ភ្នំពេញ: ក្រុមហ៊ុនអាកាសចរណ៍ Thai Airways International (THAI) នឹងបញ្ឈប់សេវាហោះហើរមកកម្ពុជា ដោយតែមិនអាចប្រកួតប្រជែងតម្លៃជាមួយអាកាសចរណ៍តម្លៃទាបផ្សេងទៀត។ នេះបើតាមប្រធានក្រុមហ៊ុនដែលបានផ្តល់បទសម្ភាសន៍ដល់កាសែត The Nation ចេញផ្សាយកាលពីថ្ងៃចន្ទ។
ទោះបីយ៉ាងនេះក្តីក្រុមហ៊ុននឹងដាក់ជំនួសមកវិញនូវសេវាអាកាសចរណ៍ Thai Smile Airway ដែលជាបុត្រសម្ព័ន្ធរបស់ខ្លួន។
លោក Sumeth Damrongchaitham ប្រធានក្រុមហ៊ុនអាកាសចរណ៍ Thai Airways International(THAI) បានឲ្យដឹងកាលពីថ្ងៃចន្ទថា ក្រុមហ៊ុនអាកាសចរណ៍ THAI កំពុងពិនិត្យមើលការបិទផ្លូវហោះហើរចំនួន ៦ ក្នុងប្រទេសនៅតំបន់ឥណ្ឌូចិនរួមមានប្រទេស កម្ពុជា ឡាវ វៀតណាម និងមីយ៉ាន់ម៉ា។
ផ្លូវហោះហើរទាំងអស់នោះ គឺហោះចេញពីព្រលានយន្តហោះសុវណ្ណភូមិក្នុងទីក្រុងបាងកកឆ្ពោះទៅទីក្រុងភ្នំពេញ វៀងចន្ទន៍ ហ្លួងព្រះបាង ហាណូយ ហូជីមីញ និងយ៉ាំងហ្គោន។
ទោះបីជាយ៉ាងនេះក្តីលោក Sumeth Damrongchaitham បានឲ្យដឹងថា ផ្លូវហោះហើរទាំងនោះដែលមានចំនួនជើងតិច និងអតិថិជនទាបនឹងត្រូវជំនួសវិញដោយក្រុមហ៊ុន Thai Smile Airways ដែលជាបុត្រសម្ព័ន្ធខ្លួន។
លោក Sumeth បានពន្យល់ថា ភាពប្រកួតប្រជែងបានក្លាយទៅកាន់តែអាក្រក់ ដោយក្រុមហ៊ុនអាកាសចរណ៍ទាំងអស់បានទម្លាក់តម្លៃដើម្បីរក្សាភាពប្រកួតប្រជែងរបស់ខ្លួន។ លោកបន្តថា៖ «ក្រុមហ៊ុនអាកាសចរណ៍ THAI ត្រូវការកែសម្រួលយុទ្ធសាស្ត្រ ដើម្បីការពារអត្រាអតិថិជនរបស់យើង។ យើងនឹងផ្តោតលើការចាប់ផ្តើមយុទ្ធនាការផ្សព្វផ្សាយពាណិជ្ជកម្មរហូតដល់ចុងឆ្នាំនេះ»។
អ្នកនៅក្នុងវិស័យនេះបានឲ្យដឹងថា នេះជាយុទ្ធសាស្ត្ររបស់ក្រុមហ៊ុនក្នុងការប្រកួតប្រជែងក្នុងទីផ្សារដ៏ចង្អៀតនេះ។
លោក ខែក នរិន្ទដា នាយកផ្នែកទំនាក់ទំនង និងទំនាក់ទំនងសាធារណៈនៃក្រុមហ៊ុន Cambodian Airport បានប្រាប់ភ្នំពេញប៉ុស្តិ៍តាមអ៊ីមែលថា ការផ្លាស់ប្តូរទៅក្រុមហ៊ុនអាកាសចរណ៍ Thai Smile Airways ជាបុត្រសម្ព័ន្ធរបស់ខ្លួនត្រូវបានធ្វើឡើងចាប់តាំងពីឆ្នាំ ២០១៦។
