The Phnom Penh Post Search

Search form

Logo of Phnom Penh Post newspaper Phnom Penh Post - UNIDO នឹង​ជួយ​បង្កើន​សមត្ថភាព​នាំ​ចេញ​ផលិត​ផល​សមុទ្រ​កម្ពុជា




UNIDO នឹង​ជួយ​បង្កើន​សមត្ថភាព​នាំ​ចេញ​ផលិត​ផល​សមុទ្រ​កម្ពុជា

អាហារ​សមុទ្រ​ដែល​លក់​នៅ​ផ្សារ​មួយ​នៅ​ខេត្ត​ព្រះសីហនុ​កន្លង​មក។
អាហារ​សមុទ្រ​ដែល​លក់​នៅ​ផ្សារ​មួយ​នៅ​ខេត្ត​ព្រះសីហនុ​កន្លង​មក។ ភ្នំពេញ ប៉ុស្ដិ៍ ភ្នំពេញ ប៉ុស្តិ៍

UNIDO នឹង​ជួយ​បង្កើន​សមត្ថភាព​នាំ​ចេញ​ផលិត​ផល​សមុទ្រ​កម្ពុជា

ភ្នំពេញៈ សេចក្ដី​ប្រកាស​ព័ត៌មាន​របស់​អង្គការ​អភិវឌ្ឍន៍​ឧស្សាហកម្ម​របស់​អង្គការ​សហ​ប្រជាជាតិ (UNIDO) បាន​ឲ្យ​ដឹង​ថា កម្ពុជា នឹង​ទទួល​ជំនួយ​ឧបត្ថម្ភ​ពី UNIDO ដើម្បី​កែ​លម្អ​សមត្ថភាព​លើ​ការ​នាំ​ចេញ​ផលិត​ផល​នេសាទ​ទឹក​ប្រៃ។

គម្រោង​ដែល​មាន​ឈ្មោះ​ថា «កម្មវិធី​ការ​ធ្វើ​ពិពិធកម្ម និង​ការ​ពង្រីក​ការ​នាំ​ចេញ​កម្ពុជា (CEDEP II)» មាន​តម្លៃ​ជាង ១,៣ លាន​ដុល្លារ​អាមេរិក​សំដៅ​បង្កើន​សមត្ថភាព​ទាំង​វិស័យ​សាធារណៈ និង​វិស័យ​ឯកជន​លើ​ការ​នាំ​ចេញ​ផលិត​ផល​សមុទ្រ​ដែល​រួម​មាន​ការ​អភិវឌ្ឍ​ស្ដង់ដារ​ជាតិ​សម្រាប់​ផលិត​ផល​សមុទ្រ និង​ការ​បង្កើត​សមាគម Apex Association ថ្មី​មួយ​សម្រាប់​ក្រុម​ហ៊ុន​កែច្នៃ​ផលិត​ផល​សមុទ្រ​ទាំង​អស់។

លោក ណៅ ធួក អគ្គ​នាយក​រដ្ឋបាល​ជលផល បាន​ថ្លែង​ថា គម្រោង​នេះ​គឺ​ត្រូវ​នឹង​ពេល​វេលា​ក្នុង​ការ​ជំរុញ​ឲ្យ​មាន​ភាព​ជោគ​ជ័យ​នៃ​អាទិភាព​ដ៏​សំខាន់​ដូច​ដែល​បាន​កំណត់​នៅ​ក្នុង​ក្រប​ខ័ណ្ឌ​ផែន​ការ​យុទ្ធ​សាស្ដ្រ​សម្រាប់​វិស័យ​ជលផល ឆ្នាំ​២០១០-២០១៩។

លោក​លើក​ឡើង​ថា៖ «យើង​រំពឹង​ថា គម្រោង​នេះ​នឹង​ជួយ​បង្កើន​តម្លៃ​បន្ថែម និង​សមត្ថភាព​ប្រកួត​ប្រជែង​ផលិតផល​នេសាទ​សមុទ្រ បង្កើត​ការងារ​កាន់​តែ​ច្រើន និង​បង្កើន​ប្រាក់​ចំណូល​របស់​អ្នក​ផលិត»។

សេចក្ដី​ប្រកាស​ព័ត៌មាន​នេះ​បាន​សរសេរ​ថា គម្រោង​នេះ​នឹង​គ្រប​ដណ្ដាប់​លើ​ការ​បណ្ដុះ​បណ្ដាល​មួយ​ចំនួន​ស្ដី​ពី​តម្រូវ​ការ​អនុលោម​តាម​ច្បាប់​សម្រាប់​ការ​នាំ​ចេញ និង​ការ​វេច​ខ្ចប់​ត្រូវ​ផ្ដល់​ដល់​ក្រុម​ហ៊ុន​កែច្នៃ​ដើម្បី​ធានា​ឲ្យ​ប្រាកដ​ពី​ស្ថិរភាព​របស់​វិស័យ​កែច្នៃ​ត្រី​សមុទ្រ។

តួលេខ​បាន​ពី​ក្រសួង​កសិកម្ម បង្ហាញ​ថា កម្ពុជា​ចាប់​បាន​ផលិត​ផល​សមុទ្រ​ជាង ៥៣ ០០០ តោន​នៅ​ត្រី​មាស ទី១ ឆ្នាំ​នេះ ដែល​កើន​ឡើង ២ ០០០ តោន​ធៀប​នឹង​រយៈ​ពេល​ដូច​គ្នា​កាល​ពី​ឆ្នាំ​មុន៕

អត្ថបទគួរចាប់អារម្មណ៍