.jpg)
អ្នកស្រី Claire Honore Hollweg។ រូបថត សហការី
ភ្នំពេញៈ ខណៈជំងឺកូវីដ ១៩ នៅតែគំរាមកំហែងសេដ្ឋកិច្ចពិភពលោក មេដឹកនាំទាំងអស់កំពុងព្យាយាមក្នុងការជម្នះលើហានិភ័យចំពោះសេដ្ឋកិច្ច និងពង្រឹងសុខុមាលភាពសង្គមខ្លួនតាមរយៈការដាក់ចេញនូវកញ្ចប់ថវិកាផ្សេងៗ។ ជាមួយគ្នានេះរដ្ឋាភិបាលកម្ពុជាក៏បានដាក់ចេញនូវកញ្ចប់ថវិកា និងការលើកទឹកចិត្តពន្ធជុំទី ៤ រួចមកហើយ ដោយគិតជាទឹកប្រាក់មានជាង ២ ពាន់លានដុល្លារ ដើម្បីកែលម្អវិស័យសុខាភិបាល បរិយាកាសអាជីវកម្ម និងវិនិយោគ ជាពិសេសសហគ្រាសធុនតូច និងមធ្យម។
លោកស្រី Claire Honore Hollweg សេដ្ឋវិទូជាន់ខ្ពស់របស់ធនាគារពិភពលោកនៅកម្ពុជា (WB) បានជួបសម្ភាសជាមួយអ្នកយកព័ត៌មានកាសែតភ្នំពេញប៉ុស្តិ៍ ដើម្បីពិភាក្សាអំពីផលប៉ះពាល់ដោយសារការរីករាលដាលជំងឺកូវីដ១៩ គោលនយោបាយឆ្លើយតបរបស់រដ្ឋាភិបាល និងតួនាទី WB ក្នុងការជួយដល់កម្ពុជា។
ខណៈការរីករាលដាលកូវីដ ១៩ ប៉ះពាល់ដល់សេដ្ឋកិច្ចពិភពលោក និងតំបន់ ជាពិសេសប្រទេសដែលពឹងផ្អែកលើការនាំចេញដូចជាកម្ពុជា តើ WB មើលឃើញយ៉ាងណាដែរចំពោះផលប៉ះពាល់លើសេដ្ឋកិច្ចរបស់កម្ពុជានៅឆ្នាំនេះ?
ដូចបណ្ដាប្រទេសផ្សេងទៀតក្នុងតំបន់ កម្ពុជាគឺមានសេដ្ឋកិច្ចបើកចំហ។ កំណើនសេដ្ឋកិច្ច និងការធ្វើសមាហរណកម្មពិភពលោកបានដើរទន្ទឹមគ្នា ដែលកំណើនសេដ្ឋកិច្ចត្រូវបានទ្រទ្រង់ដោយការនាំចេញទំនិញ សេវាជាច្រើន និងលំហូរចូលជាប្រចាំនៃមូលធនបរទេស។
ជំងឺកូវីដ១៩ កំពុងធ្វើឲ្យធ្លាក់ចុះនូវតម្រូវការពិភពលោក ការរំខានចង្វាក់ផ្គត់ផ្គង់ ការប្រែប្រួលទីផ្សារហិរញ្ញវត្ថុ និងសកម្មភាពសេដ្ឋកិច្ចក្នុងស្រុកកាន់តែទាបទៅៗ វាក៏បង្កផលប៉ះពាល់ខ្លាំងដល់កម្ពុជាផងដែរ។ បន្ទាប់ពីការប្រឈមនឹងកង្វះវត្ថុធាតុដើមក្នុងឧស្សាហកម្មកាត់ដេរ នៅពេលនេះកំពុងប្រឈមនឹងវិបត្តិតម្រូវការពិភពលោកចំពេលនៃការធ្លាក់ចុះការបញ្ជាទិញ និងការនាំចេញ។
វិស័យទេសចរណ៍ត្រូវរងផលប៉ះពាល់យ៉ាងខ្លាំងតាមរយៈការធ្លាក់ចុះដ៏ច្រើននៃភ្ញៀវទេសចរបរទេស។ មានសញ្ញាថា វិស័យអចលនទ្រព្យដែលពឹងផ្អែកខ្លាំងលើការវិនិយោគផ្ទាល់ពីបរទេសក៏ថមថយដែរ។
ដើម្បីកាត់បន្ថយហានិភ័យ និងស្ថិរភាពកំណើនសេដ្ឋកិច្ច រដ្ឋាភិបាលបានផ្ដល់ការលើកទឹកចិត្តផ្នែកពន្ធដារដល់វិស័យរងផលប៉ះពាល់ខ្លាំងបំផុតដូចជា កាត់ដេរ ទេសចរណ៍ និងអាកាសចរណ៍។ តើអ្នកស្រីធ្វើការវិនិច្ឆ័យយ៉ាងណាចំពោះវិធានការបែបនោះ?
