គណៈកម្មការមូលបត្រកម្ពុជា (SECC) កំពុងខិតខំប្រឹងប្រែងទាក់ទាញវិនិយោគិនបរទេសដែលមានប្រាក់ច្រើន ដើម្បីជំរុញទីផ្សារមូលបត្ររបស់កម្ពុជាដែលកំពុងត្រូវការការវិនិយោគ។
ចាប់តាំងពីត្រូវបានបង្កើតមក SECC បានខិតខំប្រឹងប្រែងយ៉ាងខ្លាំងក្នុងការបង្កើតបទប្បញ្ញត្តិចាំបាច់ផ្សេងៗដើម្បីកសាងទីផ្សារមូលបត្រឱ្យមានភាពរស់រវើក និងពង្រឹងទំនុកចិត្តក្នុងចំណោមវិនិយោគិនសក្តានុពល។
ឯកឧត្តម ស៊ូ សុជាតិ អគ្គនាយកគណៈកម្មការមូលបត្រកម្ពុជាបានឱ្យភ្នំពេញប៉ុស្តិ៍ដឹងថា៖ «យើងចង់ឱ្យវិនិយោគិនបរទេសចូលមកទីផ្សាររបស់យើងកាន់តែច្រើន យើងចង់បានវិនិយោគិននីតិបុគ្គលដែលមានសក្តានុពល។ ពេលនេះយើងមិនត្រឹមតែមានទីផ្សារភាគហ៊ុនប៉ុណ្ណោះទេ ប៉ុន្តែយើងក៏មានទីផ្សារសញ្ញាបណ្ណផងដែរ។ យើងនឹងបោះជំហានទៅមុខមួយជំហានម្តងៗ ដូច្នេះនៅក្នុងរយៈពេល ១០ ឆ្នាំខាងមុខ យើងអាចនិយាយបានថាយើងមានទីផ្សារមួយដ៏ទាក់ទាញ បើទោះបីជាវាមិនដល់កម្រិតទីផ្សារធំៗដូចជាទីផ្សារហុងកុង ឬសិង្ហបុរីក្តី»។
ក្នុងនាមជាអាជ្ញាធរគ្រប់គ្រង ត្រួតពិនិត្យ និងអភិវឌ្ឍទីផ្សារមូលបត្ររបស់ប្រទេស, SECC ដែលត្រូវបានបង្កើតឡើងក្នុងឆ្នាំ ២០០៩ បានដាក់ចេញបទប្បញ្ញត្តិចាំបាច់សំខាន់ៗជាច្រើនសម្រាប់ទីផ្សារមូលបត្រ និងកំណែទម្រង់ដើម្បីបង្កើនប្រសិទ្ធភាពទីផ្សារ លើកកម្ពស់ការយល់ដឹងលើការជួញដូរភាគហ៊ុន និងដើម្បីលើកកម្ពស់ទីផ្សារក្នុងស្រុកឱ្យមានស្តង់ដា អន្តរជាតិ ស្រដៀងនឹងសមាជិកអាស៊ានដទៃទៀតដែរ។
ទោះជាយ៉ាងណាការចាប់ផ្តើមហាក់នៅមានល្បឿនយឺត ហើយរហូតមកដល់ពេលនេះមានក្រុមហ៊ុនតែ ៥ ប៉ុណ្ណោះដែលបានចុះបញ្ជីលក់មូលបត្រកម្មសិទ្ធិ និងក្រុមហ៊ុន ៣ ចុះបញ្ជីលក់សញ្ញាបណ្ណនៅក្នុងផ្សារមូលបត្រកម្ពុជា (CSX) ប៉ុន្តែមានក្រុមហ៊ុនជាច្រើនទៀតនឹងចូលរួមនៅក្នុងឆ្នាំនេះ ជាពិសេសការចុះបញ្ជីលក់មូលបត្រកម្មសិទ្ធិជាសាធារណៈរបស់ធនាគារអេស៊ីលីដា ភីអិលស៊ីដែលគ្រោងធ្វើឡើងនៅក្នុងខែមេសាឆ្នាំនេះ។
អេស៊ីលីដា ជាធនាគារពាណិជ្ជដំបូងគេដែលចាប់ផ្តើមការចុះបញ្ជីនេះដើម្បីទទួលបានដើមទុនបន្ថែមតាមរយៈការប្រើប្រាស់ទីផ្សារមូលបត្រ។
«ចាប់តាំងពីឆ្នាំ ២០០៩ ដល់ ២០១១ យើងបានរៀបចំអ្វីៗគ្រប់យ៉ាងដូចជាហេដ្ឋារចនាសម្ព័ន្ធ បទប្បញ្ញត្តិ អន្តរការីមូលបត្រ (ក្រុមហ៊ុនមូលបត្រ) វិនិយោគិនសាធារណៈ ហើយយើងក៏ផ្តល់ផងដែរនូវការអនុញ្ញាតក្នុងការបង្កើត CSX ក្នុងឆ្នាំ ២០១១។
