ភ្នំពេញៈ ក្រុមហ៊ុន Socfin Cambodia ជាក្រុមហ៊ុនឈានមុខគេក្នុងការអភិវឌ្ឍ និងគ្រប់គ្រងចម្ការកៅស៊ូ បានប្រកាសពីការសម្រេចបាននៃភាពទទួលខុសត្រូវសង្គមចំពោះសាជីវកម្មរបស់ខ្លួនឆ្នាំ ២០១៨ (CSR) ដែលជាការអនុវត្តអាជីវកម្មប្រកបដោយនិរន្តរភាព និងសុចរិតភាព។ នេះបើយោងតាមសេចក្តីប្រកាសព័ត៌មានរបស់ក្រុមហ៊ុន។
ក្រុមហ៊ុន Socfin Cambodia ដែលជាផ្នែកមួយនៃក្រុមហ៊ុន Socfin Group បានប្រតិបត្តិការនៅកម្ពុជាតាមរយៈក្រុមហ៊ុន ២ គឺក្រុមហ៊ុន Socfin-KCD និងក្រុមហ៊ុន Coviphama ដែលគ្រប់គ្រងចម្ការកៅស៊ូនៅឃុំប៊ូស្រា ស្រុកពេជ្រាដា ខេត្តមណ្ឌលគិរី។
ក្រុមហ៊ុននេះឲ្យដឹងថា ភាពជោគជ័យនៅក្នុងគំនិតផ្ដួចផ្ដើម CSR ឆ្នាំ ២០១៨រ បស់ខ្លួន គឺឆ្លុះបញ្ចាំងដោយផ្ទាល់ពីការរីកចម្រើនរបស់ក្រុមហ៊ុនក្នុងការសម្រេចបានទិសដៅ CSR រយៈពេលវែង ដែលរួមមានការចូលរួមជាមួយសហគមន៍ជនជាតិដើមភាគតិចព្នងនៅក្នុងខេត្តមណ្ឌលគិរី ការការពារ និងការគ្រប់គ្រងបរិស្ថាន និងការគាំទ្រការអភិវឌ្ឍក្នុងស្រុក។
ក្រុមហ៊ុនដែលសកម្មនៅក្នុងការអភិវឌ្ឍ និងការគ្រប់គ្រងចម្ការកៅស៊ូនៅកម្ពុជាមួយនេះ តែងតែបានខិតខំយ៉ាងខ្លាំងក្នុងការអភិវឌ្ឍការទទួលខុសត្រូវ និងដំណោះស្រាយប្រកបដោយស្ថិរភាពចំពោះអាជីវកម្ម ការបង្កើត និងការចែករំលែកទ្រព្យសម្បត្តិ ការជំរុញឲ្យមានការអភិវឌ្ឍរយៈពេលវែងនៅក្នុងសេដ្ឋកិច្ចក្នុងស្រុក និងការអភិវឌ្ឍជំនាញថ្មីៗនៅក្នុងស្រុក។ នេះបើយោងតាមសេចក្តីប្រកាសព័ត៌មាន។
លោក Jef Boedt អ្នកគ្រប់គ្រងទូទៅនៅក្រុមហ៊ុន Socfin Cambodia បានឲ្យដឹងថា ក្រុមហ៊ុននេះមានមោទនភាពក្នុងការបន្តជួយពង្រឹង និងកែលម្អការអនុវត្តអាជីវកម្ម ការផ្ដល់អត្ថប្រយោជន៍ដល់ប្រជាជន និងសហគមន៍។
លោក Jef Boedt បានថ្លែងថា៖ «ការផ្ដោតរបស់យើងលើ CSR បញ្ជាក់ជាថ្មីពីការប្ដេជ្ញាចិត្តរបស់យើងចំពោះសហគមន៍ ដែលយើងប្រតិបត្តិការ និងបង្ហាញពីកិច្ចខិតខំប្រឹងប្រែងជាបន្តរបស់យើង ដើម្បីកែលម្អជីវភាពរស់នៅ»។
លោកបន្តថា៖ «យើងនឹងបន្តចែករំលែកតម្លៃ ដែលយើងបង្កើតឡើង ដើម្បីផ្ដល់អត្ថប្រយោជន៍ដល់សហគមន៍មូលដ្ឋាន និងដើម្បីអភិវឌ្ឍអាជីវកម្មរបស់យើងក្នុងលក្ខណៈប្រកបដោយស្ថិរភាព»។
ឧស្សាហកម្មកៅស៊ូរបស់កម្ពុជាបាននឹងកំពុងអភិវឌ្ឍយ៉ាងខ្លាំងក្នុងរយៈចុងក្រោយនេះ។
កម្ពុជាបាននាំចេញកៅស៊ូស្ងួត ២១៧ ៥០០ តោន កាលពីឆ្នាំមុន កើនឡើងប្រហែល ១៥ ភាគរយ ធៀបនឹងឆ្នាំ ២០១៧ ជាមួយតម្លៃជាមធ្យម ១ ៣១៩ ដុល្លារ ក្នុង ១តោន។ នេះបើយោងតាមរបាយការណ៍របស់ក្រសួងកសិកម្ម។
របាយការណ៍បង្ហាញថា នៅក្នុងរយៈពេល ៣ ខែដំបូងឆ្នាំនេះ កម្ពុជាបាននាំចេញកៅស៊ូចំនួន ៤៨ ១៩២ តោន កើនឡើង ២៣ ភាគរយ ធៀបនឹងរយៈពេលដូចគ្នាកាលពីឆ្នាំមុន ជាមួយនឹងតម្លៃជាមធ្យម ១ ២៧៩ ដុល្លារក្នុង ១ តោន កើនឡើង ១២ ភាគរយ។
បង្កើតឡើងនៅឆ្នាំ ១៩០៩ ក្រុមហ៊ុន Socfin Group ជាក្រុមហ៊ុនគ្រប់គ្រង និងអភិវឌ្ឍដំណាំដូងប្រេង និងចម្ការកៅស៊ូយ៉ាងសកម្ម។
បច្ចុប្បន្នមាននៅក្នុងប្រទេសចំនួន ៨ នៅអាហ្រ្វិកកណ្ដាល និងអាហ្វ្រិកខាងលិច ព្រមទំាងប្រទេស ២ ទៀតក្នុងតំបន់អាស៊ីអាគ្នេយ៍៕LA