ការអនុវត្តវិធានការនានាគឺបង្ហាញថា រដ្ឋាភិបាលកំពុងឆ្លើយតបតាមរយៈការគាំទ្រក្នុងការគ្រប់គ្រងផលប៉ះពាល់នៅពេលបច្ចុប្បន្នក្នុងវិស័យដែលរងផលប៉ះពាល់ និងដើម្បីធានាស្ថិរភាពសេដ្ឋកិច្ច និងសង្គម។
ការលើកទឹកចិត្តពន្ធគឺពិតណាស់នឹងជួយភ្លាមៗដល់ក្រុមហ៊ុនក្នុងវិស័យសំខាន់ៗសេដ្ឋកិច្ចដែលរងផលប៉ះពាល់ដោយសារវិបត្តិកូវីដ១៩។
ថ្មីៗនេះរដ្ឋាភិបាលបានដាក់ចេញនូវកញ្ចប់ថវិកាជុំទី ៤ ជាអ្វីដែលហៅថា កម្មវិធីជំនួយសង្គមដែលនឹងផ្ទេរប្រាក់មួយចំនួនដល់គ្រួសារទទួលរងផលប៉ះពាល់ និងផ្ដល់ការបណ្ដុះបណ្ដាលវគ្គខ្លីៗសម្រាប់ជំនាញដល់កម្មកររងផលប៉ះពាល់។ តើអ្នកស្រីយល់យ៉ាងណា?
ក្នុងអំឡុងពេលការធ្លាក់ចុះសេដ្ឋកិច្ច វិធានការជំនួយសង្គមដ៏រឹងមាំអាចជួយការពារប្រជាជនមិនឲ្យងាយធ្លាក់ទៅក្នុងភាពក្រីក្រ។ យើងយល់ស្របចំពោះវិធានការដែលរដ្ឋាភិបាលកំពុងធ្វើដើម្បីជួយដល់ប្រជាជនដែលរងផលប៉ះពាល់ខ្លាំងបំផុត ហើយក៏ជួយដល់សកម្មភាពសេដ្ឋកិច្ច និងការកែលម្អសុខភាពសាធារណៈផងដែរ។
ការអភិវឌ្ឍប្រព័ន្ធជំនួយសង្គមដែលអាចសម្របខ្លួននឹងវិបត្តិគឺស្រដៀងនឹងលក្ខណពិសេសនៃសេដ្ឋកិច្ចដ៏រឹងមាំ និងជំនួយសង្គម ការបណ្ដុះបណ្ដាលជំនាញឡើងវិញ លើសពីនេះដើម្បីការកាត់បន្ថយវិបត្តិបន្ទាន់អាចលើកកម្ពស់ការអភិវឌ្ឍធនធានមនុស្ស ការជំរុញផលិតភាព និងកំណើនសេដ្ឋកិច្ចរយៈពេលវែង។
តើ WB ផ្ដល់អនុសាសន៍អ្វីខ្លះក្នុងការស្ដារសេដ្ឋកិច្ចកម្ពុជា បន្ទាប់ពីជំងឺកូវីដ១៩?
