.jpg)
ថ្នាក់ដឹកនាំរបស់សុវណ្ណភូមិឡាយហ្វ៍ ផ្តល់ការធានារ៉ាប់រងដល់អតិថិជនទី ១ ដែលទទួលបានកម្ចីពី SME Bank។ ហ៊ាន រង្សី
ភ្នំពេញៈ ធនាគារសហគ្រាសធុនតូច និងមធ្យមកម្ពុជា (SME bank) ដែលជាធនាគារគ្រប់គ្រងដោយរដ្ឋមានដើមទុន ១០០ លានដុល្លារ សម្រាប់ផ្តល់កម្ចីឲ្យសហគ្រាសខ្នាតតូច និងមធ្យមបានប្រកាសជាផ្លូវការពីការទទួលបានអតិថិជនដំបូងគេចាប់តាំងពីប្រកាសជាផ្លូវការកាលខែមេសា។
អតិថិជនដំបូងគេនេះទទួលបានកម្ចីពីធនាគារកាណាឌីយ៉ា និងទទួលបានការធានារ៉ាប់រងអាជីវកម្មពីក្រុមហ៊ុនធានារ៉ាប់រងសុវណ្ណភូមិឡាយហ្វ៍នៅក្នុងគោលបំណងដើម្បីពង្រីកអាជីវកម្មដំឡើងរ៉ឺម៉កកង់បីឲ្យបានទូទាំងប្រទេស។
លោក Dexter Tan អគ្គនាយកធនាគារ SME Bank បានថ្លែងថា សហហិរញ្ញប្បទាននឹងជួយផ្តល់ភាពងាយស្រួលដល់សហគ្រាសធុនតូច និងមធ្យមនៅកម្ពុជាទទួលបានកម្ចីពង្រីកអាជីវកម្មរបស់ពួកគេ។
លោកបានថ្លែងថា៖ «នេះជាអតិថិជនលើកដំបូងរបស់យើង ហើយវាចាំបាច់ណាស់ដែលអតិថិជនត្រូវមានការធានារ៉ាប់រងអាជីវកម្មដើម្បីស្ថិរភាពអាជីវកម្មរបស់ពួកគេ។ អ្វីដែលអតិថិជនទទួលបាននៅពេលនេះវាជាគំរូសម្រាប់ឲ្យធនាគារផ្សេងទៀតត្រូវបង្កើតឲ្យការធានារ៉ាប់រងអាជីវកម្មនៃឥណទានរបស់ពួកគាត់»។
លោកបន្តថា រហូតមកដល់ពេលនេះធនាគារសហគ្រាសធុនតូច និងមធ្យមកម្ពុជាបានបញ្ចេញប្រាក់កម្ចីប្រមាណ ១០ ភាគរយ នៃដើមទុនសរុបទៅឲ្យសហគ្រាសធុនតូច និងមធ្យម។ លោកថ្លែងថា៖ «ខ្ញុំសង្ឃឹមថា សហហិរញ្ញប្បទានអាចនឹងបញ្ចេញអស់នៅចុងឆ្នាំនេះ»។
មូលនិធិក្រោមគម្រោងសហហិរញ្ញប្បទាននេះមានទំហំទឹកប្រាក់ ១០០ លានដុល្លារ ដែលជាសហហិរញ្ញប្បទានបដិភាគស្មើគ្នារវាង SME bank ជាមួយនឹងគ្រឹះស្ថានធនាគារ និងមីក្រូហិរញ្ញវត្ថុចំនួន ៣៣ រួមមាន ធនាគារពាណិជ្ជចំនួន ២៣ ធនាគារឯកទេស ២ គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ ៥ និងគ្រឹះស្ថានមីក្រូហិរញ្ញវត្ថុចំនួន ២។
