ក្រុងតូក្យូៈ Toyota ដែលជាក្រុមហ៊ុនផលិតរថយន្តឈានមុខគេរបស់ជប៉ុន និងមូលនិធិវិនិយោគ SoftBank Vision Fund កាលពីថ្ងៃសុក្របានបង្ហាញការវិនិយោគដែលមានតម្លៃ ១ ពាន់លានដុល្លារទៅលើក្រុមហ៊ុនអាមេរិក Uber ដើម្បីឆ្ពោះទៅរកការអភិវឌ្ឍសេវាហៅតាក់ស៊ីជិះដោយស្វ័យបើកបរ។
ការចាក់បញ្ចូលទឹកប្រាក់ចុងក្រោយបំផុតដែលរំពឹងថា នឹងបញ្ចប់ក្នុងត្រីមាសទី៣ ឆ្នាំនេះ បានធ្វើឡើងចំពេលមានការរំពឹងទុកយ៉ាងខ្លាំងចំពោះការ បោះផ្សាយមូលបត្រសាធារណៈជាលើកដំបូងរបស់ Uber ដោយត្រូវគេរំពឹងថា គឺជាការបោះផ្សាយមូលបត្រសាធារណៈធំបំផុតក្នុងវិស័យបច្ចេកវិទ្យាក្នុងរយៈពេលប៉ុន្មានឆ្នាំនេះ។
Toyota បានវិនិយោគ ៥០០ លានដុល្លាររួចហើយទៅលើក្រុមហ៊ុន Uber ដោយសារក្រុមហ៊ុននេះប្រកួតប្រជែងជាមួយ Waymo ជាក្រុមហ៊ុនគ្រប់គ្រងដោយក្រុមហ៊ុន Google និងក្រុមហ៊ុនជាច្រើនទៀត ដែលរួមទាំងក្រុមហ៊ុនផលិតរថយន្តសំខាន់ៗ ដើម្បីអភិវឌ្ឍរថយន្តស្វ័យបើកបរ។
ក្រុមហ៊ុនបានឲ្យដឹងនៅក្នុងសេចក្ដីប្រកាសព័ត៌មានថា ការវិនិយោគចុងក្រោយបំផុតដែលជាប់ទាក់ទងទៅនឹង DENSO ជាក្រុមហ៊ុនផលិតគ្រឿងបន្លាស់របស់ប្រទេស ជប៉ុន នឹងផ្ដល់ឲ្យក្រុមហ៊ុន Advanced Technologies Group របស់ Uber ដើម្បី «បង្កើនល្បឿនការអភិវឌ្ឍ និងការធ្វើឲ្យទៅជាលក្ខណៈពាណិជ្ជកម្មនៃការហៅតាក់ស៊ីជិះដោយស្វ័យប្រវត្តិ»។
Toyota និង DENSO កំពុងចំណាយប្រាក់ ៦៦៧ លានដុល្លារ និងមូលនិធិ SoftBank Vision Fund ដែលជាសាខាវិនិយោគរបស់ក្រុមហ៊ុន SoftBank របស់មហាសេដ្ឋីប្រទេស ជប៉ុន លោក Masayoshi នឹងចាក់បញ្ចូលសាច់ប្រាក់ ៣៣៣ លានដុល្លារទៅក្នុងការវិនិយោគរួមនេះ។ ក្រុមហ៊ុននេះជាភាគទុនិកឈានមុខគេនៅក្នុងក្រុមហ៊ុន Uber ដែលគ្រប់គ្រងភាគហ៊ុនចំនួន ១៦ ភាគរយ។
ក្រុមហ៊ុនរថយន្តរបស់ប្រទេស ជប៉ុន នេះបានឲ្យដឹងថា ខ្លួននឹងរួមចំណែក «៣០០ លានដុល្លារបន្ថែមក្នុងរយៈពេល ៣ ឆ្នាំខាងមុខ ដើម្បីជួយរ៉ាប់រងលើការចំណាយដែលជាប់ទាក់ទងនឹងសកម្មភាពទាំងនេះ»។
លោក Dara Khosrowshahi នាយកប្រតិបត្តិក្រុមហ៊ុន Uber បានប្រាប់ឲ្យដឹងថា រថយន្តស័្វយបើកបរនឹង «ផ្លាស់ប្តូរការដឹកជញ្ជូនដូចដែលយើងដឹង ដែលធ្វើឲ្យផ្លូវរបស់យើងកាន់តែមានសុវត្ថិភាព ហើយទីក្រុងយើងអាចរស់នៅបានកាន់តែច្រើន»។
ក្រុមហ៊ុន Uber កំពុងមានបំណងទៅឲ្យហួសពីការហៅរថយន្តតាក់ស៊ីជិះ ដើម្បីក្លាយជា «ក្រុមហ៊ុនដឹកជញ្ជូន Amazon »នៅពេលអនាគត ដែលប្រជាជនអាចចែករំលែកជំនួសឲ្យការប្រើប្រាស់រថយន្តផ្ទាល់ខ្លួន។
ប្រសិនបើអ្វីៗទាំងអស់ដំណើរការតាមផែនការ អ្នកធ្វើដំណើរអាចជិះអ៊ីស្គូតធើរ (e-scooter) ទៅស្ថានីយរថភ្លើង បន្ទាប់មកជិះកង់អគ្គិសនី ចែករំលែកការជិះកង់ ឬជិះអ៊ីស្គូតធើរទៅស្ថានីយ ដោយការធ្វើដំណើរទាំងអស់ប្រើកម្មវិធី Uber លើស្មាតហ្វូន។
