The Phnom Penh Post Search

Search form




Logo of Phnom Penh Post newspaper Phnom Penh Post - Toll ចាកចេញ​ពី​គម្រោង​ផ្លូវដែក​នៅ​កម្ពុជា

Toll ចាកចេញ​ពី​គម្រោង​ផ្លូវដែក​នៅ​កម្ពុជា

សកម្មភាព​នៃ​ការ​ជួសជុល​ផ្លូវដែក​ឡើង​វិញ​របស់​ក្រុមហ៊ុន Toll Royal ។
សកម្មភាព​នៃ​ការ​ជួសជុល​ផ្លូវដែក​ឡើង​វិញ​របស់​ក្រុមហ៊ុន Toll Royal ។ ប៉ុស្តិ៍

Toll ចាកចេញ​ពី​គម្រោង​ផ្លូវដែក​នៅ​កម្ពុជា

ភ្នំពេញៈ Toll Group ជា​ក្រុមហ៊ុន​ដឹកជញ្ជូន​ចុះបញ្ជី​ក្នុង​ផ្សារហ៊ុន​អូស្ដ្រាលី​បាន​លក់​ភាគហ៊ុន​ខ្លួន​ក្នុង​គម្រោង​ផ្លូវដែក​ជាតិ​របស់​កម្ពុជា។

សេចក្ដី​ប្រកាស​ព័ត៌មាន​ព្រាង​របស់​ក្រុមហ៊ុន Toll Group បាន​ចុះ​កាលបរិចេ្ឆទ​កាលពី​ម្សិលមិញ​ឲ្យ​ដឹង​ថា កាលពី​ថ្ងៃ​សុក្រ​ក្រុមហ៊ុន Toll Group បាន​លក់​ភាគហ៊ុន​៥៥​ភាគរយ​របស់​ខ្លួន​នៅក្នុង​គម្រោង​សម្បទាន​ក្រុមហ៊ុន Toll Royal Railway ឲ្យ​ទៅ Royal Group ជា​ក្រុមហ៊ុន​ដៃគូ​វិនិយោគ​រួម​របស់​ខ្លួន​។

លោក Brian Kruger នាយក​គ្រប់គ្រង​ក្រុមហ៊ុន Toll group ត្រូវ​បាន​ដកស្រង់​សម្តី​នៅក្នុង​សេចក្ដី​ប្រកាស​ព័ត៌មាន​នេះ​ថា​៖ «​ការ​សម្រេចចិត្ត​ដក​ចំណាប់​អារម្មណ៍​របស់​យើង​នៅក្នុង​សម្បទាន​នេះ បន្ទាប់ពី​ប្រាក់​ចំណូល​ដែល​ទទួល​បាន​មាន​កាន់តែ​ទាប​ជាង​ការ​រំពឹងទុក​ក្នុង​អំឡុង​ពេល​នេះ​»​។

លោក​បន្ត​ថា​៖ «​បន្ថែម​ពី​នេះ​ទៀត ការ​បរាជ័យ និង​ការ​ពន្យារពេល​ក្នុង​ការងារ​កែលម្អ​ផ្លូវដែក​ដោយ​ក្រុមហ៊ុន​ ម៉ៅការ ​បន្ត​ក្នុង​ស្រុក​ក្នុង​រយៈពេល​ពីរ​ឆ្នាំ​កន្លងមក​នេះ​បាន​រារាំង​ដល់​ប្រតិបត្តិការ និង​លទ្ធភាព​លើកកម្ពស់​សេដ្ឋកិច្ច​តាមរយៈ​ផ្លូវដែក​នេះ​»​។

សេចក្ដី​ប្រកាស​ព័ត៌មាន​បាន​ឲ្យ​ដឹង​ថា ក្រុមហ៊ុន Toll នឹង​បន្ត​ផ្ដល់​នូវ​ការ​គាំទ្រ​ផ្នែក​ដឹកជញ្ជូន​ក្រៅ​ប្រទេស​ដល់​ក្រុមហ៊ុន Royal Group​។

លោក Kruger បន្ត​ថា​៖ «​ក្រុមហ៊ុន Toll Royal Railway មាន​មោទនភាព​ចំពោះ​ដំណោះស្រាយ​វិជ្ជាជីវៈ​ដែល​ខ្លួន​បាន​បណ្ដុះបណ្ដាល​ដល់ បុគ្គលិក ការ​គ្រប់គ្រង​ដោយ​សុវត្ថិភាព ការ​អប់រំ​សហគមន៍ និង​ភាព​ល្អ​ប្រសើរ​នៃ​ប្រតិបតិ្តការ ហើយ​ក្រុមហ៊ុន Toll ទទួល​ស្គាល់​ពី​សារៈសំខាន់​សេវា​ដឹកជញ្ជូន​ដើម្បី​គាំទ្រ​ដល់​កំណើន និង​ភាព​រីកចម្រើន​របស់​កម្ពុជា​»​។