សហគ្រាសធុនតូច និងមធ្យមអាចខ្ចីប្រាក់ចំនួន ២០ ម៉ឺនដុល្លារ សម្រាប់ទុនបង្វិល និងចំនួន ៣០ ម៉ឺនដុល្លារ សម្រាប់ទុនវិនិយោគដែលមានអត្រាការប្រាក់អតិបរមា ៧ ភាគរយក្នុង ១ ឆ្នាំ និងមានរយៈពេលសងត្រឡប់ក្នុងរយៈពេល ៧ ឆ្នាំ។
លោក Raymond Sia Say Guan អគ្គនាយកធនាគារកាណាឌីយ៉ាបាននិយាយថា ធនាគារមានសេចក្តីរីករាយដែលបានផ្តល់កម្ចីឲ្យអតិថិជនដំបូងរបស់ខ្លួន ដើម្បីពង្រីកអាជីវកម្មរបស់គេឲ្យកាន់តែរីកចម្រើនថែមទៀត។ លោកបន្តថា គោលដៅរបស់ធនាគារកាណាឌីយ៉ា គឺនៅតែបន្តគាំទ្រផ្តល់កម្ចីឲ្យសហគ្រាសធុនតូច និងមធ្យមនៅកម្ពុជា ទោះបីជាក្នុងអំឡុងពេលប្រទេសកម្ពុជាជួបវិបត្តិសេដ្ឋកិច្ចក៏ដោយ។
លោកបន្ថែមថា៖ «យើងមានមោទនភាពដែលធនាគារយើងបានផ្តល់កម្ចីឲ្យប្រជាជនកម្ពុជា។ ទោះជាសេដ្ឋកិច្ចថមថយដោយសារវិបត្តិសុខភាពសកលនេះក៏ដោយ ធនាគារយើងនៅតែរក្សាស្ថិរភាពប្រាក់កម្ចីដល់អតិថិជន ដើម្បីពង្រីកអាជីវកម្មឲ្យរីកចម្រើន»។
លោក Tan Jiak Hiang អគ្គនាយកប្រតិបត្តិនៃក្រុមហ៊ុនធានារ៉ាប់រងអាយុជីវិតសុវណ្ណភូមិ ឡាយហ្វ៍ បានថ្លែងថា នេះជាកិត្តិយសណាស់សម្រាប់សុវណ្ណាភូមិឡាយហ្វ៍ ក្នុងការចូលរួមគាំទ្រគំនិតផ្តួចផ្តើមលើគម្រោងហិរញ្ញប្បទានទ្រទ្រង់សហគ្រាសធុនតូច និងមធ្យមតាមរយៈការផ្តល់បណ្ណសន្យារ៉ាប់រងនៃផលិតផលធានារ៉ាប់រងអាយុជីវិតលើឥណទាន ដើម្បីការពារដល់អតិថិជនឥណទានសហគ្រាសធុនតូច និងមធ្យមដំបូង។
លោកបន្តថា ជាក់ស្តែងផលិតផលនេះត្រូវបានបង្កើតឡើងជាពិសេសសម្រាប់ម្ចាស់អាជីវកម្ម និងម្ចាស់ឥណទានទាំងអស់ដោយផ្តល់ការធានាដល់អតិថិជនជាមួយនឹងការធានាកម្មសិទ្ធិភាពលើទ្រព្យបញ្ចាំ។
លោកថ្លែងថា៖ «ក្នុងករណីមានគ្រោះអកុសលកើតឡើងក្នុងអំឡុងពេលជាប់កម្ចីនោះ សុវណ្ណាភូមិ ឡាយហ្វ៍ នឹងធានាសងប្រាក់កម្ចីដែលនៅសល់ទាំងអស់ទៅធនាគារដោយផ្ទាល់ ដូច្នេះបន្ទុកហិរញ្ញវត្ថុនឹងមិនប៉ះពាល់ដល់គ្រួសារលោកអ្នកនោះទេ។ យើងពិតជាមានមោទនភាពក្នុងការផ្តល់ជូននូវបណ្ណសន្យារ៉ាប់រងដំបូងនៃផលិតផលធានារ៉ាប់រងអាយុជីវិតលើឥណទាន ក្រោមគម្រោងសហហិរញ្ញប្បទាននេះ»៕ LA