លោកបន្ថែមថា៖ «ក្នុងនាមជានិយតករ ការខិតខំបន្ថែមរបស់យើងបច្ចុប្បន្នគឺត្រូវចុះបញ្ជីក្រុមហ៊ុនល្អៗបន្ថែម និងនាំវិនិយោគិនសក្តានុពលមកកាន់ទីផ្សារ។ យើងត្រូវមានក្រុមហ៊ុនគ្រប់គ្រងមូលនិធិបន្ថែមទៀត ដើម្បីទាក់ទាញវិនិយោគិនខ្នាតតូច និងធំ។ ប្រភពទុនវិនិយោគធំពីខាងក្រៅត្រូវការ ក្រុមហ៊ុនគ្រប់គ្រងមូលនិធិដើម្បីផ្តល់សេវាដល់ពួកគេក្នុងការចូលមកកាន់ទីនេះ ជាពិសេសមូលនិធិវិនិយោគធំៗមិនសូវមកវិនិយោគដោយផ្ទាល់ជាមួយទីផ្សារតូច ដូចជាកម្ពុជាទេ»។
បច្ចុប្បន្នមានក្រុមហ៊ុនគ្រប់គ្រងមូលនិធិចំនួន ៦ កំពុងប្រតិបត្តិការនៅលើទីផ្សារ។
ឯកឧត្តម សុជាតិ និងក្រុមការងារ នៅ SECC កំពុងខិតខំកសាងទីផ្សារមូលបត្ររបស់កម្ពុជាដែលកំពុងស្ថិតនៅក្នុងដំណាក់កាលចាប់ផ្តើមនៅឡើយ ប៉ុន្តែទីផ្សារនេះមានសារៈសំខាន់សម្រាប់ជួយជំរុញសេដ្ឋកិច្ចដែលកំពុងរីកចម្រើន ខណៈទីផ្សារគឺជាឧបករណ៍វាស់ស្ទង់ដែលឆ្លុះបញ្ចាំងផ្នែកមួយនៃសុខភាពវិស័យហិរញ្ញវត្ថុរបស់ប្រទេស។ ទីផ្សារមូលបត្រដែលមានភាពរស់រវើកក៏បង្ហាញពីទំនុកចិត្តរបស់វិនិយោគិន (ទាំងក្នុងស្រុក និងបរទេស) នៅក្នុងប្រព័ន្ធអេកូហិរញ្ញវត្ថុរបស់ប្រទេសជាតិដែរ។
«ទីផ្សារមូលបត្រមានសារៈសំខាន់ខ្លាំងណាស់សម្រាប់ប្រទេសកម្ពុជា។ កាលពីពេលមុនយើងមានតែវិស័យធានារ៉ាប់រង និងធនាគារប៉ុណ្ណោះ។ ទីផ្សារមូលបត្រអាចគាំទ្រដល់ទីផ្សារផ្សេងទៀត និងជួយឱ្យវិស័យធនាគារកាន់តែមានភាពរឹងមាំ។ នៅពេលផ្សារមូលបត្រកាន់តែរីកចម្រើន មនុស្សកាន់តែច្រើននឹងប្រើប្រាស់ប្រព័ន្ធធនាគាររបស់យើង»។
«ទីផ្សារហិរញ្ញវត្ថុដែលមានការអភិវឌ្ឍខ្លាំងនឹងជួយដល់ការអភិវឌ្ឍសេដ្ឋកិច្ចរបស់យើង។ នៅពេលនរណាម្នាក់ចង់មើលសុខភាពហិរញ្ញវត្ថុរបស់ប្រទេសមួយ គេនឹងពិនិត្យមើលការវិវត្តនៃទីផ្សារមូលបត្រ»។
ឯកឧត្តម សុជាតិ បន្ថែមថា៖ «យើងកំពុងស្ថិតក្នុងដំណាក់កាលក្មេងខ្ចីនៅឡើយ យើងទើបតែមានក្រុមហ៊ុនចុះបញ្ជីចំនួន ៨ ប៉ុណ្ណោះហើយទីផ្សារនេះមិនសូវសកម្មនៅឡើយទេ ការជួញដូរក៏មិនសូវសកម្ម ហើយមិនសូវរលូនដូចប្រទេសដទៃទៀតដែលមានផ្សារមូលបត្រជាច្រើនឆ្នាំមុនកម្ពុជា។
វាអាចជាបញ្ហាប្រឈមក្នុងការបញ្ចុះបញ្ចូលវិនិយោគិន ប៉ុន្តែ SECC មានទំនុកចិត្តក្នុងការកសាងទីផ្សារមូលធនប្រកបដោយនិរន្តរភាព៕