.jpg)
លោក Roberto Azevedo ថ្លែងសុន្ទរកថានៅប្រទេសបារាំងកាលពីខែមុន។ រូបថត AFP
ក្រុងវ៉ាស៊ីនតោនៈ ប្រធានអង្គការពាណិជ្ជកម្មពិភពលោក (WTO) បានព្រមានក្នុងសុន្ទរកថាមួយកាលពីថ្ងៃពុធថា ប្រទេសទាំងអស់នឹងខាតបង់ដោយសារសង្គ្រាមពាណិជ្ជកម្មពិភពលោក។
ស្ថិតក្រោមការវាយប្រហារពីលោកប្រធានាធិបតីអាមេរិក ដូណាល់ ត្រាំ លោក Roberto Azevedo ប្រធានអង្គការ WTO បានទទួលស្គាល់ថា កំណែទម្រង់ត្រូវធ្វើចាំបាច់ ប៉ុន្តែបានច្រានចោលការរិះគន់ថា ពាណិជ្ជកម្មគឺជាមូលហេតុចម្បងនៃការបាត់បង់ការងារ។
លោក Azevedo បានស្វាគមន៍ការប្ដេជ្ញាចិត្ត ដោយក្រុមប្រទេស G20 កាលពីចុងសប្ដាហ៍នៅទីក្រុងប៊ុយណូស៊ែ ក្នុងការកែទម្រង់ WTO ដើម្បីទទួលខុសត្រូវកាន់តែប្រសើរលើប្រព័ន្ធពាណិជ្ជកម្មទំនើប ដោយថ្លែងថា «ប្រព័ន្ធនេះអាចកាន់តែប្រសើរឡើង»។
ប៉ុន្តែខណៈដែលរដ្ឋបាល លោក ត្រាំ បានហូតពន្ធនាំចូលដោយងងើលលើដៃគូពាណិជ្ជកម្មជាច្រើន ជាពិសេសលើប្រទេស ចិន ដោយមានគោលដៅកាត់បន្ថយឱនភាពពាណិជ្ជកម្មអាមេរិក លោក Azevedo ថ្លែងថា៖ «យើងត្រូវតែចាកឲ្យឆ្ងាយពីគំនិតដែលថា ពាណិជ្ជកម្មគឺជាការផែនការយកឈ្នះចាញ់»។
លោកបានឲ្យដឹងក្នុងសុន្ទរកថាមួយថ្លែងទៅកាន់ក្រុមប្រឹក្សាពាណិជ្ជកម្មបរទេសថា៖ «វាមិនមែនទេ។ មនុស្សគ្រប់គ្នាអាចទទួលបានអត្ថប្រយោជន៍»។
លោកបានស្វាគមន៍ការសម្រេចបញ្ឈប់វិធានការពន្ធរបស់អាមេរិក និងចិន និងការប្ដេជ្ញាចិត្តក្នុងការសម្រេចបានកិច្ចព្រមព្រៀងមួយ ដើម្បីដោះស្រាយជម្លោះរវាងប្រទេសមានសេដ្ឋកិច្ចធំជាងគេទាំង ២ របស់ពិភពលោកនេះ។
លោកបញ្ជាក់ថា ជម្រើសនៃការបង្កើនជម្លោះពាណិជ្ជកម្ម នឹងធ្វើឲ្យប៉ះពាល់ដល់ការស្ទុះងើបឡើងវិញនៃសេដ្ឋកិច្ចពិភពលោក។
លោក Azevedo ថ្លែងថា៖ «លទ្ធផលដែលកើតមានពីការចាត់វិធានការទៅវិញទៅមកនេះគឺថា កំណើនពាណិជ្ជកម្ម និងសេដ្ឋកិច្ច នឹងថមថយល្បឿន និងថា បណ្ដាប្រទេសទាំងអស់ ដោយគ្មានប្រទេសណាអាចចៀសផុត នឹងខាតបង់ដោយសារតែសង្គ្រាមពាណិជ្ជកម្មពិភពលោក»។
លោក Azevedo ទទួលស្គាល់ការបារម្ភកាន់តែខ្លាំងឡើងចំពោះសេដ្ឋកិច្ចដែលប្រែប្រួល ប៉ុន្តែបានបញ្ជាក់ថា ភាគច្រើននៃការបាត់បង់ការងារ គឺដោយសារតែការផ្លាស់ប្តូរបច្ចេកវិទ្យា មិនមែនពាណិជ្ជកម្មទេ។
លោកថ្លែងថា ពាណិជ្ជកម្មជា «ក្បាលម៉ាស៊ីនសេដ្ឋកិច្ច ផលិតភាព នវានុវត្តន៍ ការបង្កើតការងារ»៕ AFP/LA