របាយការណ៍ WB កាលពីពេលថ្មីៗនេះបានផ្ដល់អនុសាសន៍ថា ជម្រើសគោលនយោបាយឆ្លើយតបនឹងការរីករាលដាលជំងឺកូវីដ ១៩ ត្រូវតែមានគោលបំណងដើម្បីផ្ដល់ជំនួយសេដ្ឋកិច្ចបន្ទាន់ និងការការពារសុខភាពសាធារណៈ គាំទ្រដល់ការស្ទុះងើបឡើងវិញនៃសេដ្ឋកិច្ចក្នុងរយៈពេលខ្លី និងជំរុញម៉ាក្រូសារពើពន្ធ និងភាពធន់នៃសង្គមក្នុងរយៈពេលមធ្យម។
WB កំពុងគាំទ្រកម្ពុជាក្នុងការដោះស្រាយប្រកបដោយប្រសិទ្ធភាពនៃវិបត្តិកូវីដ១៩ និងពង្រឹងដល់សេដ្ឋកិច្ចប្រទេសនេះសម្រាប់ការស្ទុះងើបឡើងវិញជាមួយភាពរឹងមាំនៅពេលអនាគត។ ថ្មីៗនេះ WB បានអនុម័ត និងពិនិត្យគម្រោងមួយចំនួនដើម្បីជួយដល់កម្ពុជាជាកិច្ចខិតខំប្រឹងប្រែងក្នុងការការពារ ការស្វែងរក និងការឆ្លើយតបនឹងការគំរាមដែលបង្កឡើងដោយជំងឺកូវីដ ១៩ និងពង្រឹងប្រព័ន្ធជាតិសម្រាប់ការរៀបចំសុខភាពសាធារណៈ។
តើ WB ព្យាករយ៉ាងណាសម្រាប់សេដ្ឋកិច្ចកម្ពុជាក្នុងឆ្នាំនេះ និងឆ្នាំក្រោយ?
ខណៈកំណើនផលិតផលក្នុងស្រុកពិតមានភាពរឹងមាំ ៧,១ ភាគរយ កាលពីឆ្នាំ ២០១៩ ការរីករាលដាលកូវីដ ១៩ ទូទាំងពិភពលោកបានបណ្ដាលឲ្យមានធ្លាក់ចុះយ៉ាងខ្លាំងនៅក្នុងក្បាលម៉ាស៊ីនកំណើនសេដ្ឋកិច្ចសំខាន់របស់កម្ពុជានៅត្រីមាសទី ១ នេះ។ កំណើនពិតត្រូវបានព្យាករថា នឹងធ្លាក់ចុះយ៉ាងខ្លាំងមកនៅ ១,០ ភាគយក្នុងឆ្នាំ ២០២០ ធៀបនឹងការព្យាករលើកមុនចំនួន ៦,៨ ភាគរយ ដោយសារតែការធ្លាក់ចុះការនាំចេញ និងលំហូរទេសចរណ៍ និងការថមថយល្បឿនសកម្មភាពសាងសង់ជាដើម។
ម្យ៉ាងទៀតការកែលម្អសកម្មភាពសេដ្ឋកិច្ចក្នុងទីផ្សារសំខាន់ៗត្រូវរំពឹងថា នឹងកាន់តែប្រសើរក្នុងឆ្នាំ ២០២១ ដែលជួយធ្វើឲ្យកាន់តែប្រសើរឡើងនៃចក្ខុវិស័យកំណើនសេដ្ឋកិច្ចរបស់កម្ពុជានៅឆ្នាំក្រោយ ហើយត្រូវបានព្យាករថា នឹងកើនឡើងដល់ ៦ ភាគរយ៕ LA
