The Phnom Penh Post Search

Search form




Logo of Phnom Penh Post newspaper Phnom Penh Post - ខួប​អនុស្សាវរីយ៍​ទី​ ៤១ ​នៃ​ការបង្កើត​ធនាគារជាតិ​នៃ​កម្ពុជា​ឡើងវិញ




ខួប​អនុស្សាវរីយ៍​ទី​ ៤១ ​នៃ​ការបង្កើត​ធនាគារជាតិ​នៃ​កម្ពុជា​ឡើងវិញ

Content image - Phnom Penh Post
ធនាគារជាតិ​នៃ​កម្ពុជា។ ហេង ជីវ័ន

ខួប​អនុស្សាវរីយ៍​ទី​ ៤១ ​នៃ​ការបង្កើត​ធនាគារជាតិ​នៃ​កម្ពុជា​ឡើងវិញ

គិត​ចាប់តាំងពី​ថ្ងៃទី ​១០ ខែ​តុលា ឆ្នាំ​ ១៩៧៩ មក ធនាគារជាតិ​នៃ​កម្ពុជា​ត្រូវបាន​បង្កើត​ឡើងវិញ​អស់​រយៈកាល​ ៤១ ​ឆ្នាំ​ហើយ និង​បាន​ដើរ​តួនាទី​យ៉ាងសំខាន់​ក្នុង​ការអភិវឌ្ឍ​ប្រព័ន្ធ​ធនាគារ​ប្រកប​ដោយ​ប្រសិទ្ធភាព ស្ថិរភាព និង​ចីរភាព​។ ទោះយ៉ាងណា​សាធារណជន​មួយចំនួន​នៅតែ​មាន​ចម្ងល់​ថា តើ​ធនាគារជាតិ​នៃ​កម្ពុ​ជាមាន​តួនាទី​អ្វីខ្លះ​?

ធនាគារជាតិ​នៃ​កម្ពុជា​គឺជា​អាជ្ញាធរ​រូបិយវត្ថុ និង​ត្រួតពិនិត្យ​ប្រព័ន្ធ​ធនាគារ​នៅ​កម្ពុជា​។ ក្នុងនាម​ជា​អាជ្ញាធរ​រូបិយវត្ថុ ធនាគារជាតិ​នៃ​កម្ពុជា​មាន​សិទ្ធិ​ផ្តាច់មុខ​ក្នុងការ​បោះផ្សាយ​ប្រាក់រៀល​ដែលជា​រូបិយវត្ថុ​ជាតិ និង​មាន​តួនាទី​រក្សា​ស្ថិរភាព​តម្លៃ​ប្រាក់រៀល​។ ក្នុង​ន័យ​នេះ​ធនាគារ​ជាតិ​នៃ​កម្ពុជា​ជា​អ្នករៀបចំ​តាក់តែង និង​អនុវត្ត​គោលនយោបាយ​រូបិយវត្ថុ និង​អត្រា​ប្តូរប្រាក់​ដោយ​ពិគ្រោះ​ជាមួយ​រាជរដ្ឋាភិបាល​ក្នុង​ក្របខ័ណ្ឌ​គោលនយោបាយ​សេដ្ឋកិច្ច និង​ហិរញ្ញវត្ថុ​នៃ​ព្រះរាជាណាចក្រ​កម្ពុជា​។ ក្នុង​នាម​ជា​អាជ្ញាធរ​ត្រួតពិនិត្យ ធនាគារ​ជាតិ​នៃ​កម្ពុជា​ជា​អ្នកផ្តល់ និង​ដកហូត​អាជ្ញាប័ណ្ណ តាក់តែង​បទប្បញ្ញត្តិ និង​ត្រួតពិនិត្យ​គ្រឹះស្ថាន​ធនាគារ និង​ហិរញ្ញវត្ថុ​នៅ​កម្ពុជា​។

លើស​ពី​នេះ​ធនាគារជាតិ​នៃ​កម្ពុជា​ធ្វើការ​វិភាគ​ស្ថានភាព​សេដ្ឋកិច្ច និង​រូបិយវត្ថុ​ជាប្រចាំ​ចេញ​ផ្សាយ​របាយការណ៍ និង​ព្រឹត្តបត្រ​ផ្សេងៗ​ត្រួតពិនិត្យ​ប្រព័ន្ធ​ទូទាត់​ជាតិ ដំឡើង​តារាង​ស្ថិតិ​ជញ្ជីងទូទាត់ និង​ចូលរួម​ក្នុង​ការគ្រប់គ្រង​បំណុល និង​ឥណទេយ្យ​ក្រៅប្រទេស ។

