.jpg)
ក្រុងហុងកុងៈ ក្រុមហ៊ុនផលិតរថយន្តអគ្គិសនី Tesla របស់អាមេរិក បានបើកដំណើរការជាផ្លូវការនូវស្ថានីយបញ្ចូលអគ្គិសនីរថយន្តថ្មីរបស់ខ្លួននៅទីក្រុងហុងកុង ដែលជាស្ថានីយធំជាងគេរបស់ខ្លួននៅអាស៊ី។ នេះបើយោងតាមកាសែត South China Morning Post រាយការណ៍កាលពីថ្ងៃចន្ទ។
ចំណតរថយន្ត ២ ជាន់ ដែលមានទីតាំងនៅអគារខ្ពស់ FTLife នៅឈូងសមុទ្រ Kowloon Bay ទីក្រុងហុងកុង ដែលមានផ្ទៃសរុប ៤ ៥៦៤ ម៉ែត្រការ៉េ ត្រូវបានដំឡើងជាមួយនឹងឧបករណ៍តភ្ជាប់របស់ក្រុមហ៊ុន Tesla ចំនួន ៥០ ដែលធ្វើឲ្យវាមានលទ្ធភាពបញ្ចូលអគ្គិសនី រហូតដល់ ៧ គីឡូវ៉ាត់ក្នុង ១ ម៉ោង។
ទីតាំងចំណតមាន ១២២ កន្លែងនៅក្នុងស្ថានីយបញ្ចូលអគ្គិសនីរថយន្តថ្មីនេះ។ តម្លៃចតសម្រាប់រថយន្តទាំងអស់គឺ ២៨ ដុល្លារហុងកុងក្នុង ១ ម៉ោង ដោយមិនមានការគិតតម្លៃសម្រាប់ការបញ្ចូលអគ្គិសនីទេ។
យោងតាមការរាយការណ៍របស់កាសែតនេះ ក្រុមហ៊ុន Tesla បានឲ្យដឹងថា ពួកគេ «មានមោទនភាពក្នុងការមានទីក្រុងហុងកុង ជាទីតាំងសម្រាប់ស្ថានីយមួយក្នុងចំណោមស្ថានីយជាទិសដៅធំៗជាច្រើនរបស់ពិភពលោក ដែលជាផ្នែកមួយនៃការប្ដេជ្ញាចិត្តរយៈពេលវែងរបស់យើង ចំពោះម្ចាស់រថយន្តនៅទីក្រុងហុងកុង»។
ថា្នក់គ្រប់គ្រងរបស់អគារ FT Life Tower បានឲ្យដឹងថា វាមានមោទនភាពក្នុងការធ្វើជាផ្នែកមួយនៃបេសកកម្មប្រកបដោយចីរភាពរបស់ក្រុមហ៊ុន Tesla ដោយថ្លែងថា ពួកគេរំភើបក្នុងការធ្វើជាផ្នែកមួយនៃបណ្ដាញនេះ៕ P.Daily/LA