លោកបានថ្លែងថា៖ «វាជារឿងធម្មតាសម្រាប់ក្រុមហ៊ុនអាកាសចរណ៍ធំៗ ដើម្បីប្រតិបត្តិការផ្លូវហោះហើរក្នុងតំបន់ដែលមានចម្ងាយជិត និងមធ្យមដោយប្រើក្រុមហ៊ុនបុត្រសម្ព័ន្ធរបស់ពួកគេក្នុងការបម្រើសេវាកម្មកាន់តែប្រសើរដល់អ្នកដំណើរ ពិសេសតម្លៃសំបុត្រ និងការចំណាយប្រកបដោយប្រសិទ្ធភាព»។
លោក តុប សុភ័ក អ្នកនាំពាក្យក្រសួងទេសចរណ៍បានឲ្យដឹងថា ការផ្លាស់ប្តូរនេះគ្រាន់តែជាយុទ្ធសាស្ត្ររបស់ក្រុមហ៊ុនប៉ុណ្ណោះ។ លោកបានបន្តថា៖ «ក្រុមហ៊ុន Thai Smile និងក្រុមហ៊ុន THAI ទាំង ២ នេះអាចជំនួសគ្នាបាន ដូច្នេះវាមិនមានការប៉ះពាល់ដល់វិស័យទេសចរណ៍យើងទេ»។
ទីប្រឹក្សាសមាគមទីភ្នាក់ងារទេសចរណ៍កម្ពុជាលោក ហូ វណ្ឌី បានឲ្យដឹងថា ការសម្រេចបិទផ្លូវហោះហើរសម្រាប់ក្រុមហ៊ុន THAI ហើយជំនួសវិញដោយក្រុមហ៊ុន Thai Smile Airways គឺជាវិធីសាស្ត្ររបស់ក្រុមហ៊ុនក្នុងការប្រកួតប្រជែងក្នុងទីផ្សារនេះ។
លោកថ្លែងថា៖ «យើងឃើញថាយុទ្ធសាស្ត្រគឺជាការប្រកួតប្រជែងតម្លៃនៅលើទីផ្សារដែលកាន់តែមានខ្លាំងជាងមុន»។
លោកបន្ថែមថា ក្រុមហ៊ុនអាកាសចរណ៍មួយចំនួននៅកម្ពុជាធ្លាប់បានអនុវត្តរួចមកនូវវិធីសាស្ត្រដូចគ្នានេះ។
លោកបន្តថា៖ «ស្ថានភាពទីផ្សារអាកាសចរណ៍នៅស្រុកយើងមានការរីកចម្រើនខ្លាំងកាលពីមុនយើងមានជាង ១០ ក្រុមហ៊ុន តែបច្ចុប្បន្នកើនឡើងរហូតដល់ជាង ៤០ ក្រុមហ៊ុន ដូច្នេះការវិនិយោគលើការដឹកជញ្ជូនតាមផ្លូវអាកាសមានការរីកចម្រើនខ្លាំង»។
តាមទិន្នន័យក្រសួងទេសចរណ៍ក្នុងរយៈពេល ៨ ខែ ឆ្នាំ ២០១៩ កម្ពុជាទទួលបានភ្ញៀវទេសចរសរុប ៤,៣៦ លាននាក់ កើនឡើង ១០,៤ ភាគរយ បើធៀបរយៈពេលដូចគ្នាឆ្នាំ ២០១៨។ ក្នុងនោះភ្ញៀវទេសចរថៃមានចំនួន ២៣៤ ៤៥១ នាក់ កើនឡើង ១១,២ ភាគរយ បើធៀបនឹងរយៈពេលដូចគ្នាកាលពីឆ្នាំមុន៕ LA