.jpg)
និស្សិតដែលចូលរួមក្នុងពិព័រណ៍ការងារ និងផលិតភាពជាតិនៅភ្នំពេញកាលពីសប្តាហ៍មុន។ ហេង ជីវ័ន
ភ្នំពេញៈ អនុប្រធានកម្មវិធីអភិវឌ្ឍន៍អង្គការសហប្រជាជាតិប្រចាំកម្ពុជា (UNDP) បានឲ្យដឹងថា ប្រទេស កម្ពុជា នឹងមានគណនេយ្យករជំនាញជាង ៥០០ នាក់ ត្រឹមឆ្នាំ ២០២១ ខណៈបច្ចុប្បន្នប្រទេសនេះកំពុងប្រឈមនឹងកង្វះអ្នកជំនាញគណនេយ្យ។
លោកស្រី Sonali Dayaratne បានអះអាងបែបនេះនៅក្នុងការដាក់ឲ្យដំណើរការគម្រោង «ការណែនាំគុណវុឌ្ឍិអ្នកបច្ចេកទេសគណនេយ្យ (ATQ) ជាកម្មវិធីរួមមួយរបស់ UNDP ប្រចាំកម្ពុជា ក្រុមប្រឹក្សាគណនេយ្យជាតិ (NAC) វិទ្យាស្ថានគណនេយ្យករជំនាញចក្រភពអង់គ្លេស និងប្រទេស Wales (ICAEW) និងវិទ្យាស្ថានកម្ពុជានៃគណនេយ្យករ និងសវនករសាធារណៈវិញ្ញាបនបត្រ (KICPAA) កាលពីថ្ងៃព្រហស្បតិ៍នៅទីក្រុងភ្នំពេញ។
លោកស្រីបន្តថា ចាប់តាំងពីសេដ្ឋកិច្ចកម្ពុជាកាន់តែធ្វើសមាហរណកម្មក្នុងតំបន់ និងពិភពលោកមានតម្រូវការក្នុងចំណោមក្រុមហ៊ុនធុនតូច និងមធ្យមក្នុងស្រុកសម្រាប់អ្នកបច្ចេកទេសគណនេយ្យដែលតម្រូវឲ្យកម្ពុជាត្រូវបង្កើនចំនួនគណនេយ្យករជំនាញ ព្រមទាំងធ្វើឲ្យប្រសើរឡើងស្ដង់ដាគណនេយ្យរបស់ខ្លួនដល់កម្រិតរបស់បណ្ដាប្រទេសជិតខាង និងស្ដង់ដាអន្តរជាតិ។ លោកស្រីបន្តថា៖ «មានកង្វះធ្ងន់ធ្ងរនៃគណនេយ្យករជំនាញសម្រាប់វិស័យឯកជន ពិសេសសហគ្រាសធុនតូច និងមធ្យមនៅកម្ពុជា»។
លោកស្រីបន្ថែមថា៖ «នេះគឺជារបាំងមួយសម្រាប់សហគ្រាសក្នុងការទទួលបានហិរញ្ញវត្ថុ ជំនួយរដ្ឋាភិបាល ឬបច្ចេកវិទ្យាថ្មី»។ លោកស្រីបន្តថាការស្ទង់មតិមួយដោយ UNDP Cambodia ក្នុងចំណោមបុគ្គលិកជាច្រើនបង្ហាញថា មានការពិបាកសម្រាប់សហគ្រាសខ្នាតតូចបំផុត និងសហគ្រាសធុនតូច និងមធ្យម (SME) ក្នុងការជួលគណនេយ្យករអាជីព ដោយសារតែចំនួនជំនាញនេះនៅក្នុងទីផ្សារនៅមានកម្រិត»។
លោក ងី តាយី រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សា គណនេយ្យជាតិ (NAC) បានឲ្យដឹងថា ជាមួយនឹងការដាក់ឲ្យដំណើរការកម្មវិធីនឹងមានឱកាសដ៏ធំមួយសម្រាប់ការបង្កើនអាជីពក្នុងស្រុកខាងគណនេយ្យដោយសារតែមានតម្រូវការខ្ពស់សម្រាប់ SME ក្នុងស្រុក។
