ភ្នំពេញ: ធនាគារឯកទេសវីង (ខេមបូឌា) និងធនាគារហ្វីលីពកាលពីថ្ងៃចន្ទ បានប្រកាសភាពជាដៃគូជាផ្លូវការដើម្បីផ្ដល់ការទូទាត់កម្ចីតាមរយៈវីង និងជាវិធានការ ១ ផ្សេងទៀតសម្រាប់គ្រឹះស្ថានទាំង ២ ក្នុងការជំរុញការទូទាត់ឌីជីថលចំពេលការរីករាលដាលជំងឺកូវីដ ១៩។
តាមរយៈភាពជាដៃគូនេះ អតិថិជនធនាគារហ្វីលីពនៅពេលនេះអាចធ្វើការទូទាត់សងប្រាក់កម្ចីតាមរយៈបណ្ដាញភ្នាក់ងារវីងដែលមានជាង ៨ ០០០ កន្លែងនៅទូទាំងប្រទេសកម្ពុជា។
លោក Han Peng Kwang អគ្គនាយករងធនាគារហ្វីលីពបានឲ្យដឹងថា កិច្ចសហការនេះនឹងជាការលើកកម្ពស់បន្ថែមទៀតដល់ប្រតិបត្តិការអាជីវកម្មរបស់ធនាគារនេះ និងដើម្បីផ្ដល់សេវាកាន់តែប្រសើរសម្រាប់អតិថិជន។ លោកថា៖ «ការសហការគ្នានេះ អតិថិជនធនាគារហ្វីលីពនៅពេលនេះនឹងមានជម្រើសផ្សេងទៀតក្នុងការសងប្រាក់កម្ចីរបស់ពួកគេកាន់តែមានភាពងាយស្រួល ដោយមិនចាំបាច់ធ្វើដំណើរមកដល់សាខាធនាគារនោះទេ»។
លោកបន្តថា៖ «ភាពជាដៃគូនេះនឹងជួយជំរុញបន្ថែមទៀតដល់គោលដៅរបស់ធនាគារក្នុងការផ្ដល់ជូនផលិតផល និងសេវាកម្មបែបឌីជីថលដល់អតិថិជនគ្រប់គ្នារាប់ចាប់ពីអាជីវកម្មខ្នាតតូចរហូតដល់ឯកត្តជន និងមធ្យម និងសាជីវកម្មធំៗផងដែរ»។
លោក Manu Rajan អគ្គនាយកនៃធនាគារឯកទេសវីងបានឲ្យដឹងថា ភាពជាដៃគូនេះឆ្លុះបញ្ចាំងពីកិច្ចខិតខំប្រឹងប្រែងឥតឈប់ឈររបស់យើង ដើម្បីផ្ដល់ភាពងាយស្រួលដល់ប្រជាជនកម្ពុជាទាំងអស់ក្នុងការទទួលបានសេវាហិរញ្ញវត្ថុដែលអាចជួយពួកគេអភិវឌ្ឍ និងកសាងអនាគតដ៏ប្រសើរ។
លោកលើកឡើងថា៖ «ខ្ញុំពិតជារីករាយដែលយើងអាចផ្ដល់នូវដំណោះស្រាយទូទាត់ប្រាក់ទាំងនេះ ដើម្បីជួយប្រជាជនក្នុងអំឡុងពេលមានជំងឺកូវីដ ១៩ នេះ»៕ LA