊ុន Smart Axiata បានចូលរួមចំណែកជាង ៣៧៤ លានដុល្លារដល់សេដ្ឋកិច្ចកម្ពុជាកាលពីឆ្នាំមុនដែលស្មើនឹង ១,៥ ភាគរយនៃផលិតផលក្នុងស្រុកសរុប។ នេះបើយោងតាមរបាយការណ៍ស្តីពីនិរន្តរភាពឆ្នាំ ២០១៨ របស់ក្រុមហ៊ុនដែលបានចេញផ្សាយកាលពីខែវិច្ឆិកា។
ក្រុមហ៊ុនបានប្តេជ្ញាអនុវត្តគម្រោងដែលជំរុញហេដ្ឋារចនាសម្ព័ន្ធអ៊ីនធឺណិតចល័ត និងការអភិវឌ្ឍធនធានមនុស្សតាមរយៈការបរិច្ចាគថវិកាជាង ៨,៣ លានដុល្លារ ដល់មូលនិធិកាតព្វកិច្ចសេវាកម្មសកលរបស់រដ្ឋាភិបាលក៏ដូចជាមូលនិធិកសាងសមត្ថភាព និងមូលនិធិស្រាវជ្រាវ និងអភិវឌ្ឍន៍៕