ក្រុងវ៉ាស៊ីនតោនៈ តម្លៃប្រេងឆៅត្រូវបានរំពឹងថានឹងកើនឡើង ២៣ ភាគរយក្នុងឆ្នាំនេះក្នុងគ្រាដែលមានកំណើនសេដ្ឋកិច្ចខ្ពស់ ខណៈតម្លៃដែកក៏កំពុងកើនឡើងផងដែរដោយសារភាពតានតឹងផ្នែកពាណិជ្ជកម្ម។ នេះបើយោងតាមធនាគារពិភពលោក (WB) កាលពីថ្ងៃអង្គារ។
ធនាគារពិភពលោកបានដំឡើងការព្យាកររបស់ខ្លួនអំពីតម្លៃប្រេងរហូតដល់តម្លៃជាមធ្យម ៦៥ ដុល្លារក្នុងមួយបារ៉ែលក្នុងឆ្នាំនេះ និងនៅឆ្នាំក្រោយពីតម្លៃ ៥៣ ដុល្លារកាលពីឆ្នាំមុនមួយផ្នែកគឺដោយសារ «ហានិភ័យផ្នែកភូមិសាស្ត្រនយោបាយដែលកំពុងកើនឡើង»។
របាយការណ៍របស់ធនាគារពិភពលោកបានឲ្យដឹងថា តម្លៃលោហៈរំពឹងថានឹងកើនឡើង ៩ ភាគរយនៅឆ្នាំ ២០១៨ ហើយទន្ទឹមនឹងនោះដែរតម្លៃកសិផលអាចនឹងកើនឡើង ២ ភាគរយ។ ករណីទាំង ២ នេះសុទ្ធតែបានរងផលប៉ះពាល់ពីជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។
ធនាគារពិភពលោកបានរំឭកថា៖ «សកម្មភាពគោលនយោបាយដែលស្ថិតក្រោមកិច្ចពិភាក្សានាពេលថ្មីៗនេះដូចជាការដកពន្ធបន្ថែម ការកាត់បន្ថយផលិតកម្ម និង ទណ្ឌកម្មមួយចំនួនបង្ហាញពីហានិភ័យចំពោះចក្ខុវិស័យក្នុងរយៈពេលខ្លី»។
ការស្ទុះងើបឡើងវិញនៃសេដ្ឋកិច្ចសកលជាបន្ត ជាមួយនឹងកំណើនសេដ្ឋកិច្ចដែលបានកើនឡើង ៣,១ ភាគរយកាលពីឆ្នាំមុន ហើយត្រូវបានរំពឹងថាអាចនឹងកើនឡើងកាន់តែខ្ពស់នៅឆ្នាំនេះនោះ បានជំរុញតម្លៃប្រេងដែលបានកើនឡើង ១០ ភាគរយនៅត្រីមាសទី ១។
របាយការណ៍ដដែលនេះបានបញ្ជាក់ថា ក្តីបារម្ភអំពីភូមិសាស្ត្រនយោបាយដែលកំពុងកើនឡើង ជាពិសេសអំពីចក្ខុវិស័យចំពោះការដាក់ទណ្ឌកម្មជាថ្មីលើប្រទេសអ៊ីរ៉ង់ និងភាពតានតឹងរវាងប្រទេសអ៊ីរ៉ង់ និងអារ៉ាប៊ីសាអ៊ូឌីត ក្នុងប្រទេសយេម៉ែនក៏បានជំរុញតម្លៃប្រេងផងដែរកាលពីខែមីនា។ ប្រេងបានកើនឡើងដល់ ៧៤ ដុល្លារក្នុង ១ បារ៉ែលនៅខែមេសា។
លោក John Baffes សេដ្ឋវិទូជាន់ខ្ពស់ប្រចាំធនាគារពិភពលោក និងជាអ្នកដឹកនាំសរសេររបាយការណ៍នេះបានថ្លែងថា៖ «តម្លៃប្រេងបានកើនឡើងជាងទ្វេដង គិតចាប់តាំងពីបានធ្លាក់ថ្លៃខ្លាំងកាលពីដើមឆ្នាំ ២០១៦ ខណៈសន្និធិប្រេងបានធ្លាក់ចុះខ្លាំង»។
ផលិតកម្មត្រូវបានកាត់បន្ថយផងដែរ ដែលកត្តានេះក៏បានជំរុញឲ្យតម្លៃប្រេងកើនឡើងផងដែររួមមាន ការកាត់បន្ថយទិន្នផលប្រេងរបស់ក្រុមប្រទេសនាំចេញប្រេងដែលជាសមាជិក និងមិនមែនជាសមាជិករបស់អង្គការ OPEC ក៏ដូចជាវិធានការរបស់ចិនក្នុងការកាត់បន្ថយការផលិតដែក និងថាមពលដែលកំពុងបំពុលបរិស្ថាន។
លោក Baffes ថ្លែងថា៖ «តម្រូវការប្រេងខ្ពស់ និងការគោរពកាន់តែខ្លាំងរបស់ក្រុមប្រទេសផលិតប្រេងដែលជាសមាជិក និងមិនមែនជាសមាជិករបស់អង្គការ OPEC តាមការសន្យារបស់ខ្លួនស្តីពីទិន្នផលប្រេងដែលបានព្រមព្រៀងគ្នាបានជួយទប់ស្កាត់ទីផ្សារមិនឲ្យធ្លាក់ចូលក្នុងឱនភាព»។
ភាពតានតឹងផ្នែកពាណិជ្ជកម្មរវាងសហរដ្ឋអាមេរិក និងចិនដែលបានផ្ទុះឡើងនៅពេលលោកប្រធានាធិបតី អាមេរិក ដូណាល់ ត្រាំ បានហូតពន្ធខ្ពស់លើការនាំចូលដែកថែប និងអាលុយមីញ៉ូមកាលពីខែមុនបានធ្វើឲ្យប៉ះពាល់ដល់តម្លៃលោហៈទាំងអស់។
របាយការណ៍ដដែលនេះបានឲ្យដឹងថា តម្លៃអាលុយមីញ៉ូមបានកើនឡើងជាបន្តបន្ទាប់ដល់តម្លៃខ្ពស់បំផុតក្នុងរយៈពេល ៧ ឆ្នាំ បន្ទាប់ពីមានទណ្ឌកម្មរបស់អាមេរិកលើក្រុមហ៊ុនផលិតអាលុយមីញ៉ូមធំជាងគេរបស់រុស្ស៊ីដែលមានទំហំជាង ៦ ភាគរយនៃការផ្គត់ផ្គង់ពិភពលោក។
តម្លៃនីកែលក៏បានកើនឡើងផងដែរនៅពេលមានក្តីបារម្ភថា ទណ្ឌកម្មអាចនឹងបន្តអនុវត្តចំពោះក្រុមហ៊ុនផលិតកម្មរបស់រុស្ស៊ីផ្សេងទៀត ដោយសារប្រទេសនេះផលិតនីកែល ៩ ភាគរយនៃសន្និធិនីកែលពិភពលោក៕ BP