ភ្នំពេញៈ ក្រុមហ៊ុន Tanncam Investment Co. Ltd ជាក្រុមហ៊ុនវិនិយោគមានមូលដ្ឋាននៅកម្ពុជា ខាងការគ្រប់គ្រងផ្នែកការថែរក្សាសុខភាព ពាណិជ្ជកម្មអេឡិចត្រូនិក ការពិគ្រោះយោបល់ អាហារ និងភេសជ្ជៈ បានទិញភាគហ៊ុន ៦៥ ភាគរយនៅក្នុងក្រុមហ៊ុន Vibe Café Hospitality ។ នេះបើយោងតាមសេចក្ដីប្រកាសព័ត៌មានកាលពីថ្ងៃចន្ទ។
Vibe Café Hospitality ជាក្រុមហ៊ុនភោជនីយដ្ឋានអាហារបួស និងអាហារសុខភាពឈានមុខគេរបស់កម្ពុជា មានភោជនីយដ្ឋាន ២ នៅទីក្រុងភ្នំពេញ និងមួយទៀតនៅសៀមរាប។
ក្រៅពីភោជនីយដ្ឋានអ្នកតមសាច់ និងអាហារសុខភាព Vibe Café ក៏ជាក្រុមហ៊ុនចែកចាយទំនិញដុំ នៃផលិតផលជាកម្មសិទ្ធិរបស់ខ្លួន ជាក្រុមហ៊ុនផ្គត់ផ្គង់ឱសថថែរក្សាមុខផងដែរ។
ពេលថ្មីៗនេះក្រុមហ៊ុនក៏បានឈានជើងចូលទៅក្នុងអាជីវកម្មពិគ្រោះយោបល់ផ្នែកយីហោពាណិជ្ជសញ្ញា និងភោជនីយដា្ឋនផងដែរ។ ទោះបីយ៉ាងនេះក្តីក្នុងកិច្ចព្រមព្រៀងនេះ មិនបានបង្ហាញតម្លៃជាទឹកប្រាក់នៃការទិញភាគហ៊ុននេះទេ។
ក្រុមហ៊ុន Cambodian Investment Management គឺជាអ្នករៀបចំ និងជាអ្នកប្រឹក្សាយោបល់ផ្នែកហិរញ្ញវត្ថុតែមួយគត់ស្ដីពីកិច្ចព្រមព្រៀងនេះ ដែលបានបញ្ចប់កាលពីថ្ងៃ ៩ ខែ មិថុនា។
លោកស្រី Emma Fountain ស្ថាបនិកក្រុមហ៊ុននេះ នឹងរក្សាទុកការគ្រប់គ្រង ៣១ ភាគរយ និងនៅតែធ្វើជាអគ្គនាយកក្រុមហ៊ុន។ លោកស្រីថ្លែងថា៖ «ឧស្សាហកម្មអាហារសុខភាពពិភពលោក កំពុងរីកចម្រើន ដោយសារប្រជាជនកំពុងទទួលយកទម្លាប់ការញាំអាហារសុខភាព មិនគ្រាន់តែសម្រាប់សុខភាពរាងកាយ និងផ្លូវចិត្ត ការគ្រប់គ្រងទម្ងន់ និងសម្រាប់របបអាហារបំប៉នកាន់តែប្រសើរមួយប៉ុណ្ណោះទេ ប៉ុន្តែថែមទាំងការរស់នៅបានយូរ និងគេចផុតពីជំងឺរ៉ាំរ៉ៃ ដូចជាជំងឺទឹកនោមផ្អែម និងមហារីក»។
ជាផ្នែកមួយនៃកិច្ចព្រមព្រៀងនេះ ក្រុមហ៊ុន Tanncam នឹងចាក់បញ្ចូលមូលធនបន្ថែម ដើម្បីបង្កើនល្បឿនឱកាសយីហោពាណិជ្ជសញ្ញា។ នេះបើយោងតាមលោកស្រី Fountain។
លោកស្រីថ្លែងថា៖ «យើងបានបង្កើត និងអភិវឌ្ឍអាជីវកម្មអាហារសុខភាពដែលទទួលបានជោគជ័យមិនគួរឲ្យជឿនៅក្នុងប្រទេស កម្ពុជា ជាមួយនឹងរយៈពេលសងប្រាក់គួរឲ្យទាក់ទាញ ភាពស្មោះត្រង់របស់អតិថិជន និងប្រាក់ចំណេញផ្នែកហិរញ្ញវត្ថុដ៏រឹងមាំ»។ លោកស្រីបន្តថា៖ «ជាមួយនឹងការគាំទ្ររបស់ Tanncam យើងមានឱកាសដ៏អស្ចារ្យមួយ ដើម្បីពង្រីកគំរូទូទាំងពិភពលោកតាមរយៈយីហោពាណិជ្ជសញ្ញា»។
លោក Anthony Galliano អគ្គនាយក Cambodian Investment Management បានឲ្យដឹងថា អាហារសុខភាព និងអ្នកតមសាច់ មិនមែនជាចំណែកទីផ្សារពិសេសមួយទៀតហើយវាជាឧស្សាហកម្មដែលមានប្រាក់ពាន់ពាន់លានដុល្លារ។
លោកបានលើកឡើងថា៖ «ក្រុមហ៊ុននេះនឹងចែកចាយអាហារសុខភាពរបស់ខ្លួនតាមរយៈបណ្ដាញផ្សារទំនើបលក់រាយ និងពង្រីកហាងភោជនីយដ្ឋានរបស់ខ្លួនទូទាំងពិភពលោក ដែលទាញយកផលចំណេញពីនិន្នាការនេះ»។
នេះគឺជាការវិនិយោគដំបូងរបស់ក្រុមហ៊ុន Tanncam Investment ក្នុងឧស្សាហកម្មអាហារ និងភេសជ្ជៈ។នេះបើតាមសេចក្តីប្រកាស៕LA