.jpg)
ផ្សែងបានហុយចេញពីរោងចក្រថាមពលមួយក្នុងខេត្ត Hebei ប្រទេស ចិន ជាកន្លែងដែលមានការបំពុលខ្លាំងបំផុតមួយនៅលើភពផែនដី។ រូបថត AFP
ក្រុងប៉ារីសៈ ពិភពលោកនឹងខកខានឱកាសរបស់ខ្លួនក្នុងការចៀសផុតពីការជួបប្រទះគ្រោះមហន្តរាយ ប្រសិនបើគ្មានការធ្លាក់ចុះការបញ្ចេញឧស្ម័នកាបូនហ្វូស៊ីលឥន្ធនៈភ្លាមៗទេនោះ។ នេះបើយោងតាមអង្គការសហប្រជាជាតិនៅក្នុងការវាយតម្លៃប្រចាំឆ្នាំអំពីឧស្ម័នផ្ទះកញ្ចក់។
កម្មវិធីបរិស្ថានអង្គការសហប្រជាជាតិ (UNEP) បានឲ្យដឹងថា ការបញ្ចេញឧស្ម័នផ្ទះកញ្ចក់នៅទូទាំងពិភពលោកចាំបាច់ត្រូវធ្លាក់ចុះចំនួន ៧,៦ ភាគរយ ក្នុង ១ ឆ្នាំ រហូតដល់ឆ្នាំ ២០៣០ ដើម្បីកំណត់ការកើនឡើងសីតុណ្ហភាពពិភពលោកត្រឹម ១,៥ អង្សាសេ។
ការពិតនោះគឺថា ការបញ្ចេញឧស្ម័នផ្ទះកញ្ចក់បានកើនឡើងជាមធ្យម ១,៥ ភាគរយ ក្នុងមួយឆ្នាំក្នុងរយៈពេល ១ ទសវត្សរ៍ចុងក្រោយនេះ ដោយឧស្ម័នកាបូនិច (ឧស្ម័នកាបូន) ឬឧស្ម័នផ្ទះកញ្ចក់បានកើនឡើងដល់ចំនួន ៥៥,៣ ពាន់លានតោន ក្នុងឆ្នាំ ២០១៨ ពោល គឺរយៈពេល ៣ ឆ្នាំបន្ទាប់ពីប្រទេសចំនួន ១៩៥ បានចុះហត្ថលេខាលើសន្ធិសញ្ញាទីក្រុងប៉ារីសស្តីពីការប្រែប្រួលអាកាសធាតុ។
អង្គការបរិយាកាសពិភពលោក (World Meterological Organization) បានឲ្យដឹងកាលពីថ្ងៃចន្ទថា បរិមាណឧស្ម័នផ្ទះកញ្ចក់នៅបរិយាកាសបានកើនឡើងដល់កម្រិតខ្ពស់បំផុតមិនធ្លាប់មានក្នុងឆ្នាំ ២០១៨។
សន្ធិសញ្ញាទីក្រុងប៉ារីសបានកំណត់ឲ្យប្រទេសនានាកំណត់ការកើនឡើងសីតុណ្ហភាពមិនឲ្យលើកម្រិត ២ អង្សាសេ និងដល់កម្រិតកាន់តែមានសុវត្ថិភាពជាងនេះ ១,៥ អង្សាសេ ប្រសិនបើអាចធ្វើទៅបាន។
ដើម្បីសម្រេចបានទិសដៅនេះប្រទេសហត្ថលេខីទាំងអស់បានព្រមព្រៀងគ្នាចំពោះតម្រូវការជាចាំបាច់នៅក្នុងការកាត់បន្ថយការបញ្ចេញឧស្ម័នកាបូន និងធ្វើការងាររួមគ្នា ដើម្បីឆ្ពោះទៅរកពិភពលោកមួយដែលមានកម្រិតឧស្ម័នកាបូនទាបនៅក្នុងទសវត្សរ៍ខាងមុខ៕ KC
