ក្រុងហ្សឺណែវៈ ក្រុមការងារដោះស្រាយជម្លោះរបស់អង្គការពាណិជ្ជកម្មពិភពលោក (WTO) កាលពីថ្ងៃចន្ទបានរកឃើញថា សហភាពអឺរ៉ុបបានបរាជ័យក្នុងការជម្រុះចោលការឧបត្ថម្ភធនខុសច្បាប់ដល់ក្រុមហ៊ុន Airbus ដែលកំពុងស្ថិតនៅចំណុចផ្តោតនៃជម្លោះដ៏ជូរចត់រវាងទីក្រុងវ៉ាស៊ីនតោន និងទីក្រុងប្រ៊ុចសែល។
ការរកឃើញនេះជួយពង្រឹងដល់សេចក្តីសម្រេចរបស់អង្គការ WTO ដែលបានចេញផ្សាយកន្លងមកដែលបានអនុញ្ញាតឲ្យសហរដ្ឋអាមេរិកចាត់វិធានការតបតវិញជាមួយការដកពន្ធលើទំនិញតម្លៃ ៧,៥ ពាន់លានដុល្លារដែលនាំចូលពីអឺរ៉ុប។
ទីក្រុងប្រ៊ុចសែលឲ្យដឹងថា ខ្លួនមិនបដិសេធប្តឹងឧទ្ធរណ៍ឡើយ ខណៈទីក្រុងវ៉ាស៊ីនតោនបានដឹងថា សេចក្តីសម្រេចនេះបានបង្ហាញថា «វិធានការខ្លាំង» ត្រូវការជាចាំបាច់ ដើម្បីជំរុញការផ្លាស់ប្តូរគោលនយោបាយរបស់សហភាពអឺរ៉ុប។
សេចក្តីសម្រេចកាលពីខែមុនរបស់អង្គការ WTO ដែលជាសេចក្តីសម្រេចធំបំផុតក្នុងប្រវត្តិសាស្ត្ររបស់អង្គការនេះ គឺជាចំណុចដ៏សំខាន់មួយក្នុងជម្លោះផ្លូវច្បាប់រយៈពេល ១៥ ឆ្នាំរវាងក្រុមហ៊ុនផលិតយន្តហោះ Airbus របស់អឺរ៉ុប និងក្រុមហ៊ុនផលិតយន្តហោះ Boeing របស់អាមេរិក។
សេចក្តីសម្រេចនេះបានកើតឡើងជាការតបតទៅនឹងការឧបត្ថម្ភធន និងការគាំទ្រផ្សេងទៀតដែលត្រូវបានផ្តល់ទៅឲ្យក្រុមហ៊ុន Airbus ដោយរដ្ឋាភិបាលដែលជាសមាជិកសហភាពអឺរ៉ុបដែលរំលោភច្បាប់ពាណិជ្ជកម្មពិភពលោក។
ក្រុមការងារដោះស្រាយជម្លោះបឋមបានរកឃើញថា សហភាពអឺរ៉ុបកំពុងរំលោភច្បាប់ ប៉ុន្តែនៅឆ្នាំមុន ទីក្រុងប្រ៊ុចសែលបានស្នើឲ្យមានការពិនិត្យមើលឡើងវិញ ដោយលើកឡើងថា ខ្លួនបានកែសម្រួលឥរិយាបថរបស់ខ្លួនហើយ។
ក្នុងសេចក្តីសម្រេចកាលពីថ្ងៃអង្គារម្សិលមិញ ក្រុមការងារដោះស្រាយជម្លោះទី ២ បានបញ្ជាក់ថា សហភាពអឺរ៉ុបនៅតែកំពុងផ្តល់ការគាំទ្រមិនសមស្របដល់ Airbus ដដែល។
ក្រុមការងារដោះស្រាយជម្លោះទី ២ បានឲ្យដឹងថា៖ «សហភាពអឺរ៉ុប និងរដ្ឋជាសមាជិកមួយចំនួនមិនបានអនុវត្តអនុសាសន៍ និងសាលក្រមរបស់ស្ថាប័នដោះស្រាយជម្លោះ (DSB) ដើម្បីនាំយកវិធានការរបស់ខ្លួនឲ្យស្របតាមកាតព្វកិច្ចរបស់ខ្លួនឡើយ»។
ហេតុដូច្នេះ ក្រុមការងារនេះបានរកឃើញថា សាលក្រមដែលចេញកន្លងមកក្នុងករណីនេះដែលបានត្រួសត្រាយផ្លូវឲ្យមានការដាក់ពិន័យដោយអាមេរិកជាប្រវត្តិសារនោះ «នៅតែមានប្រសិទ្ធភាព»។
អ្នកនាំពាក្យគណៈកម្មការអឺរ៉ុបថ្លែងថា៖ «ក្រុមការងារនេះបានបង្កើតកំហុសផ្នែកច្បាប់ធ្ងន់ធ្ងរមួយចំនួនក្នុងការវាយតម្លៃរបស់ខ្លួនលើអនុលោមភាពរបស់អឺរ៉ុប»៕ KC