ភ្នំពេញៈ TADA ជាប្រតិបត្តិករកក់ការធ្វើដំណើររបស់ប្រទេសកូរ៉េខាងត្បូង កាលពីថ្ងៃព្រហស្បតិ៍បានប្រកាសពីការវិនិយោគជាយុទ្ធសាស្ដ្រពី Shinhan ដែលជាធនាគារឈានមុខគេរបស់កូរ៉េខាងត្បូងក្នុងការទទួលប្រាក់វិនិយោគទុនបន្ត Series A ដើម្បីពង្រីកអាជីវកម្មរបស់ខ្លួន។
សេចក្តីប្រកាសព័ត៌មានរបស់ក្រុមហ៊ុនបានឲ្យដឹងថា ហិរញ្ញប្បទានបានពីការវិនិយោគនេះនឹងត្រូវប្រើប្រាស់ដើម្បីពង្រីកទីផ្សាររបស់ក្រុមហ៊ុន MVL ក៏ដូចជាការអភិវឌ្ឍប្រព័ន្ធអេកូចល័ត ដែលបង្កើតឡើងនៅលើបច្ចេកវិទ្យា Blockchain របស់ MVL។ ការវិនិយោគនេះនឹងធ្វើឲ្យ MVL អាចមានលទ្ធភាពបង្កើនទុនពីការពង្រីកផ្សាររបស់កម្មវិធី TADA ដែលជាផលិតផលធ្វើដំណើរមិនកាត់កម្រៃជើងសារបស់ខ្លួនទាំងអ្នកបើកបរ និងអ្នកជិះ។
លោក Kay Woo នាយកប្រតិបត្តិរបស់ MVL បានថ្លែងថា៖ «ជាមួយការវិនិយោគនេះ យើងនឹងអាចបន្តបេសកកម្មក្នុងការបង្កើតប្រព័ន្ធអេកូចល័តមួយប្រកបដោយនិរន្តរភាព និងមានភាពប្រសើរជាងមុន»។
លោកបន្តថា៖ «ថ្មីៗនេះយើងក៏បានបើកដំណើរការនូវសេវាកម្មដឹកជញ្ជូន TADA នៅប្រទេសកម្ពុជា ដើម្បីជួយសម្រួលដល់អាជីវកម្ម និងអ្នកបើកបររបស់យើងដែលបានទទួលរងផលប៉ះពាល់ពីការវាយលុកនៃវីរុសកូវីដ១៩។ នេះជាអ្វីដែលយើងចង់បង្ហាញថា យើងអាចប្រើបច្ចេកវិទ្យាមួយបាន»។
អ្នកនាំពាក្យរបស់ធនាគារ Shinhan បានឲ្យដឹងថា ប្រព័ន្ធចល័តលើបច្ចេកវិទ្យា Blockchain របស់ MVL មានការរីកចម្រើនយ៉ាងខ្លាំងសម្រាប់អ្នកប្រើប្រាស់នៅអាស៊ីអាគ្នេយ៍ក្នុងរយៈពេល ៣ ឆ្នាំកន្លងមក។
MVL ជាប្រព័ន្ធអេកូចល័តដែលមានមូលដ្ឋានលើបច្ចេកវិទ្យា Blockchain។ ក្រុមហ៊ុនកំពុងជំរុញឲ្យមានការផ្លាស់ប្តូរទ្រង់ទ្រាយធំមួយតាមរយៈសេវាកម្មកក់ការធ្វើដំណើរដែលមិនកាត់កម្រៃជើងសាដំបូងបង្អស់នៅអាស៊ីអាគ្នេយ៍ គឺកម្មវិធី TADA ដែលមានអ្នកបើកបរជាង ៨,១ ម៉ឺននាក់ និងអ្នកប្រើ ៥៥ ម៉ឺននាក់នៅប្រទេសសិង្ហបុរី វៀតណាម និងកម្ពុជា៕LA