ភ្នំពេញៈ ធនាគារពិភពលោកបានកែតម្រូវការព្យាកររបស់ខ្លួនលើកំណើនសេដ្ឋកិច្ចរបស់កម្ពុជាមកនៅត្រឹមក្រោម -១ និង -២,៩ នៅឆ្នាំនេះ ដោយលើកឡើងពីការរីករាលដាលកូវីដ ១៩ ដែលកំពុងធ្វើឲ្យប៉ះពាល់យ៉ាងដំណំទៅដល់ក្បាលម៉ាស៊ីនសំខាន់ៗសម្រាប់ជំរុញកំណើនសេដ្ឋកិច្ចកម្ពុជាក្នុងនោះមានវិស័យទេសចរណ៍ ឧស្សាហកម្មនាំចេញ និងសំណង់ដែលទាំងអស់នេះតំណាងឲ្យជាង ៧០ ភាគរយ នៃកំណើនសេដ្ឋកិច្ច និងផ្ដល់ការងារមានកម្រៃប្រមាណជាង ៤០ ភាគរយ នៃការងាររបស់ប្រទេស។
របាយការណ៍ស្តីពី «កម្ពុជានៅក្នុងកាលៈទេសៈមានវិបត្តិកូវីដ ១៩» ដែលជារបាយការណ៍របស់ធនាគារពិភពលោកស្ដីពីបច្ចុប្បន្នភាពសេដ្ឋកិច្ចចុងក្រោយសម្រាប់កម្ពុជាចេញផ្សាយកាលពីថ្ងៃទី ២៩ ខែឧសភា បង្ហាញថា ភាពក្រីក្រក្នុងឆ្នាំ ២០២០ អាចនឹងកើនឡើងក្នុងចំណោមគ្រួសារដែលជាប់ពាក់ព័ន្ធក្នុងវិស័យសំខាន់ៗដូចជាទេសចរណ៍ សំណង់ ពាណិជ្ជកម្ម ផលិតកម្ម និងឧស្សាហកម្មកាត់ដេរនៅចន្លោះពី ៣ ទៅ ១១ ភាគរយ ដែលខ្ពស់ជាងកម្រិតនៅខ្សែបន្ទាត់គោល ឬនិយាយម្យ៉ាងទៀតថា កម្រិតនៅពេលដែលគ្មានជំងឺកូវីដ ១៩។ ឱនភាពសារពើពន្ធនឹងមានកម្រិតខ្ពស់បំផុតដែលមិនធ្លាប់មានក្នុងអំឡុងពេល ២២ ឆ្នាំកន្លងមក។
របាយការណ៍នេះបន្ថែមថា ការដួលរលំនៃកម្លាំងសំខាន់ៗសម្រាប់ជំរុញកំណើនបានប៉ះទង្គិចយ៉ាងខ្លាំងដល់កំណើនសេដ្ឋកិច្ច និងធ្វើឲ្យការងាររបស់មនុស្សយ៉ាងហោចណាស់ ១,៧៦ លាននាក់ស្ថិតក្នុងហានិភ័យ។ របាយការណ៍ក៏បានព្រមានដែរថា ការហូរចូលនៃមូលធនមកពីក្រៅប្រទេសក៏កំពុងតែស្តួចស្ដើងទៅៗដែលតាមរយៈនេះវានឹងញ៉ាំងឲ្យតម្លៃនៃទីផ្សារអចលនទ្រព្យស្រុតចុះ ហើយទំនងជានឹងឈានទៅបញ្ចប់ការរីកលូតលាស់យ៉ាងរហ័សនៃវិស័យសំណង់ទៀតផង។ ជាមួយនឹងការផ្ដល់ឥណទានចំនួនច្រើននៅពេលបច្ចុប្បន្នដល់វិស័យសំណង់ អចលនទ្រព្យ និងកម្ចីទិញផ្ទះ កម្ចីមិនដំណើរការ (កម្ចីខូច) អាចកើនឡើង។
លោកស្រី Inguna Dobraja ប្រធានគ្រប់គ្រងនៃធនាគារពិភពលោកប្រចាំកម្ពុជាបានថ្លែងថា៖ «ការរីករាលដាលជំងឺកូវីដ ១៩ បានធ្វើឲ្យប៉ះពាល់យ៉ាងដំណំមកលើសេដ្ឋកិច្ចរបស់កម្ពុជាក្នុងឆ្នាំ ២០២០។ លោកស្រីបន្តថា៖ «វិបត្តិជាសកលដែលបង្កដោយការរីករាលដាលនៃជំងឺកូវីដ១៩ បានធ្វើឲ្យប៉ះពាល់យ៉ាងខ្លាំងមកលើសេដ្ឋកិច្ចកម្ពុជា»។
