.jpg)
អតិថិជនកំពុងស្វែងរកមើលការទិញទំនិញតាមអនឡាញ។ បច្វុប្បន្នអាជីវកម្មផ្អែកលើប្រព័ន្ធឌីជីថលកំពុងមានការកើនឡើងខ្លាំង។ ភ្នំពេញ ប៉ុសិ៍្ត
ភ្នំពេញៈ គណៈកម្មការសេដ្ឋកិច្ច និងសង្គមសម្រាប់តំបន់អាស៊ី និងប៉ាស៊ីហ្វិក (ESCAP) របស់អង្គការសហប្រជាជាតិកាលពីម្សិលមិញ បានប្រកាសដាក់ឲ្យដំណើរការគម្រោងលើកកម្ពស់សហគ្រិនភាពស្ដ្រីនៅកម្ពុជា។ នេះបើយោងតាមសេចក្ដីប្រកាសព័ត៌មានរបស់អង្គការនេះ។
ESCAP បានឲ្យដឹងថា នៅក្នុងភាពជាដៃគូជាមួយក្រសួងកិច្ចការបរទេសកាណាដា និងរដ្ឋាភិបាលកម្ពុជា គម្រោងថ្មីមួយនេះត្រូវបានដាក់ឲ្យដំណើរការ ដើម្បីគាំទ្រកំណើនសហគ្រិនភាពស្ដ្រីជាយុទ្ធសាស្ដ្រមួយក្នុងការកាត់បន្ថយភាពក្រីក្រ ដើម្បីទទួលបានសុខុមាលភាពសង្គម និងកំណើនសេដ្ឋកិច្ចប្រកបដោយចីរភាព។
គម្រោងរយៈពេល ៥ ឆ្នាំ ដែលមានឈ្មោះថា «កាតាលីករសហគ្រិនភាពរបស់ស្ដ្រី ការបង្កើតអេកូស៊ីស្ដែមសហគ្រិនឆ្លើយតបនឹងយេនឌ័រ» មានគោលបំណងបង្កើតសមត្ថភាពគោលនយោបាយ និងបរិយាកាសអាជីវកម្ម ដែលលើកកម្ពស់លទ្ធភាពទទួលបានមូលធនរបស់សហគ្រិនស្ដ្រី តាមរយៈយន្តការហិរញ្ញប្បទាននវានុវត្តន៍ ការបង្កើនការប្រើប្រាស់បច្ចេកវិទ្យាព័ត៌មាន (ICT) និងដំណោះស្រាយឌីជីថលរបស់ពួកគេ។
លោកស្រី Armida Alisjahbana អគ្គលេខាធិការរងអង្គការសហប្រជាជាតិ និងជាលេខាធិការប្រតិបត្តិនៅ ESCAP បានថ្លែងថា បច្ចុប្បន្នការវិនិយោគលើសហគ្រិនស្ដ្រីកំពុងកើនឡើងខ្លាំង។ លោកស្រីថ្លែងថា៖ «ពួកគេជាភ្នាក់ងារផ្លាស់ប្តូរពិតប្រាកដ ដែលការច្នៃប្រឌិតរបស់ពួកគេអាចលើកកម្ពស់ក្រុមហ៊ុន សហគមន៍ និងប្រទេស»។ លោកស្រីបន្តថា៖ «យើងប្ដេជ្ញាក្នុងការកែលម្អចក្ខុវិស័យរបស់ពួកគេដើម្បីបង្ហាញសក្ដានុពលពេញលេញរបស់សហគ្រិនស្ដ្រី»។
អាជីវកម្មគ្រប់គ្រងដោយស្ដ្រី បានកើនឡើងក្នុងរយៈពេល ២០ ឆ្នាំមកនេះនៅក្នុងតំបន់។ នៅប្រទេស កម្ពុជា ប្រហែល ៦៥ ភាគរយនៃអាជីវកម្មខ្នាតតូចត្រូវបានដឹកនាំដោយស្រ្ដី។ នេះបើយោងតាម ESCAP។
