ភ្នំពេញ: សមាគមធនាគារនៅកម្ពុជា (ABC) ក្រុមហ៊ុន Visa Inc ជាក្រុមហ៊ុនបច្ចេកវិទ្យាទូទាត់សាច់ប្រាក់តាមប្រព័ន្ធ ឌីជីថលឈានមុខគេក្នុងពិភពលោក និងធនាគារអេស៊ីលីដា បានចុះកិច្ចព្រមព្រៀងការប្រើប្រាស់បណ្ណឥណទាន Visa EMV chip ដើម្បីសុវត្ថិភាពការទូទាត់របស់អតិថិជន។
កិច្ចព្រមព្រៀងនេះបានផ្តល់ឲ្យសមាជិក ABC អាចប្រើប្រាស់ស្តង់ដាបន្ទះឈីបសុវត្ថិភាពរួមគ្នានៃបណ្ណឥណទាន Visa EMV chip។
ក្នុងពិធីចុះហត្ថលេខាកាលពីថ្ងៃទី ៧ ខែ សីហា លោកស្រី ជុំ ម៉ូនីកា នាយិកាគ្រប់គ្រងក្រុមហ៊ុន Visa ប្រចាំប្រទេស កម្ពុជា បានឲ្យដឹងថា ការដាក់ឲ្យប្រើប្រាស់បណ្ណឥណទាន EMV chip ដល់ធនាគារ និងគ្រឹះស្ថានមីក្រូហិរញ្ញវត្ថុក្នុងស្រុកនឹងទទួលបានស្តង់ដាសុវត្ថិភាពខ្ពស់បំផុតសម្រាប់អ្នកប្រើប្រាស់។
EMV chip នេះត្រូវបានបំពាក់ដោយបច្ចេកវិទ្យា microprocessor ដែលវានឹងបង្កើតលេខកូដសម្ងាត់ថ្មីមួយនៅពេលការប្រើប្រាស់ម្តងៗ។ លោកស្រីបន្តថា៖ «វាខុសពីកាតធម្មតាដែលអត់មានឈីប ដូច្នេះពេលយើងប្រើម្តងឈីបនេះនឹងបង្កើតលេខកូដថ្មីទៀត»។
លោក អ៊ិន ចាន់នី ប្រធានសមាគមធនាគារនៅកម្ពុជា (ABC) និងជាប្រធាននាយកប្រតិបត្តិធនាគារអេស៊ីលីដាបានឲ្យដឹងថា EMV chip នឹងជួយការពារពីការក្លែងបន្លំ និងការរំលោភបំពានទិន្នន័យរបស់អតិថិជនក្នុងវិស័យហិរញ្ញវត្ថុនៅកម្ពុជា។
លោកបានថ្លែងថា៖ «តាមរយៈការទទួលយក Visa EMV chip យើងនឹងអាចពង្រឹងប្រតិបត្តិការក្នុងស្រុក និងតាមបណ្តាញម៉ាស៊ីនអេធីអឹមរបស់យើង ដែលផ្តល់នូវសុវត្ថិភាពកាន់តែច្រើនក្នុងការផ្តល់សេវាកម្មហិរញ្ញវត្ថុទូទាំងប្រទេស»។
លោកបន្ថែមថា បណ្ណឥណទាន EMV chip នឹងអនុញ្ញាតឲ្យអតិថិជនប្រើប្រាស់ទូទាត់សាច់ប្រាក់គ្រប់ទូ ATM របស់ធនាគារ និងគ្រឹះស្ថានមីក្រូហិរញ្ញវត្ថុនៅកម្ពុជា។
ធនាគារជាតិក៏បានបង្កើតប្រព័ន្ធមួយហៅថា Cambodian Shared Switch (CSS) ដែលមានគោលដៅសំខាន់ក្នុងការផ្តល់សុវត្ថិភាព និងភាពងាយស្រួលដល់អតិថិជនប្រើប្រាស់កាត ATM។ ប្រព័ន្ធនេះក៏អនុញ្ញាតឲ្យអតិថិជនអាចប្រើប្រាស់កាតតែមួយនៅគ្រប់ធនាគារដែលចូលរួមក្នុងប្រព័ន្ធនេះ។
លោក គីមទី កោមលី អគ្គនាយករងបច្ចេកទេសទី១ នៃធនាគារជាតិនៃកម្ពុជា បានឲ្យដឹងថា ការចុះកិច្ចព្រមព្រៀងនេះនឹងជួយពង្រឹងសន្តិសុខក្នុងការទូទាត់ប្រាក់តាមប្រព័ន្ធឌីជីថលនៅកម្ពុជា។
លោកថ្លែងថា៖ «នៅអនាគតការទូទាត់គ្មានសាច់ប្រាក់សម្រាប់ប្រទេស កម្ពុជា អាចឈរលើហេដ្ឋារចនាសម្ព័ន្ធទូទាត់លំដាប់ពិភពលោកហើយការប្រកាសថ្ងៃនេះ គឺជាជំហានសំខាន់ក្នុងការសម្រេចនូវចក្ខុវិស័យនេះ»។
ការសិក្សាស្រាវជ្រាវអំពីឥរិយាបថក្នុងការទូទាត់របស់អតិថិជនប្រើប្រាស់វីសាកាត (Visa Card) បានរកឃើញថា ប្រជាពលរដ្ឋកម្ពុជាប្រហែល ១ ភាគ ៣ រំពឹងថា ការទូទាត់ប្រាក់តាមរយៈប្រព័ន្ធឌីជីថលនឹងមានប្រជាប្រិយភាពកើនឡើង។ ការសិក្សានេះបង្ហាញទៀតថា ពលរដ្ឋកម្ពុជាប្រមាណ ៥៤ ភាគរយ ជឿជាក់ថា នឹងមិនមានការទូទាត់ជាសាច់ប្រាក់សុទ្ធក្នុងរយៈពេល ៧ ឆ្នាំ ទៅមុខទៀត។ នេះបើតាមសេចក្តីប្រកាសព័ត៌មាន ABC៕ LA