ក្រុងវ៉ាស៊ីនតោនៈ ធនាគារពិភពលោក (WB) បានឲ្យដឹងកាលពីថ្ងៃសៅរ៍ថា ការផ្ដល់កម្ចីរបស់ខ្លួនដល់ប្រទេស ចិន បានធ្លាក់ចុះយ៉ាងខ្លាំង ហើយនឹងបន្តកាត់បន្ថយ បន្ទាប់ពីលោកប្រធានាធិបតីអាមេរិក ដូណាល់ ត្រាំ បានទាមទារឲ្យធ្វើដូច្នោះ។
លោក ត្រាំ បានសរសេរនៅលើ Twitter កាលពីថ្ងៃសុក្រថា៖ «ហេតុអ្វីបានធនាគារពិភពលោកផ្ដល់ប្រាក់កម្ចីឲ្យប្រទេសចិន? តើនេះអាចទៅរួចទេ? ប្រទេស ចិន មានប្រាក់ច្រើន ហើយប្រសិនបើពួកគេមិនមានប្រាក់ទេ ពួកគេត្រូវរកប្រាក់។ ចូរបញ្ឈប់»។
ធនាគារពិភពលោកដែលត្រូវបានដឹកនាំដោយលោក David Malpass អតីតមន្ដ្រីរតនាគារអាមេរិកនេះបានការពារវិធីរបស់ខ្លួននៅក្នុងសេចក្ដីប្រកាសព័ត៌មានខ្លីមួយ។
សេចក្ដីប្រកាសនេះបានឲ្យដឹងថា៖ «ការផ្ដល់កម្ចីរបស់ធនាគារពិភពលោកឲ្យប្រទេស ចិន បានធ្លាក់ចុះយ៉ាងខ្លាំង ហើយនឹងបន្តកាត់បន្ថយដែលជាផ្នែកមួយនៃកិច្ចព្រមព្រៀងរបស់យើងជាមួយភាគទុនិករបស់យើងទាំងអស់ដែលរួមមានទាំងអាមេរិកផងដែរ។
សេចក្ដីប្រកាសព័ត៌មាននេះបានបន្តថា៖ «យើងលុបចោលការផ្ដល់កម្ចី ដោយសារតែប្រទេសជាច្រើនកាន់តែមានប្រាក់ច្រើនហើយ»។
លោក ត្រាំ បាននិងកំពុងបញ្ជាក់ជាថ្មីនូវតួនាទីមួយដែលបានកាន់កាប់ដោយរដ្ឋបាលរបស់លោកជាយូរមកហើយ ដែលរួមទាំងតំណែងរបស់លោក Malpass មុនពេលការបោះឆ្នោតរបស់លោកសម្រាប់តំណែងប្រធានធនាគារពិភពលោកនៅពេលបច្ចុប្បន្ន។
លោក Steven Mnuchin រដ្ឋមន្ដ្រីក្រសួងរតនាគាររបស់អាមេរិកបានប្រាប់តំណាងរាស្ដ្រអាមេរិកកាលពីថ្ងៃព្រហស្បតិ៍សប្តាហ៍មុនថា អាមេរិក «បានជំទាស់» នឹងកម្មវិធីកម្ចី និងគម្រោងជាច្រើនឆ្នាំរបស់ស្ថាប័ននេះនៅក្នុងប្រទេសចិន។
កម្មវិធីនោះដែលរួមមានទាំងផែនការក្នុងការកាត់បន្ថយការផ្ដល់កម្ចីដល់ប្រទេស ចិន ត្រូវបានអនុម័តកាលពីថ្ងៃព្រហស្បតិ៍សប្តាហ៍មុន។
លោក Martin Raiser នាយកប្រចាំប្រទេសធនាគារ ពិភពលោកទទួលបន្ទុកប្រទេសចិនបានឲ្យដឹងកាលពីថ្ងៃព្រហស្បតិ៍ថា កម្មវិធីនេះ «ឆ្លុះបញ្ចាំងការវិវត្តនៃទំនាក់ទំនងរបស់យើងជាមួយប្រទេសចិន»។ លោកបន្តថា៖ «ការចូលរួមរបស់យើងនឹងជាការជ្រើសរើសកាន់តែខ្លាំងឡើង»។
គោលជំហរសាធារណៈរបស់លោក ត្រាំ ធ្វើឡើងក្នុងគ្រាដែលការចរចារវាងទីក្រុងវ៉ាស៊ីនតោន និងទីក្រុងប៉េកាំងដែលស្វែងរកការបញ្ចប់សង្គ្រាមពាណិជ្ជកម្មរយៈពេល ១៨ ខែ របស់លោកប្រធានាធិបតីអាមេរិកដែលមានគោលបំណងក្នុងការបង្ខំឲ្យចិនធ្វើសម្បទានចំពោះការការពារក្រុមហ៊ុនអាមេរិក និងកាត់បន្ថយអតិរេកពាណិជ្ជកម្មរបស់ខ្លួន។
មានភាពមិនច្បាស់លាស់ដ៏ធំមួយអំពីកាលបរិច្ឆេទនៃកិច្ចព្រមព្រៀងដោយផ្នែកដែលអាចធ្វើឡើង ដែលលោក ត្រាំ បានឲ្យដឹងថានឹងកើតឡើងនៅខែតុលា៕ LA