ក្រុមហ៊ុន Uber កំពុងមើលឃើញកំណើនភាពជោគជ័យជាមួយនឹងសេវា «ញ៉ាំ» ដែលអនុញ្ញាតឲ្យអ្នកបើកបររកប្រាក់តាមរយៈការដឹកជញ្ជូនអាហារ ដែលបានបញ្ជាទិញពីភោជនីយដ្ឋាន។
ការចែករំលែកសេដ្ឋកិច្ច
កាលពីសប្ដាហ៍មុនក្រុមហ៊ុន Uber បានបំពេញឯកសារផ្លូវការសម្រាប់ការបោះផ្សាយមូលបត្រសាធារណៈលើកដំបូងជាមួយនឹងការរំពឹងទុកដ៏ខ្ពស់។
ឯកសារនៅគណៈកម្មការមូលបត្រ បានឲ្យដឹងថា ក្រុមហ៊ុននេះប្រតិបត្តិការនៅលើទ្វីបចំនួន ៦ ដោយមានការធ្វើដំណើរប្រហែល ១៤ លានដងក្នុង ១ ថ្ងៃ ហើយសរុបរួមមានជាង ១០ ពាន់លានដង ចាប់តាំងពីក្រុមហ៊ុននេះបង្កើតឡើងកាលពីឆ្នាំ ២០១០។
កាសែត Wall Street Journal បានឲ្យដឹងកាលពីដើមខែនេះថា ក្រុមហ៊ុន Uber កំពុងស្វែងរកការបង្កើនមូលនិធិ ១០ ពាន់លានដុល្លារ ជាអ្វីដែលជាការបោះផ្សាយមូលបត្រសាធារណៈឈានមុខគេប្រចាំឆ្នាំនេះ។
ប្រព័ន្ធព័ត៌មានរាយការណ៍ថា ក្រុមហ៊ុនហៅតាក់ស៊ីជិះឈានមុខគេមួយនេះ ទំនងជានឹងស្វែងរកតម្លៃទីផ្សារជិតដល់ ១០០ ពាន់លានដុល្លារ។
Uber ជាក្រុមហ៊ុនឈានមុខគេនៃ «ក្រុមហ៊ុនបង្កើតថ្មី» ឬក្រុមហ៊ុនគាំទ្រដោយការវិនិយោគរួម ដែលមានតម្លៃយ៉ាងហោចណាស់ ១ ពាន់លានដុល្លារ ត្រូវបានចុះបញ្ជីនៅក្នុងតំបន់ហិរញ្ញវត្ថុ Wall Street និងជាក្រុមហ៊ុនដ៏សំខាន់នៅក្នុង «សេដ្ឋកិច្ចចែករំលែក» ដែលពឹងផ្អែកលើការផ្ដល់សេវាក្នុងការជំនួសការគ្រប់គ្រងរថយន្ត លំនៅឋាន និងសេវាផ្សេងទៀត។
ប្រាក់ចំណូលរបស់ Uber បានកើនឡើង ៤២ ភាគរយកាលពីឆ្នាំមុន ដល់ ១១,២ ពាន់លានដុល្លារ ប៉ុន្តែក្រុមហ៊ុននេះបានបន្តខាតបង់ប្រាក់ដោយសារប្រតិបត្តិការរបស់ខ្លួន។ ប្រាក់ចំណេញសុទ្ធ ត្រូវបានរាយការណ៍សម្រាប់ឆ្នាំនេះ គឺបានពីការលក់ទ្រព្យសកម្មធំៗ ប៉ុន្តែការខាតបង់ផ្នែកប្រតិបត្តិការមានជាង ៣ ពាន់លានដុល្លារ។
ក្រុមអ្នកវិភាគមួយចំនួនបានបង្ហាញការប្រុងប្រយ័ត្នលើ IPO នៅពេលខាងមុខ ដោយសារតែការចាប់ផ្ដើមដំបូងដ៏ទន់ខ្សោយសម្រាប់ Lyft ដែលជាក្រុមហ៊ុនដៃគូប្រកួតប្រជែងរបស់អាមេរិកដ៏សំខាន់។
លោក Khosrowshahi បានសន្យាថា នឹងមានតម្លាភាពកាន់តែខ្លាំង ខណៈលោកស្វែងរកការស្ដារទំនុកចិត្តនៅក្នុងក្រុមហ៊ុននាំមុខការហៅតាក់ស៊ីជិះពិភពលោកមួយនេះ ដែលរងផលប៉ះពាល់ដោយរឿងអាស្រូវកំហុសឆ្គងជាច្រើន។
កាលពីខែតុលា ក្រុមហ៊ុន Toyota និងក្រុមហ៊ុន SoftBank បានប្រកាសពីការបង្កើតការវិនិយោគរួមគ្នា ដើម្បីឈានទៅបង្កើត «សេវាចល័តថ្មី» ដែលរួមទាំងរថយន្តស្វ័យបើកបរ និងសេវាជាច្រើនដូចជាការដឹកជញ្ជូនអាហារជាដើម៕ AFP/LA