.jpg)
ធនាគារ ស៊ិនហាន ជួយអតិថិជនរបស់ខ្លួនប្រមាណ ១៨០ នាក់ក្នុងការសម្រួលប្រាក់កម្ចី និងរៀបចំកាលវិភាគសងត្រឡប់ ដើម្បីជួយបន្ថយការលំបាកផ្នែកហិរញ្ញវត្ថុ។
ធនាគារស៊ិនហាន ខេមបូឌា ភីអិលស៊ី បានដាក់ចេញនូវវិធានការជាក់ស្តែងមួយចំនួនដើម្បីធានាថាអតិថិជនរបស់ខ្លួនមិនខកខានក្នុងការបង់ប្រាក់កម្ចីរបស់ពួកគេក្នុងអំឡុងពេលវិបត្តិជំងឺកូវីដ១៩ ដែលបាននិងកំពុងធ្វើឱ្យប៉ះពាល់ដល់អាជីវកម្មយ៉ាងធ្ងន់ធ្ងរនោះ។
ធនាគារ ស៊ិនហាន បានជួយអតិថិជនរបស់ខ្លួនប្រមាណ ១៨០ នាក់ ក្នុងការសម្រួលប្រាក់កម្ចី និងរៀបចំកាលវិភាគសងត្រឡប់ឡើងវិញ ដើម្បីជួយកាត់បន្ថយការលំបាកផ្នែកហិរញ្ញវត្ថុរបស់ប្រតិបត្តិករអាជីវកម្ម។
«យើងបានសម្រេចដាក់ចេញនូវការរៀបចំរចនាសម្ព័ន្ធប្រាក់កម្ចីសម្រាប់អតិថិជនរបស់យើងតាំងពីមុនពេលការប្រកាសរបស់ធនាគារជាតិនៃកម្ពុជា (NBC) ដើម្បីណែនាំឲ្យដាក់ចេញឲ្យរៀបចំរចនាសម្ព័ន្ធឡើងវិញម្ល៉េះ។ យើងកំពុងឆ្លើយតបទៅកាន់អតិថិជនទាំងអស់របស់យើងហើយយើងមិនរឹតត្បិតលើវិស័យណាមួយសម្រាប់ការរៀបចំស្តាររចនាសម្ព័ន្ធហិរញ្ញវត្ថុនោះទេ»។
លោក Lee Tae Kyung អគ្គនាយកធនាគារ ស៊ិនហាន ខេមបូឌា បានឲ្យភ្នំពេញប៉ុស្តិ៍ដឹងថា៖ «សំណើភាគច្រើនរបស់អតិថិជនគឺស្នើសុំពន្យារពេលសងប្រាក់ដើម ពីព្រោះជាទូទៅវាជាបន្ទុករបស់អតិថិជន។ អាជីវកម្មដែលរងផលប៉ះពាល់ភាគច្រើនគឺការជួលអចលនទ្រព្យ និងភោជនីយដ្ឋាន»។
កាលពីដើមខែមេសា ធនាគារជាតិនៃកម្ពុជាបានណែនាំស្ថាប័នធនាគារ និងហិរញ្ញវត្ថុឱ្យអនុវត្តការធ្វើសមាហរណកម្មរចនាសម្ព័ន្ធប្រាក់កម្ចីដើម្បីបន្ធូរបន្ថយបន្ទុកហិរញ្ញវត្ថុរបស់អតិថិជន ខណៈពេលដែលប្រាក់ចំណូលរបស់ពួកគេរងផលប៉ះពាល់ដោយសារតែការបិទអាជីវកម្ម ឬការធ្លាក់ចុះនៃប្រតិបត្តិការរបស់ពួកគេ។
ធនាគារ ស៊ិនហាន គ្រោងបើកសាខាចំនួន ៣ បន្ថែមទៀតនៅក្នុងឆ្នាំនេះ។
វិស័យសំខាន់ចំនួន ៤ ដែល NBC ផ្តោតសំខាន់គឺវិស័យទេសចរណ៍វិស័យកាត់ដេរសម្លៀកបំពាក់ វិស័យសំណង់ និងវិស័យដឹកជញ្ជូន។
ធនាគារ ស៊ិនហាន ខេមបូឌា គឺជាក្រុមហ៊ុនបុត្រសម្ព័ន្ធរបស់ធនាគារ ស៊ិនហាន ដែលជាធនាគារធំជាងគេបំផុតនៅក្នុងប្រទេសកូរ៉េខាងត្បូង។ បង្កើតឡើងក្នុងឆ្នាំ ២០០៧ នៅក្នុងរាជធានីភ្នំពេញ ហើយរហូតមកដល់ពេលនេះធនាគារ ស៊ិនហាន មានចំនួន ៩ សាខា ដោយគ្រោងបើក ៣ សាខាបន្ថែមទៀតនៅក្នុងឆ្នាំនេះ។
យោងតាមលោក Lee អ្នកទទួលកម្ចីពីធនាគារចំនួន ៤,៥ ភាគរយ ឬស្មើនឹងអតិថិជនចំនួន ១៨០ នាក់ប្រឈមនឹងការលំបាកផ្នែកហិរញ្ញវត្ថុគិតចាប់តាំងពីជំងឺកូវីដផ្ទុះឡើង ហើយកម្ចីប្រហែល ១៦ លានដុល្លារបានរងផលប៉ះពាល់។
លោកបន្ថែមថា៖ «យើងមានផលិតផលមួយដែលមានអត្រាការប្រាក់ខ្ពស់គឺកម្ចីរថយន្ត។ ដូច្នេះយើងបានលើកលែងមួយចំណែកនៃការបង់ការប្រាក់រយៈពេល ៦ ខែ មិនពន្យារពេលទេ ហើយបន្ទាប់ពីរយៈពេល ៦ ខែ យើងគិតអត្រាការប្រាក់ជាធម្មតា។ ប៉ុន្តែការបង់ប្រាក់ដើមគឺត្រូវបានពន្យារពេល»។