ជារួម​ធនាគារជាតិ​នៃ​កម្ពុជា​មាន​តួនាទី​ចម្បង​ ៣៖

​តួនាទី​ចម្បង​ទី​ ១ របស់​ធនាគារជាតិ​នៃ​កម្ពុជា គឺ​រក្សា​ស្ថិរភាព​ថ្លៃ​ដែល​បង្ក​បរិយាកាស​អំណោយផល​ដល់​ការវិនិយោគ ការប្រើប្រាស់ និង​អាជីវកម្ម​នានា​។ ក្នុង​រយៈពេល​ជាង​ ២ ​ទសវត្សរ៍​កន្លងមក​នេះ​តម្លៃ​ប្រាក់រៀល​ត្រូវបាន​រក្សា​នូវ​ស្ថិរភាព​ល្អប្រសើរ ហើយ​បានរួម​ចំណែក​រក្សា​អត្រា​អតិផរណា ដែលជា​សូចនាករ​បង្ហាញ​ពី​កម្រិត​ថ្លៃទំនិញ​ប្រើប្រាស់​ឱ្យ​ស្ថិតនៅ​កម្រិត​ទាប​ប្រមាណ ២,៥% ជា​មធ្យម​ប្រចាំឆ្នាំ​ប៉ុណ្ណោះ​ដែល​ជួយ​រក្សា​បាន​អំណាច​ទិញ​នៃ​ចំណូល​របស់​ប្រជាពលរដ្ឋ​។ នៅពេលដែល​រូបិយវត្ថុ​ជាតិ​បាត់បង់​តម្លៃ ឬ​ប្រែប្រួល​ថ្លៃ​ខ្លាំងពេក វិនិយោគិន​ក្នុងស្រុក និង​អន្តរជាតិ​នឹង​បាត់បង់​ទំនុកចិត្ត​លើ​សេដ្ឋកិច្ច និង​ការគ្រប់គ្រង​រូបិយវត្ថុ​របស់​ប្រទេស​។

តួនាទី​ចម្បង​ទី​ ២ គឺ​ត្រួតពិនិត្យ​ប្រព័ន្ធ​ធនាគារ​។ ប្រព័ន្ធ​ធនាគារ ដើរតួនាទី​យ៉ាងសំខាន់​នៅក្នុង​ការកេណ្ឌ​ប្រមូលប្រាក់​សន្សំ​ទៅ​ផ្ដល់​ឱ្យ​អ្នក​ដែលមាន​តម្រូវការ​ឥណទាន​។ ការធ្វើ​អន្តរការីកម្ម​បែបនេះ ពិតជា​​មាន​សារៈសំខាន់​ណាស់​ក្នុង​ការគាំទ្រ ​និង​ជំរុញ​ការអភិវឌ្ឍ​សេដ្ឋកិច្ច​របស់​ប្រទេសមួយ​។

ក្រុមហ៊ុន​សហគ្រាស​នានា​ដែល​ចង់​ពង្រីក​អាជីវកម្ម​របស់ខ្លួន តែ​មិនមាន​ដើមទុន​គ្រប់គ្រាន់​អាច​ទទួលបាន​ហិរញ្ញប្បទាន​ពី​គ្រឹះស្ថាន​ធនាគារ​ និង​ហិរញ្ញវត្ថុ​តាមរយៈ​ឥណទាន​។ ប៉ុន្តែ​ឥណទាន​នេះ​អាច​ទទួល​បាន​លុះត្រាតែ​សាធារណជន​មាន​ទំនុកចិត្ត​លើ​ប្រព័ន្ធ​ធនាគារ តាមរយៈ​ការដាក់​ប្រាក់​សន្សំ​របស់​ពួកគាត់​នៅក្នុង​គ្រឹះស្ថាន​ធនាគារ និង​ហិរញ្ញវត្ថុ​។ ដូច្នេះ​ធនាគារជាតិ​នៃ​កម្ពុជា​ត្រូវ​ធានា​ឱ្យបាន​ថា​គ្រឹះស្ថាន​ធនាគារ និង​ហិរញ្ញវត្ថុ​មាន​លក្ខណៈ​គ្រប់គ្រាន់​ស័ក្តិសម​នឹង​ទទួល​បាន​ការជឿ​ទុកចិត្ត​ពី​ប្រជាពលរដ្ឋ តាមរយៈ​ការត្រួតពិនិត្យ​ជាប្រចាំ និង​ការធ្វើ​និយតកម្ម​លើ​គ្រឹះស្ថាន​ធនាគារ និង​ហិរញ្ញវត្ថុ​ទាំងនោះ​។ បច្ចុប្បន្ន គ្រឹះស្ថាន​ធនាគារ និង​មីក្រូហិរញ្ញវត្ថុ​បាន​បង្កើន​ចំនួន​ប្រាក់​បញ្ញើ​សរុប​ដល់​ប្រមាណ ១២៩,១ ​ទ្រីលាន​រៀល និង​ឥណទាន​ដល់​ប្រមាណ​ជា​ ១៤១,៨ ​ទ្រីលាន​រៀល​ទៅ​ដល់​សេដ្ឋកិច្ច​។