ប៉ុន្តែសហគ្រិនស្ដ្រីទូទាំងតំបន់អាស៊ីប៉ាស៊ីហ្វិកប្រឈមនឹងឧបសគ្គកាន់តែខ្ពស់ខ្លាំង រួមមានក្របខ័ណ្ឌច្បាប់ដែលរើសអើង លទ្ធភាពទទួលបានហិរញ្ញប្បទាន និង ICT នៅមានកម្រិត កង្វះឱកាសសម្រាប់ការអភិវឌ្ឍសមត្ថភាព និងបទដ្ឋាន និងការរើសអើងដោយសារតែវប្បធម៌សង្គម។
លោកស្រី Donica Pottie ឯកអគ្គរដ្ឋទូតវិសាមញ្ញ និងពេញសមត្ថភាពរបស់ប្រទេស កាណាដា ប្រចាំនៅប្រទេស ថៃ កម្ពុជា និងឡាវ បានឲ្យដឹងថា ប្រទេស កាណាដា មានមោទនភាពក្នុងការធ្វើជាដៃគូជាមួយ ESCAP ក្នុងការជួយស្ដ្រីជម្នះលើឧបសគ្គទាំងនេះ ដើម្បីសម្រេចបានសក្ដានុពលពេញលេញរបស់ពួកគេ ដែលរួមមានតាមរយៈហិរញ្ញប្បទាននវានុវត្តន៍ និងលទ្ធភាពក្នុងការទទួលបានបច្ចេកវិទ្យាថ្មី។
លោកស្រីថ្លែងថា៖ «សហគ្រិនស្ដ្រី គឺជាកត្តាដ៏សំខាន់នៃកំណើនសេដ្ឋកិច្ច ប៉ុន្តែពួកគេប្រឈមបញ្ហាធំៗ នៅក្នុងការពង្រីកអាជីវកម្មរបស់ពួកគេ»។
លោក លី ធុច ទេសរដ្ឋមន្ដ្រី និងជាប្រធានគណៈកម្មការជាតិទទួលបន្ទុក ESCAP បានឲ្យដឹងនៅក្នុងសេចក្ដីប្រកាសព័ត៌មានមួយថា ការគាំទ្រត្រូវបានរៀបចំដើម្បីជួយសហគ្រិនស្ដ្រី ក្នុងការគ្រប់គ្រងក្រុមហ៊ុនរបស់ពួកគេកាន់តែមានប្រសិទ្ធភាព និងប្រសិទ្ធផល តាមរយៈការបំពាក់ ICT។
លោកស្រីបន្តថា៖ «វិស័យឯកជន គឺជាកត្តាជំរុញដ៏សំខាន់នៃសេដ្ឋកិច្ចរបស់ប្រទេស កម្ពុជា និងការអភិវឌ្ឍសហគ្រាសធុនតូច និងមធ្យម (MSME) គឺជាអាទិភាពមួយនៃរបៀបវារៈនៃការអភិវឌ្ឍវិស័យឯកជនរបស់រដ្ឋាភិបាល»។
ESCAP និងមូលនិធិអភិវឌ្ឍន៍មូលធនអង្គការសហប្រជាជាតិ (UNCDF) ក៏បានដាក់ឲ្យដំណើរការ មូលនិធិ បច្ចេកវិទ្យាហិរញ្ញវត្ថុសម្រាប់សហគ្រាសធុនតូច និងមធ្យម (MSME) របស់ស្រ្ដីផងដែរ។
មូលនិធិនេះនឹងគាំទ្រដល់ក្រុមហ៊ុន ក្នុងការសាកល្បងការប្រើប្រាស់ឌីជីថលនវានុវត្តន៍ និងដំណោះស្រាយហិរញ្ញវត្ថុ ដែលជួយកែលម្អលទ្ធភាពដល់ MSME ដែលគ្រប់គ្រងដោយស្ត្រី ជាមួយនឹងមូលនិធិចាប់ពី ២៥ ០០០ ទៅ ៥០ ០០០ ដុល្លារអាមេរិក។
គម្រោងស្រដៀងគ្នាថ្មីមួយ ដែលគាំទ្រដោយ USAID ដែលមានឈ្មោះថា « We Act »នឹងមានមូលនិធិ ១០ លានដុល្លារ ក៏ត្រូវបានដាក់ឲ្យដំណើរការកាលពីខែមុនផងដែរ ដែលមានបំណងគាំទ្រ និងផ្ដល់អំណាចដល់ស្ដ្រីវ័យក្មេងនៅកម្ពុជាក្នុងភាពជាសហគ្រិន និងមេដឹកនាំ៕LA