លោកបានថ្លែងថា៖ «ជំនាញគណនេយ្យរបស់កម្ពុជានឹងកាន់តែរឹងមាំ ដោយសារយើងបណ្ដុះបណ្ដាលគណនេយ្យករជំនាញកាន់តែច្រើននេះដែលនឹងបង្កើនទំនុកចិត្តសម្រាប់ក្រុមវិនិយោគិនក្នុងប្រព័ន្ធរាយការណ៍គណនេយ្យនិងហិរញ្ញវត្ថុរបស់យើង ដែលវានឹងជួយក្រុមហ៊ុន និងឧស្សាហកម្មមានអភិបាលកិច្ចសាជីវកម្មត្រឹមត្រូវសម្រាប់ការអង្កេតប្រតិបត្តិការអាជីវកម្ម និងប្រតិបត្តិការរបស់ពួកគេ»។
ប៉ុន្តែលោកស្រី Sonali បានពន្យល់ថា កង្វះអ្នកជំនាញគណនេយ្យគឺជាការបារម្ភមួយសម្រាប់កំណើនសេដ្ឋកិច្ចប្រកបដោយចីរភាព ខណៈវាក៏បង្ហាញឱកាសដ៏អស្ចារ្យមួយក្នុងការបង្កើត និងផ្ដល់ការងារប្រកបដោយគុណភាពកាន់តែប្រសើរឡើងសម្រាប់ប្រជាជនកម្ពុជាវ័យក្មេងផងដែរ។
លោកស្រីបន្តថា៖ «ការចាប់យកឱកាសនេះ UNDP បានផ្ដួចផ្តើមគំនិតភាពជាដៃគូជាមួយ NAC KICPAA និង ICAEW ដើម្បីអភិវឌ្ឍ និងណែនាំកម្មវិធីបណ្ដុះបណ្ដាល គុណវុឌ្ឍិអ្នកបច្ចេកទេសគណនេយ្យដែលទទួលស្គាល់ជាអន្តរជាតិ សម្រាប់បុគ្គលិកកំពុងស្វែងរកឱកាសក្នុងការធ្វើឲ្យប្រសើរឡើងជំនាញ ពួកគេ និងថ្នាក់ការងារ»។
លោកស្រីបញ្ជាក់ថា៖ «ផែនការនេះត្រូវបានរំពឹងថានឹងបង្កើនអត្រាការងារធ្វើនៅកម្ពុជាតាមរយៈឱកាសសម្រាប់និស្សិតដែលត្រូវបណ្ដុះបណ្ដាលជាគណនេយ្យករជំនាញនៅក្នុងតម្លៃទាប ហើយនៅក្នុងអំឡុងពេលខ្លី អាចនឹងបង្កើតគណនេយ្យករយ៉ាងហោចណាស់ ៥០០ នាក់ ដែលមានការបណ្ដុះបណ្ដាលកាន់តែច្រើនត្រឹមឆ្នាំ ២០២១ សម្រាប់សេដ្ឋកិច្ចប្រទេសកម្ពុជា ដោះស្រាយតម្រូវការជាបន្ទាន់របស់ SME ដែលជាមូលដ្ឋានគ្រឹះនៃការអភិឌ្ឍសេដ្ឋកិច្ច និងការប្រើប្រាស់សេវារបស់វិទ្យាស្ថានអភិវឌ្ឍន៍សមត្ថភាពដែលបម្រើឧស្សាហកម្មគណនេយ្យ»។
គោលនយោបាយអភិវឌ្ឍន៍ឧស្សាហកម្មឆ្នាំ ២០១៥-២០២៥ បង្ហាញថា មានតែ ០,០២ ភាគរយប៉ុណ្ណោះ នៃសហគ្រាសខ្នាតតូចបំផុត ៣,៨៩ ភាគរយ នៃសហគ្រាសធុនតូច និង ២៤,១១ ភាគរយ នៃសហគ្រាសធុនមធ្យមមានឯកសារគណនេយ្យគ្រប់គ្រាន់៕LA