កម្ចីរបស់ធនាគារ ស៊ិនហាន បច្ចុប្បន្នមានចំនួន ៣៦៤ លានដុល្លារហើយកម្ចីទិញអចលនទ្រព្យស្មើនឹង ៤០ ភាគរយ ខណៈកម្ចីបុគ្គលមានចំនួន ៣០ ភាគរយហើយកម្ចីពាណិជ្ជកម្ម និងកម្ចីផ្សេងទៀតមានចំនួន ៣០ ភាគរយ។
លោក Lee មានទំនុកចិត្តថា កម្ចីដែលមិនបានសងត្រឡប់ (NPL) របស់ធនាគារនឹងមិនកើនឡើងនោះទេ ដោយសារតែការធ្វើសមាហរណកម្មរចនាសម្ព័ន្ធហិរញ្ញវត្ថុឆាប់រហ័សពីធនាគារ ដើម្បីជួយរក្សាស្ថិរភាពហិរញ្ញវត្ថុ។
«អតិថិជនរបស់យើងគឺរឹងមាំ។ ខ្ញុំគិតថា NPL នឹងមិនកើនឡើងច្រើនទេពីព្រោះយើងកំពុងជួយសម្រួលពួកគេដើម្បីរៀបចំរចនាសម្ព័ន្ធសងប្រាក់កម្ចីរបស់ពួកគេឡើងវិញ ដូច្នេះពួកគេអាចគេចផុតពីភាពលំបាករបស់ពួកគេក្នុងអំឡុងពេលនេះ»។
លោក Lee Tae Kyung អគ្គនាយកធនាគារ ស៊ិនហាន ខេមបូឌា។
លោកបន្ថែមថា៖ «តាមរយៈការពង្រឹងក្រុមការងារគ្រប់គ្រងហានិភ័យរបស់យើង និងការធ្វើពិពិធកម្មផលិតផលប្រាក់កម្ចី យើងអាចគ្រប់គ្រងអនុបាត NPL ដល់ ០,៦ ភាគរយដូចនៅខែឧសភា ឆ្នាំ ២០២០។ យើងគ្រប់គ្រង អនុបាត NPL បានល្អតាមរយៈការគ្រប់គ្រងដ៏រឹងមាំ យើងនឹងរក្សាដំណើរការគ្រប់គ្រងកម្ចីឲ្យមានស្ថិរភាពតាមរយៈការថែរក្សាដំណើរការគ្រប់គ្រងប្រាក់កម្ចីនិងការពង្រីកផ្នែកត្រួតពិនិត្យប្រាក់កម្ចី»។
លើសពីនេះទៀត ធនាគារ ស៊ិនហាន បានដាក់ចេញកញ្ចប់ហិរញ្ញវត្ថុមួយផ្សេងទៀត គឺ « Covid-19 Business Financial Recovery » ដើម្បីជួយម្ចាស់អាជីវកម្មដែលរងផលប៉ះពាល់ដោយវិបត្តិជំងឺកូវីដ តាមរយៈការផ្តល់អត្រាការប្រាក់អំណោយផល និងរយៈពេលអនុគ្រោះមួយឆ្នាំដើម្បីបន្ធូរបន្ថយការបង់រំលស់ និងមានរយៈពេលវែងរហូតដល់ ១០ ឆ្នាំ។
លោក Lee បានបន្ថែមទៀតថា៖ «ប្រាក់កម្ចី និងការរៀបចំរចនាសម្ព័ន្ធប្រាក់កម្ចីដែលប៉ះពាល់ដោយជំងឺកូវីដ ១៩ នឹងដើរតួនាទីយ៉ាងសំខាន់ ដើម្បីបន្ធូរបន្ថយការលំបាកក្នុងការសងប្រាក់របស់អតិថិជន សម្រាប់អ្នកដែលកំពុងរងផលប៉ះពាល់ក្នុងពេលវេលាដ៏លំបាកនេះ ដើម្បីឲ្យពួកគេមានឱកាសល្អក្នុងការរស់រាន និងងើបឡើងវិញនៅពេលខាងមុខ»។
ធនាគារ ស៊ិនហាន ផ្តល់ជូនកម្ចីខ្នាតតូចដូចជាកម្ចីមានវត្ថុបញ្ចាំ កម្ចីបុគ្គល កម្ចីរថយន្ត ប្រាក់កម្ចីឥតវត្ថុដាក់បញ្ចាំសម្រាប់បុគ្គលិក (ផ្អែកលើប្រាក់ខែ) ហើយយើងក៏គ្រោងនឹងណែនាំប្រាក់កម្ចីទីផ្សាររបស់យើង (កម្ចីដល់អាជីវករក្នុងផ្សារ ហើយយកតូបលក់ដូរជាវត្ថុធានា) នៅពេលខាងមុខ។
រាល់ប្រាក់កម្ចីទាំងអស់ដែលត្រូវបានផ្តល់ដល់អតិថិជន គឺមានលក្ខណៈអំណោយផល និងមានលក្ខណៈប្រកួតប្រជែងដើម្បីលើកកម្ពស់កម្រិតជីវភាពរស់នៅ និងការរីកចម្រើននៃអាជីវកម្មរបស់ពួកគេរៀងៗខ្លួន៕
