មជ្ឈមណ្ឌលបណ្ដុះធុរកិច្ចថ្មីតេជោ (TSC) ដែលគ្រប់គ្រងដោយរដ្ឋ និងធនាគារ ABA Bank ផ្តើមធ្វើការជាមួយគ្នាលើការអភិវឌ្ឍក្រុមហ៊ុនបង្កើតថ្មីបច្ចេកវិទ្យាហិរញ្ញវត្ថុ (Fintech) តាមរយៈការចុះហត្ថលេខាលើអនុស្សរណៈនៃការយោគយល់គ្នា (MoU) កាលពីសប្តាហ៍កន្លងទៅ ដែលជាការរំពឹងទុក វានឹងរួមចំណែកក្នុងការបង្កើតប្រព័ន្ធអេកូនវានុវត្តន៍ដ៏រឹងមាំមួយនៅកម្ពុជា។
តាមរយៈកិច្ចសហការនេះ ធនាគារ ABA Bank នឹងផ្ដល់ដំណោះស្រាយការទូទាត់ «PayWay» ដល់គម្រោងនេះ និងគំនិតផ្តួចផ្ដើមធុរកិច្ចថ្មីនៃ TSC ព្រមទាំងបើកលទ្ធភាពឲ្យទទួលបាននូវការប្រើប្រាស់ PayWay Sandbox ក្នុងការសាកល្បង និងប្រើក្នុងគោលបំណងអភិវឌ្ឍនវានុវត្តន៍ទៀតផង។
ខណៈ TSC នឹងដាក់បង្ហាញ និងផ្ដល់អាទិភាពប្រើប្រាស់ប្រព័ន្ធ PayWay ពីធនាគារ ABA Bank ជាវិធីសាស្ដ្រទូទាត់តាមអនឡាញសម្រាប់គម្រោង និងគំនិតផ្តួចផ្ដើមនេះ ដូច្នេះហើយ TSC នឹងធ្វើការងារយ៉ាងសកម្មជាមួយធនាគារ ABA ដើម្បីបង្កើនកំណើនការទូទាត់តាមអនឡាញ ប្រព័ន្ធអេកូឡូស៊ីធុរកិច្ចថ្មី និងផ្នែក Fintech របស់កម្ពុជា។
លោក តាំង ងួនលី នាយកប្រតិបត្តិមជ្ឈមណ្ឌលបណ្ដុះធុរកិច្ចថ្មីតេជោ (TSC) បានឲ្យដឹងថា MoU ដែលទើបចុះហត្ថលេខានេះនឹងជំរុញការរៀនសូត្រតាមរយៈការធ្វើគ្រប់ផ្នែកទាំងអស់នៃធុរកិច្ចឌីជីថល និងក្រុមហ៊ុនដែលមានការច្នៃប្រឌិតខ្ពស់ក្នុងការបង្កើតស្នាដៃ និងផលិតផល ដើម្បីទទួលបាននូវភ័ស្ដុតាងជាក់ស្ដែងក្នុងការទូទាត់ឌីជីថលដោយផ្ទាល់ដៃលើអត្ថប្រយោជន៍នៃការអភិវឌ្ឍផលិតផល ឬសេវាកម្មរបស់ពួកគេ។
លោកបានបន្ថែមថា៖ «ដោយពិនិត្យឃើញនូវភាពសម្បូរបែបរបស់ PayWay យើងរីករាយចំពោះការសហការគ្នានេះដែលអាចជួយជំរុញការអភិវឌ្ឍនវានុវត្តន៍បន្ថែមទៀតនៃសមាជិកធុរកិច្ចរបស់យើង។ ភាពជាដៃគូនេះឆ្លុះបញ្ចាំងពីការប្ដេជ្ញាចិត្តរបស់យើងឆ្ពោះទៅរកការអភិវឌ្ឍមូលដ្ឋានទូទាត់ឌីជីថលសម្រាប់ភាពជឿនលឿននៃធុរកិច្ចឌីជីថលរបស់ប្រទេសកម្ពុជា»។
លោក Zokhir Rasulov ប្រធានផ្នែកឌីជីថលនៅធនាគារ ABA បានឲ្យដឹងថា កិច្ចសហប្រតិបត្តិការនេះនឹងផ្ដល់ឲ្យធនាគាររបស់លោកនូវលទ្ធភាពនៃការទូទាត់តាមអនឡាញកាន់តែច្រើនចំពោះធុរកិច្ចបច្ចេកវិទ្យា ហើយធនាគារក៏នឹងទទួលបាននូវគំនិតនវានុវត្តន៍បន្ថែមទៀតត្រឡប់មកវិញសម្រាប់ការអភិវឌ្ឍបច្ចេកវិទ្យាហិរញ្ញវត្ថុនៅកម្ពុជាផងដែរ។
លោកលើកឡើងថា៖ «យើងរីករាយក្នុងការសហការជាមួយមជ្ឈមណ្ឌលបណ្ដុះធុរកិច្ចថ្មីតេជោក្នុងការផ្ដល់លទ្ធភាពចូលប្រើប្រាស់ច្រកទ្វារការទូទាត់អនឡាញដ៏ទំនើបបំផុត ដល់សហគ្រិនបច្ចេកវិទ្យា និងអាចឲ្យពួកគេអនុវត្តវាជាមួយនឹងគំនិតរបស់ពួកគេ។ យើងជឿជាក់ថា ការសហការនេះនឹងផ្ដល់ការគាំទ្ររួមសម្រាប់អ្នកជួល TSC ក្នុងការស្វែងរក និងធ្វើឲ្យគំនិតពួកគេដំណើរការទៅមុខ ដើម្បីបង្កើតក្រុមហ៊ុនប្រកបដោយជោគជ័យនៅក្នុងយុគ្គសម័យឌីជីថល»។
TSC គឺជាស្ថាប័នរដ្ឋថ្មីមួយដែលទើបត្រូវបានបង្កើនឡើងដោយមានក្រសួងសេដ្ឋកិច្ច និងហិរញ្ញវត្ថុ (MEF) ជាអាណាព្យាបាល សម្រាប់ការបណ្ដុះបណ្ដាលប្រជាជនកម្ពុជាវ័យក្មេងឆ្ពោះទៅរកសហគ្រិនភាព និងសមត្ថភាពនវានុវត្តន៍ផ្នែកបច្ចេកវិទ្យាដែលរីកចម្រើនយ៉ាងឆាប់រហ័ស និងថ្នាល ឌីជីថលជាច្រើន។ មជ្ឈមណ្ឌលនេះត្រូវបានបង្កើតឡើងជាផ្លូវការកាលពីថ្ងៃទី ៦ ខែកក្កដា ឆ្នាំ ២០២០៕LA