លោកស្រីបន្ថែមថា៖ «ធនាគារពិភពលោកប្ដេជ្ញាថា នឹងជួយកម្ពុជាក្នុងការដោះស្រាយឲ្យមានប្រសិទ្ធភាពជាមួយវិបត្តិកូវីដ ១៩ នេះ និងក្នុងការពង្រឹងសេដ្ឋកិច្ចឲ្យឆាប់ងើបឡើងវិញ និងមានភាពធន់នាពេលអនាគត»។
ដើម្បីធ្វើឲ្យមានស្ថិរភាព និងកាត់បន្ថយហានិភ័យដល់សេដ្ឋកិច្ចដែលកំពុងរងផលប៉ះពាល់ខ្លាំងនេះ រដ្ឋាភិបាលកាលពីថ្ងៃទី ២៦ ខែឧសភា បានដំណើរការវិធានការជុំទី ៤ ដើម្បីជួយដល់ក្រុមហ៊ុន រោងចក្រ និងសហគ្រាសដើម្បីបន្តរស់បាន។
រដ្ឋាភិបាលបានសម្រេចបន្ធូរបន្ថយការអនុវត្តពន្ធកាត់ទុកសម្រាប់ធនាគារក្នុងស្រុក និងបរទេស។ សម្រាប់កម្ចីថ្មីៗ រដ្ឋាភិបាលបានសម្រេចកាត់បន្ថយអត្រាពន្ធកាត់ទុកលើធនាគារ និងគ្រឹះស្ថានមីក្រូហិរញ្ញវត្ថុទាំងប្រភពខាងក្រៅ និងក្នុងស្រុកមកនៅត្រឹម ៥ ភាគរយសម្រាប់ឆ្នាំ ២០២០ នេះ។
ការបន្ទាបអត្រាពន្ធកាត់ទុកលើធនាគារ និងគ្រឹះស្ថានមីក្រូហិរញ្ញវត្ថុទាំងប្រភពមកពីខាងក្រៅ និងក្នុងស្រុកមកនៅត្រឹម ១០ ភាគរយសម្រាប់ឆ្នាំ ២០២១ និងកែតម្រូវអត្រាពន្ធកាត់ទុកលើធនាគារ គ្រឹះស្ថានមីក្រូហិរញ្ញវត្ថុ ទាំងប្រភពមកពីខាងក្រៅ និងក្នុងស្រុកមកនៅត្រឹមកម្រិតធម្មតាស្របជាមួយច្បាប់ និងបទប្បញ្ញតិ្តដែលកំពុងអនុវត្តជាធរមានក្នុងឆ្នាំ ២០២២។
សម្រាប់កម្ចីចាស់ រដ្ឋាភិបាលបានសម្រេចចិត្តកាត់បន្ថយអត្រាពន្ធកាត់ទុកលើធនាគារ និងគ្រឹះស្ថានមីក្រូហិរញ្ញវត្ថុទាំងប្រភពមកពីខាងក្រៅ និងក្នុងស្រុកមកនៅត្រឹម ១០ ភាគរយសម្រាប់ឆ្នាំ ២០២០។ កែតម្រូវអត្រាពន្ធកាត់ទុកលើធនាគារ និងគ្រឹះស្ថានមីក្រូហិរញ្ញវត្ថុទាំងប្រភពមកពីខាងក្រៅ និងក្នុងស្រុកមកនៅត្រឹមកម្រិតធម្មតាស្របជាមួយនឹងច្បាប់ និងបទប្បញ្ញត្តិដែលកំពុងអនុវត្តជាធរមានក្នុងឆ្នាំ ២០២១។
ក្រសួងសេដ្ឋកិច្ច និងហិរញ្ញវត្ថុនឹងបង្កើត «មូលនិធិធានាឥណទាន» ជាមួយថវិកា ២០០ លានដុល្លារ ដើម្បីធានាប្រាក់កម្ចីតាមរយៈធនាគារ និងមីក្រូហិរញ្ញវត្ថុដែលប្រើប្រាស់គោលការណ៍ទីផ្សារ ដើម្បីជួយកាត់បន្ថយលំហូរសាច់ប្រាក់ និងទុនបង្វិលរបស់ក្រុមហ៊ុនក្នុងគ្រប់វិស័យទាំងអស់យ៉ាងហោចណាស់ ២ ពាន់លានដុល្លារ។ ក្រសួងនឹងបម្រុងទុកហិរញ្ញវត្ថុបន្ថែម ៣០០ លានដុល្លារ ដើម្បីគាំទ្រ និងដើរតួជាកាតាលីករដើម្បីជំរុញកំណើននាអំឡុងក្នុង និងក្រោយវិបត្តិ៕LA