ភ្នំពេញ: ធនាគារសហគ្រាសធុនតូច និងមធ្យមកម្ពុជា (SME- Bank) ដែលជាធនាគារគ្រប់គ្រងដោយរដ្ឋបានពង្រីកទុនរហូតដល់ជិត ១៥០ លានដុល្លារដើម្បីផ្តល់នូវឥណទានមានការប្រាក់ទាបក្នុងការជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាពដូចជាផ្នែកកម្មន្តសាល និងសិប្បកម្មកែច្នៃ។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានថ្លែងក្នុងសន្និសីទសារព័ត៌មាននៅទីស្តីការគណៈរដ្ឋមន្ត្រី កាលពីថ្ងៃព្រហស្បតិ៍ថាដើមទុនរបស់ធនាគារ SME បានកើនឡើងពី ១០០ លានដល់ជិត ១៥០ លានដុល្លារនាពេលបច្ចុប្បន្ននេះ។
ធនាគារ SME Bank កើនឡើងដោយសារការចូលរួមទុនរវាងស្ថាប័នរដ្ឋ និងវិស័យឯកជន ដោយភាគីនីមួយៗចូលរួមទុនចំនួន ៥០ ភាគរយដែលស្មើនឹងទឹកប្រាក់ ៥០ លានដុល្លារអាមេរិក និងបានដាក់ឲ្យដំណើរការកាលពីដើមខែមេសា លោកបន្តថា ក្នុងចំណោមទុនជិត ១៥០ លានដុល្លារនោះការបន្ថែមដើមទុនថ្មីពីគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុទាំង ៣៣ ចំនួន $៤៧ លាន ដែលធ្វើឲ្យទុនពីវិស័យឯកជនបានកើនដល់ប្រមាណ ៩៧ លានដុល្លារ។ ធនាគារដែលបន្ថែមទុនធំៗ មាន Prince Bank បានបន្ថែមទុនចំនួន ១០ លានដុល្លារ និង ធនាគារវឌ្ឍនៈបានបន្ថែមទុន ២០ លានដុល្លារ។
លោកថ្លែងថា៖ «បច្ចុបន្ននេះគ្រឹះស្ថានធនាគារ និងគ្រឹះស្ថានមីក្រូហិរញ្ញវត្ថុចំនួន ៣៣ បានបរិច្ចាគប្រាក់ជួយដល់ធនាគារ SME បានរហូតដល់ ៩៧,៥ លានដុល្លារហើយ ដូច្នេះធនាគារ SME យើងមិនមែនមានដើមទុន ១០០ លានដុល្លារទេគឺវាកើនដល់ជិត ១៥០ លានដុល្លារហើយ»។
សហគ្រាសធុនតូច និងមធ្យមអាចខ្ចីប្រាក់ចំនួន ២០ ម៉ឺនដុល្លារ សម្រាប់ទុនបង្វិល និង ៣០ ម៉ឺនដុល្លារសម្រាប់ទុនវិនិយោគ ដែលអត្រាការប្រាក់អតិបរមា ៧ ភាគរយ ក្នុង ១ ឆ្នាំ និងមានរយៈពេលសងត្រឡប់មិនលើសពី ៤ ឆ្នាំ។
លោក តែ តាំងប៉ អះអាងថាបើទោះជាធនាគារ SME នេះមិនទាន់អាចផ្តល់សេវាកម្មដល់អតិថិជននៅពេលនេះ ប៉ុន្តែសហគ្រាសធុនតូច និងមធ្យមអាចធ្វើការដាក់ពាក្យស្នើសុំកម្ចីពីគ្រឹះស្ថានហិរញ្ញវត្ថុទាំង ៣៣ ដែលជាដៃគូសហប្រតិបត្តិការរបស់ធនាគាររបស់រដ្ឋនេះ។
លោកថ្លែងថា៖ «តំណាងឲ្យសមាជិកសហគ្រាសធុនតូច និងមធ្យម ខ្ញុំសូមស្នើឲ្យពង្រីករយៈពេលសងត្រឡប់ឲ្យដល់រយៈពេល ៦ ឆ្នាំដើម្បីឲ្យម្ចាស់សហគ្រាសមានពេលវេលាគ្រប់គ្រាន់»។
