.jpg)
លោក Nabeshima Katsuhito (ឆ្វេង) អគ្គនាយកក្រុមហ៊ុន Yamato Green ក្នុងជំនួបជាមួយនឹងលោក ថោង ខុន រដ្ឋមន្ត្រីក្រសួងទេសចរណ៍ កាលពីថ្ងៃចន្ទ។ រូបថត ក្រសួងទេសចរណ៍
ភ្នំពេញ: ក្រុមហ៊ុន Yamato Green Co.,Ltd របស់ជប៉ុនមានផែនការវិនិយោគលើវិស័យកសិទេសចរណ៍នៅប្រទេសកម្ពុជា ដើម្បីរួមចំណែកលើកកម្ពស់វិស័យទេសចរណ៍ដែលកំពុងរងផលប៉ះពាល់យ៉ាងខ្លាំងពីការរាតត្បាតជាសកលនៃជំងឺកូវីដ ១៩។
ព័ត៌មាននេះត្រូវបានលើកឡើងក្នុងឱកាសនៃជំនួបពិភាក្សាមួយរវាងលោក Nabeshima Katsuhito អគ្គនាយកក្រុមហ៊ុន Yamato Green ជាមួយនឹងលោក ថោង ខុន រដ្ឋមន្ត្រីក្រសួងទេសចរណ៍នៅទីស្តីការក្រសួងទេសចរណ៍កាលពីថ្ងៃចន្ទ។
លោក ថោង ខុន បានណែនាំឱ្យក្រុមហ៊ុនគួរសម្លឹងមើលឱកាសវិនិយោគនៅក្នុងខេត្តសៀមរាប និងកំពង់ធំដែលជាតំបន់មានសក្តានុពលសម្រាប់ការវិនិយោគលើវិស័យកសិទេសចរណ៍ និងអេកូទេសចរណ៍។ លោកលើកឡើងថា នៅក្នុងអំឡុងពេលការរីករាលដាលជំងឺកូវីដ ១៩ ក្រសួងបានយកចិត្តទុកដាក់ និងជំរុញលើកទឹកចិត្តដល់វិស័យឯកជនលើការវិនិយោគលើវិស័យអេកូទេសចរណ៍ និងកសិទេសចរណ៍។
លោកថ្លែងថា៖ «យើងបានឯកភាពគ្នានឹងរៀបចំចុះហត្ថលេខាលើអនុស្សរណៈយោគយល់គ្នានៅពេលខាងមុខ ដើម្បីជំរុញឱ្យកិច្ចសហការគ្នាប្រព្រឹត្តទៅប្រកបដោយភាពជោគជ័យសម្រាប់ជាប្រយោជន៍ដល់ភាគីទាំង ២»។
លោក Katsuhito និយាយថា តាមរយៈគម្រោងខ្សែក្រវាត់បៃតង (Green Belt) ដែលទើបបង្កើតឡើងដោយភាគីកម្ពុជា វានឹងចូលរួមចំណែកយ៉ាងច្រើនក្នុងការលើកកម្ពស់វិស័យទេសចរណ៍ សេដ្ឋកិច្ច និងសង្គមកម្ពុជា។
លោកថ្លែងថា៖ «ក្រុមហ៊ុននឹងធ្វើឱ្យផលិតផលកសិកម្មកម្ពុជាក្លាយទៅជាកសិទេសចរណ៍ ដែលភ្ញៀវទេសចរជាតិ និងអន្តរជាតិអាចទទួលទានអាហារដែលមានស្រាប់នៅតាមតំបន់ទេសចរណ៍នីមួយៗប្រកបដោយសុវត្ថិភាព ហើយពួកគេក៏អាចចូលរួមទស្សនាបច្ចេកទេសនៃការដាំដុះ និងថែទាំដំណាំបន្លែផងដែរ»។
អ្នកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា ទោះជាវិស័យទេសចរណ៍កម្ពុជាកំពុងបន្តរងផលប៉ះពាល់ខ្លាំងពីការរាតត្បាតជំងឺកូវីដ ១៩ ប៉ុន្តែវិស័យនេះនៅតែមានសក្តានុពលសម្រាប់ទាក់ទាញការវិនិយោគពីក្រៅប្រទេស។ អ្នកស្រីបន្តថា គម្រោងវិនិយោគនេះនឹងជួយបង្កើតផលិតផលថ្មីៗបន្ថែមទៀតដើម្បីបម្រើវិស័យទេសចរណ៍នៅកម្ពុជា។
អ្នកស្រីបានថ្លែងថា៖ «ការទាក់ទាញគម្រោងវិនិយោគនេះដោយសារប្រទេសយើងមានសក្តានុពលលើវិស័យទេសចរណ៍ និងកសិកម្មស្របពេលនិន្នាការរបស់ភ្ញៀវទេសចរចង់ទៅទស្សនាតំបន់រមណីយដ្ឋានបែបកសិទេសចរណ៍ ជាជាងទៅមើលតំបន់វប្បធម៌ទេសចរណ៍ជាដើម»។
កាលពីខែកក្កដា ក្រុមហ៊ុន Yamato Green បានចុះអនុស្សរណៈនៃការយោគយល់គ្នា (MoU) ជាមួយក្រសួងកសិកម្មក្នុងគោលបំណងដើម្បីអភិវឌ្ឍបន្លែសុវត្ថិភាពសម្រាប់ទីផ្សារក្នុងស្រុក និងការនាំចេញទៅក្រៅប្រទេស។
តាមរយៈការចុះ MoU នេះក្រុមហ៊ុនជប៉ុន ១០ នឹងមកជួយអភិវឌ្ឍគ្រប់ជ្រុងជ្រោយលើខ្សែចង្វាក់ផលិតកម្មបន្លែទៅតាមជំនាញនីមួយៗ។ សព្វថ្ងៃក្រុមហ៊ុនកំពុងទទួលជោគជ័យលើការវិនិយោគលើការដាំបន្លែសុវត្ថិភាពនៅខេត្តបាត់ដំបង និងមណ្ឌលគិរី៕ LA
