ភ្នំពេញ: រដ្ឋមន្ត្រីក្រសួងកសិកម្មគាំទ្រឲ្យស្ថាបនិកក្រុមហ៊ុន Supper App Technology Plc ដែលបានបង្កើតកម្មវិធីតាមទូរស័ព្ទដៃឈ្មោះ «Supper App»រួមចំណែកផ្សព្វផ្សាយផលិតផលកសិកម្ម ដោយសហការជាមួយមន្ត្រីក្រសួងដើម្បីលើកស្ទួយការផ្សព្វផ្សាយនៅលើទីផ្សារឌីជីថល។
លោក វេង សាខុន រដ្ឋមន្ត្រីកសិកម្ម រុក្ខាប្រមាញ់ និងនេសាទបានឲ្យដឹងថា ក្រសួងកសិកម្មមានគេហទំព័រមួយចំនួនដូចជា www.maff.gov.kh គេហទំព័រ camagrimarket គេហទំព័រ khmeragri.info និង amish.org.kh ដែលសុទ្ធតែជាបណ្តាញព័ត៌មានស្តីអំពីកសិកម្ម និងទីផ្សារកសិផល ប៉ុន្តែវាមិនទាន់ក្លាយជាភ្នាក់ងារភ្ជាប់រវាងអ្នកផលិត និងអ្នកប្រើប្រាស់នៅឡើយទេ។
លោកថ្លែងថា៖ «ខ្ញុំសូមស្វាគមន៍ និងគាំទ្រហើយណែនាំឲ្យក្រុមហ៊ុនទាក់ទងជាមួយមជ្ឈមណ្ឌលព័ត៌មាន និងឯកសារកសិកម្មកម្ពុជាព្រមទាំងមន្ត្រីគម្រោងកម្មវិធីផ្សេងដែលទាក់ទងវិស័យកសិកម្មដើម្បីពិភាក្សាលម្អិតមុនឈានទៅចុះកិច្ចសន្យាអនុវត្តកម្មវិធីនេះ»។
ក្រោយពីជំនួបជាមួយរដ្ឋមន្ត្រីកាលពីថ្ងៃអង្គារលោក ប៉ាត់ ចំណាន ស្ថាបនិកក្រុមហ៊ុន Supper App Technology Plc ប្រាប់ភ្នំពេញប៉ុស្តិ៍ថា ក្រុមហ៊ុនលោកចង់សហការជាមួយគេហទំព័រទីផ្សារកសិកម្ម (CamAgri Market) របស់ក្រសួងកសិកម្ម ដើម្បីអាចឲ្យក្រុមហ៊ុនទាញយករាល់ផលិតផលកសិកម្មពីគេហទំព័រខាងលើនេះមកដាក់លក់លើទីផ្សារអេឡិចត្រូនិករបស់ក្រុមហ៊ុនលោក។
លោកនិយាយថា៖ «Flotform យើងងាយស្រួលត្រង់ថា នៅពេលគាត់លក់ផលិតផលហើយ ពួកគាត់អាចទទួលបានសេវាកម្មដឹកជញ្ជូន និងការទូទាត់ប្រាក់នៅក្នុងកម្មវិធី App នោះ»។ LA