កាលពី​២០០៩​រដ្ឋាភិបាល​កម្ពុជា​បាន​ផ្ដល់​សម្បទាន​រយៈពេល​៣០​ឆ្នាំ​ដល់​ក្រុមហ៊ុន Toll Royal Railway ឲ្យ​ប្រតិបត្តិការ​បណ្ដាញ​ផ្លូវដែក​កម្ពុជា និង​មាន​សិទ្ធិ​លើ​គម្រោង​អចលនទ្រព្យ​សំរោង​នៅ​ជាយក្រុង​ភ្នំពេញ​ដើម្បី​សាងសង់​ស្ថានីយ​ដឹកជញ្ជូន​ថ្មី​មួយ​។

កិច្ចព្រមព្រៀង​របស់​ក្រុមហ៊ុន Toll Royal Railway គឺជា​ផ្នែក​មួយ​របស់​ធនាគារ​អភិវឌ្ឍន៍​អាស៊ី (ADB) និង​គម្រោង​កសាង​ផ្លូវដែក​មាន​ទឹកប្រាក់​ ១៤៣ ​លាន​ដុល្លារ​របស់​រដ្ឋាភិបាល ​អូស្ដ្រាលី ដែល​រួមមាន​ការ​ជួសជុល​ផ្លូវដែក​ប្រវែង​ ២៥៤ ​គីឡូម៉ែត្រ​ពី​ភ្នំពេញ​ទៅ​ក្រុង​ព្រះសីហនុ និង​ផ្លូវដែក​ប្រវែង ​៣៨៨ ​គីឡូម៉ែត្រ​ពី ​ភ្នំពេញ​ ទៅ​ ប៉ោយប៉ែត​។

ប៉ុន្តែ​នៅ​ឆ្នាំ​នេះ​គម្រោង​របស់ ADB បាន​ស្ថិត​ក្រោម​ការ​ត្រួតពិនិត្យ ពេល​ដែល​សវនកម្ម​ផ្ទៃក្នុង​បាន​បង្ហាញ​ថា​ធនាគារ​នេះ​បរាជ័យ​ក្នុង​ការ​ធានា​ដល់​ការ​តាំង​ទីលំនៅ​ថ្មី​របស់​សហគមន៍​ដែល​បាន​រង​ផលប៉ះពាល់​ដោយ​ការងារ​នេះ ឬ​វាយតម្លៃ​ការ​កាន់កាប់​ដី​ទំហំ​ ១០០​ ហិកតា​របស់​ប្រជាពលរដ្ឋ​ជាង​២០០​គ្រួសារ​នៅ​សំរោង​។

តាម ADB បច្ចុប្បន្ន​ខ្សែ​ផ្លូវដែក​ភាគ​ខាង​ត្បូង​បាន​បញ្ចប់​ខណៈ​ខ្សែ​ផ្លូវដែក​ភាគ​ខាង​ជើង​នៅ​មិន​ទាន់​រួច​នៅ​ឡើយ​ដោយសារ​តែ​កង្វះ​មូលនិធិ​។

លោក លី បូរិន ប្រធាន​នាយកដ្ឋាន​ផ្លូវដែក​របស់​ក្រសួង​ដឹកជញ្ជូន​បាន​បដិសេធ​ធ្វើ​អត្ថាធិប្បាយ​អំពី​ថា​តើ​គម្រោង​អចលនទ្រព្យ​សំរោង​នៅ​តែ​អនុញ្ញាត​សម្រាប់​ស្ថានីយ​ដឹកជញ្ជូន​ថ្មី​ឬ​យ៉ាង​ណា​នោះ​ទេ​?

ក្រុមហ៊ុន Toll មិន​លម្អិត​ថា​តើ​ក្រុមហ៊ុន​នេះ​ខាតបង់​ប៉ុន្មាន​នោះ​ទេ​ក្នុង​អំឡុង​សម្បទាន​៥​ឆ្នាំ​របស់​ខ្លួន និង​ថា​តើ​ទឹកប្រាក់​ចំនួន​ប៉ុន្មាន​នៃ​ភាគហ៊ុន​៥៥​ភាគរយ​ដែល​ក្រុមហ៊ុន​បាន​លក់​ក្នុង​ការ​វិនិយោគ​រួម ឬ​ថា​តើ​ការ​លក់​នេះ​បាន​យល់ព្រម​ដោយ​អាជ្ញាធរ​កម្ពុជា​ហើយ​ឬ​នៅ​នោះ​ទេ​? ប៉ុន្តែ​ការ​ចេញ​របស់ Toll ពី​ក្រុមហ៊ុន​វិនិយោគ​រួម​ជាមួយ Royal Group និង​គម្រោង​ផ្លូវដែក​កម្ពុជា ដែល​មាន​ជម្លោះ​នេះ​អាច​ជា​ផ្នែក​មួយ​នៃ​កិច្ចខិតខំប្រឹងប្រែង​ដ៏ធំ​របស់​ខ្លួន​ដែល​ចង់​ពង្រឹង​ការ​វិនិយោគ​ដែល​កំពុង​ដំណើរការ​នេះ​។

តំណាង​មកពី​ក្រុមហ៊ុន Toll Group និង​ក្រុមហ៊ុន Royal Group បាន បដិសេធ​ដោយ​មិន​ធ្វើ​អត្ថាធិប្បាយ​នោះ​ទេ​កាលពី​ថ្ងៃ​ម្សិលមិញ​៕​PB

អត្ថបទគួរចាប់អារម្មណ៍