ការរីកចម្រើន​ឥតឈប់ឈរ​នៃ​ប្រព័ន្ធ​ធនាគារ​បាន​អនុញ្ញាត​ឱ្យ​ប្រជាជន​កម្ពុជា​ជាច្រើន​ប្រើប្រាស់​សេវា​ធនាគារ​កាន់តែ​សម្បូរបែប ដូចជា ឥណទាន​ទិញ​ផ្ទះ​, ឥណទាន​បង់​រំលស់​សម្ភារ​ប្រើប្រាស់​, ការដាក់​ប្រាក់​បញ្ញើ​, សេវា​ផ្ទេរ និង​ទូទាត់​ប្រាក់​,​សេវា​ទូរស័ព្ទ​ចល័ត​កាន់តែ​ងាយស្រួល និង​គ្រប់​ទីកន្លែង​។

តួនាទី​ចម្បង​ទី​ ៣ គឺ​ការត្រួតពិនិត្យ​ប្រព័ន្ធ​ទូទាត់​តាមរយៈ​ការធ្វើ​ទំនើបកម្ម​ហេដ្ឋារចនាសម្ព័ន្ធ​ហិរញ្ញវត្ថុ​ជា​បន្តបន្ទាប់ ដែល​អនុញ្ញាត​ឱ្យ​ប្រព័ន្ធ​ធនាគារ​អាច​ដំណើរការ​បាន​ដោយ​រលូន និង​ប្រកបដោយ​ប្រសិទ្ធភាព​។ ​សេវា​ធនាគារ​តាម​ប្រព័ន្ធ​អេឡិចត្រូនិក ជួយ​សម្រួល​ដល់​ការទូទាត់ ការផ្ទេរ​ប្រាក់ និង​ការដាក់​ប្រាក់​បញ្ញើ ជាដើម​។

ជាមួយ​គ្នា​នេះ​ប្រព័ន្ធ​ទូទាត់​រហ័ស​ជួយ​សម្រួល​ដល់​ប្រតិបត្តិ​ការទូទាត់​ទំនិញ និង​សេវា និង​ការវិនិយោគ​ទាំង​ក្នុងស្រុក និង​អន្តរជាតិ​ប្រកប​ដោយ​សុវត្ថិភាព និង​ប្រសិទ្ធភាព​ខ្ពស់​។ បច្ចុប្បន្ន​ប្រព័ន្ធ​ទូទាត់​តាម​ទូរស័ព្ទ​ចល័ត​នៅ​កម្ពុជា​ទទួលបាន​នូវ​អត្រា​នៃ​ការប្រើប្រាស់​លឿន​ជាងគេ​នៅក្នុង​តំបន់ ហើយ​គណនី​ប្រព័ន្ធ​ទូទាត់​តាម​ទូរស័ព្ទ​ចល័ត​បាន​កើនឡើង​ដល់​ប្រមាណ ៨,២ ​លាន​គណនី ដែល​ប្រជាពលរដ្ឋ​អាច​ទូទាត់ និង​ផ្ញើ​ប្រាក់​ទូទាំងប្រទេស​ និង​ឆ្លងដែន​បាន​ផងដែរ​។ សម្រាប់​ពលករ​រោងចក្រ ប្រព័ន្ធ​ទូទាត់​តាម​ទូរស័ព្ទ​ចល័ត​នេះ​អាចជួយ​ឱ្យ​ពួកគាត់​ផ្ទេរប្រាក់​ទៅ​គ្រួសារ​នៅ​បណ្ដា​ខេត្ត​នានា​បាន​ដោយ​ងាយស្រួល​ឆាប់រហ័ស និង​ចំណាយ​តិច​។

សម្រាប់​រាជរដ្ឋាភិបាល ប្រព័ន្ធ​ទូទាត់​បែបនេះ​ត្រូវ​បាន​ប្រើប្រាស់​សម្រាប់​ការបើកប្រាក់​បៀវត្សរ៍​ជូន​មន្ត្រី​បុគ្គលិក​សាធារណៈ​,​ប្រមូលពន្ធ​, បង់ថ្លៃ​សេវាសាធារណៈ ដូចជា ទឹក ភ្លើង​ជាដើម ដែលជា​លទ្ធផល​អាច​បង្កើន​បាន​នូវ​តម្លាភាព និង​ប្រសិទ្ធភាព​នៅក្នុង​ស្ថាប័ន​សាធារណៈ​ឱ្យ​កាន់តែ​ប្រសើរឡើង​៕

អត្ថបទ​ដោយ​៖ ធនាគារជាតិ​នៃ​កម្ពុជា

អត្ថបទគួរចាប់អារម្មណ៍