លោក សាយ សូនី អនុប្រធាននាយកប្រតិបត្តិនៃគ្រឹះស្ថានមីក្រូហិរញ្ញវត្ថុប្រាសាក់បានឲ្យដឹងក្នុងសេចក្តីប្រកាសព័ត៌មានកាលពីថ្មីៗថា ឥណទានសហហិរញ្ញប្បទានទ្រទ្រង់សហគ្រាសធុនតូច និងមធ្យមគឺជាប្រភេទកម្ចីដែលប្រាសាក់បានចូលរួមសហការជាមួយ SME Bank ដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាព រួមមានផ្នែកកម្មន្តសាល និងសិប្បកម្ម សម្រាប់ជំនួសឲ្យការនាំចូល បម្រើសេចក្តីត្រូវការក្នុងស្រុក និងបង្កើតឱកាសការងារ។
លោកថ្លែងថា៖ «ចំពោះសហគ្រាសធុនតូច និងមធ្យមដែលមានតម្រូវការដើមទុនអាចដាក់ពាក្យស្នើសុំកម្ចីក្រោមគម្រោងសហហិរញ្ញប្បទាននេះនៅគ្រប់សាខាប្រាសាក់ដែលនៅជិតលោកអ្នកបំផុត»។
ទន្ទឹមនឹងនេះធនាគារព្រីនស៍ (PRINCE BANK) ក៏បានប្រកាសចូលរួមក្នុងគម្រោងសហហិរញ្ញប្បទានក្នុងការផ្តល់កម្ចីដល់សហគ្រាសធុនតូច និងមធ្យមនៅកម្ពុជា។ នេះបើតាមចេញក្តីប្រកាសព័ត៌មានចេញផ្សាយកាលពីខែមេសា។
សេចក្តីប្រកាសបានឲ្យដឹងថា៖ «គម្រោងសហហិរញ្ញប្បទាននេះនឹងផ្តល់នូវលទ្ធភាពឲ្យ SME ទទួលបានទុនបន្ថែមសម្រាប់បង្កើនទ្រព្យសកម្ម ឬប្រាក់បង្វិលរបស់ខ្លួន។ សម្រាប់សហគ្រាសធុនតូច និងមធ្យមដែលមិនមានលក្ខណសម្បត្តិគ្រប់គ្រាន់ក្នុងការស្នើសុំតាមរយៈគម្រោងនេះ លោកអ្នកនៅតែអាចដាក់ពាក្យស្នើសុំឥណទានអាជីវកម្មពីធនាគារព្រីនស៍បានដែរ»។
លោក ឈា ឡាយហ៊ី ប្រធាននាយកដ្ឋានសហគ្រាសធុនតូច និងមធ្យមនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា នវានុវត្តន៍បានថ្លែងក្នុងសន្និសីទសារព័ត៌មាននេះថា ការផ្តល់ឥណទានរបស់ធនាគារ SME នេះគឺបានផ្តោតលើវិស័យអាទិភាពសំខាន់ៗរួមមាន វិស័យកម្មន្តសាល សេវាកម្ម កសិកម្ម និងពាណិជ្ជកម្ម។
លោកបានថ្លែងថា៖ «បើទោះជាធនាគារ SME ត្រូវបានដាក់ឲ្យដំណើរការជាផ្លូវការកាលពីដើមខែមេសា ប៉ុន្តែធនាគារនេះមិនទាន់អាចប្រតិបត្តិការភ្លាមៗនោះទេ បើតាមខ្ញុំដឹងធនាគារនេះគ្រោងប្រតិបត្តិការជាផ្លូវការប្រហែលនៅក្នុងខែសីហាខាងមុខនេះ»។
ក្រសួងនេះធ្លាប់ស្ទង់មតិម្ចាស់អាជីវកម្ម ៧១ ដោយរកឃើញថា សហគ្រាសធុនតូច និងមធ្យមត្រូវការជំនួយសម្រាប់ការស្រាវជ្រាវ ការអភិវឌ្ឍសេវា ការវេចខ្ចប់ បច្ចេកវិទ្យា ធនធានមនុស្ស ហិរញ្ញវត្ថុ ការចុះបញ្ជីអាជីវកម្មពន្ធដារ និងការលម្អស្តង់ដាអនាម័យ។
ក្រសួងសេដ្ឋកិច្ច និងហិរញ្ញវត្ថុបានកំណត់ថា សហគ្រាសធុនតូចសំដៅទៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ២៥០ លានរៀល ឬមានចំនួននិយោជិតពី ១០ នាក់ ទៅ ៥០ នាក់។ ចំណែកសហគ្រាសធុនមធ្យមសំដៅដល់សហគ្រាសអាជីវកម្មគ្រប់ប្រភេទដែលមានផលរបរប្រចាំឆ្នាំចាប់ពី ៧០០ លានរៀល ឬមានចំនួននិយោជិតចាប់ពី ៥១ នាក់ដល់ ១០០ នាក់៕