បាងកកៈ ក្នុងនាមជាប្រទេសឆ្លងកាត់មួយ ថៃគួរតែដើរតួនាទី ដ៏សំខាន់ក្នុងការជួយដល់ឡាវ ជាប្រទេសដែលមិនជាប់សមុទ្រ ក្នុងការកែលម្អកំណើនសេដ្ឋកិច្ចរបស់ពួកគេ ដើម្បីសម្រេចបានទិសដៅកម្មវិធីសកម្មភាពទីក្រុងវីយែន (VPoA) រយៈពេល ១០ ឆ្នាំ ចំពោះបណ្ដាប្រទេសកំពុងអភិវឌ្ឍន៍ ដែលមិនជាប់សមុទ្រសម្រាប់ទសវត្សរ៍ឆ្នាំ ២០១៤ ដល់ឆ្នាំ ២០២៤។ នេះបើយោងតាមប្រធានរបស់កម្មវិធីអង្គការសហប្រជាជាតិ ដែលបានស្រង់សម្តីដោយកាសែតបាងកក ប៉ុស្តិ៍។
ការស្នើសុំរបស់ស្ថាប័នអន្តរជាតិមួយនេះ ត្រូវបានធ្វើឡើងក្នុងអំឡុងកិច្ចប្រជុំប្រចាំតំបន់អឺរ៉ុប និងអាស៊ីរយៈពេល ២ ថ្ងៃ ដើម្បីពិនិត្យ VPoA ឡើងវិញ ដែលបានរៀបចំឡើងនៅការិយាល័យកណ្ដាលរបស់អង្គការសហប្រជាជាតិនៅទីក្រុងបាងកកកាលពីថ្ងៃចន្ទ និងថ្ងៃអង្គារ។ មន្ដ្រីរដ្ឋាភិបាលជាន់ខ្ពស់ ក្រុមអ្នកជំនាញមកពីបណ្ដាប្រទេសកំពុងអភិវឌ្ឍន៍ដែលមិនជាប់សមុទ្រ (LLDC) បណ្ដាប្រទេសកំពុងអភិវឌ្ឍន៍សម្រាប់ការឆ្លងកាត់ និងដៃគូអភិវឌ្ឍន៍នានា បានប្រមូលជួបជុំគ្នា ដើម្បីកំណត់សញ្ញារីកចម្រើន ព្រមទាំងបញ្ហាប្រឈមចំពោះការអនុវត្ត VPoA នៅអឺរ៉ុប និងអាស៊ី។
លោកស្រី Fekitamoeloa ''Utoikamanu អគ្គលេខាធិការរងអង្គការសហប្រជាជាតិ និងជាតំណាងជាន់ខ្ពស់ទទួលបន្ទុក LLDC បណ្ដាប្រទេសមានការអភិវឌ្ឍតិចតួចបំផុត (LDC) និងប្រទេសកំពុងអភិវឌ្ឍកោះ (Sid) បានឲ្យដឹងថា ប្រទេស ឡាវ បានបង្ហាញកំណើនសេដ្ឋកិច្ចវិជ្ជមានក្នុងរយៈពេលប៉ុន្មានឆ្នាំថ្មីៗនេះ ហើយប្រទេសនេះអាចមានលទ្ធភាពគេចផុតពីការចាត់ថ្នាក់របស់ខ្លួនជា LDC ក្នុងរយៈពេល ៣ ឆ្នាំ ប្រសិនបើអត្រាសេដ្ឋកិច្ចរបស់ប្រទេសនេះបន្តកើនឡើង។
ដើម្បីអភិវឌ្ឍកំណើនសេដ្ឋកិច្ចរបស់ខ្លួនបន្ថែមទៀត ប្រទេសនេះចាំបាច់ត្រូវមានការគាំទ្រពីបណ្ដាប្រទេសឆ្លងកាត់ ដូចជាប្រទេស ថៃ ដើម្បីជួយពង្រឹងសេដ្ឋកិច្ចរបស់ខ្លួន៕LA