The Phnom Penh Post Search

Search form




Logo of Phnom Penh Post newspaper Phnom Penh Post - បំណងប្រាថ្នា​លោក​បណ្ឌិត អ៊ិន ចាន់នី គឺ​ដើម្បី​ការរីកចម្រើន​ធនាគារ​អេស៊ីលីដា




បំណងប្រាថ្នា​លោក​បណ្ឌិត អ៊ិន ចាន់នី គឺ​ដើម្បី​ការរីកចម្រើន​ធនាគារ​អេស៊ីលីដា

Content image - Phnom Penh Post
លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ​ធនាគារ អេស៊ីលីដា​។

បំណងប្រាថ្នា​លោក​បណ្ឌិត អ៊ិន ចាន់នី គឺ​ដើម្បី​ការរីកចម្រើន​ធនាគារ​អេស៊ីលីដា

លោក​បណ្ឌិត អ៊ិន ចាន់នី ប្រធាន​នាយក​ប្រតិបត្តិ ធនាគារ អេស៊ីលីដា នៅតែមាន​ជំនឿ​យ៉ាង​មុតមាំ ទោះបី​ទីផ្សារ​ហិរញ្ញវត្ថុ​ហាក់​មាន​ភាពរង្គោះរង្គើ​នៅ​ក្រៅ​ប្រទេស​ក្តី​។ លោក​បណ្ឌិត ចាន់នី បាន​រំឭក​អំពី​ដំណើរ​ដ៏វែងឆ្ងាយ​របស់លោក​ជាមួយ​ធនាគារ អេស៊ីលីដា​ដែល​លោក​បាន​បង្កើតឡើង​កាលពី​ ២៧ ​ឆ្នាំមុន​។

កាលពី​ថ្ងៃ​អង្គារ​មុន​ភាគហ៊ុន​របស់​ធនាគារ​ត្រូវបាន​ដាក់សំណើ​ទិញ​លើស​ការកំណត់​ចំនួន​ ៣,២ ​ដង​ក្នុងពេល​បញ្ចប់​ដំណើរ​ការកំណត់ថ្លៃ​ភាគហ៊ុន (​ប៊ុកបៀលឌីង​) នៅមុន​ការបោះផ្សាយ​លក់​មូលបត្រ​កម្មសិទ្ធិ​ជា​សាធារណៈ​លើកដំបូង​របស់ខ្លួន​ (IPO) ដែល​ធ្វើ​ឲ្យ​មានការ​ភ្ញាក់ផ្អើល​ដល់​អ្នកសង្កេតការណ៍​ទីផ្សារ​ក្នុង​អំឡុងពេល​លក្ខខណ្ឌ​ទីផ្សារ​ហិរញ្ញវត្ថុ​សកល​មិនអាច​ទាយ​ទុក​មុន​បាន​។

នៅក្នុង​កិច្ចសម្ភាសន៍​ជាមួយ​កាសែត​ភ្នំពេញ​ប៉ុស្តិ៍​កាលពី​ថ្ងៃ​ពុធ​នៅ​ការិយាល័យ​របស់លោក​ជាន់​ទី​ ១៩ នៃ​ការិយាល័យ​កណ្តាល​ធនាគារ​អេស៊ីលីដា លោក​បណ្ឌិត ចាន់នី បានលើក​ឡើង​ប្រកប​ដោយ​ភាពជឿជាក់​អំពី​អនាគត​ធនាគារ និង​ការបោះ​ផ្សាយ​លក់​មូលបត្រ​កម្មសិទ្ធ​ជា​សាធារណៈ​លើកដំបូង​របស់ខ្លួន​ (IPO) ដែល​បាន​ធ្វើឱ្យ​មាន​ការចាប់អារម្មណ៍​ថ្មី​ទៀត​នៅក្នុង​ចំណោម​អ្នក​សង្កេតការណ៍​ក្នុង​វិស័យ​មួយ​នេះ​។

«​លទ្ធផល​គឺ​លើស​ ៣ ​ដង និង​ច្រើន​ជាង​ការព្យាករ​របស់​យើង សូម​អរគុណ​ចំពោះ​វិនិយោគិន​សក្តានុពល​ទាំងអស់​។ សូម្បីតែ​នៅក្នុង​អំឡុង​ពេលវេលា​ដ៏លំបាក​ជាមួយ​នឹង​វិបត្តិ​ជំងឺ​កូវីដ​ ១៩ [Covid-19] ពួកគេ​ក៏​នៅតែ​មាន​ទំនុកចិត្ត​ចូលមក​វិនិយោគ​។ ធនាគារ អេស៊ីលីដា គឺជា​ធនាគារ​ដែល​លោកអ្នក​ជឿទុកចិត្ត សូម្បី​តាំងតែ​ពីដំបូង​នៅពេល​ដែល​យើង​ចាប់ផ្តើម​ជា​អង្គការ​ក្រៅ​រដ្ឋាភិបាល ដើម្បី​អភិវឌ្ឍ​សហគ្រាស​ខ្នាតតូច និង​តូច​បំផុត យើង​បាន​ផ្សព្វផ្សាយ​របាយការណ៍​សវនកម្ម​របស់​យើង​ជា​រៀងរាល់​ឆ្នាំ​ដែល​ត្រូវបាន​ត្រួតពិនិត្យ​ដោយ​សវនករ​អន្តរជាតិ​។

លោក​បណ្ឌិត អ៊ិន ចាន់នី មាន ប្រសាសន៍​ថា​៖ «​ហើយ​នៅពេល​ដែល​យើង​ក្លាយជា​ធនាគារ​ឯកទេស​ក្នុង​ឆ្នាំ​ ២០០០ យើង​ក៏បាន​ផ្សព្វផ្សាយ​ព័ត៌មាន​ដល់​សាធារណជន យើង​បាន​ផ្សព្វផ្សាយ​របាយការណ៍​សវនកម្ម និង​របាយការណ៍​ប្រចាំឆ្នាំ​។ យើង​បាន​កសាង​ធនាគារ​នេះ​ឡើង​ដោយ​ឈរលើ​សសរស្តម្ភ​ចំនួន​ ៣ គឺ​តម្លាភាព គ្មាន​ការអត់ឱន​ចំពោះ​អំពើ​ពុករលួយ ហើយ​យើង​តែងតែ​ស្តាប់​អតិថិជន​របស់​យើង​ជានិច្ច​»​។

អ្នកសង្កេតការណ៍​បាន​លើកឡើង​ថា លោក​បណ្ឌិត​វ័យ​ ៦០ ​ឆ្នាំ​ដែល​មាន​ជំនាញ​ធនាគារ​រូបនេះ​មានការ​ប្តេជ្ញាចិត្ត​យ៉ាង​មុតមាំ​ក្នុង​ការចុះបញ្ជី​ធនាគារ​របស់លោក​នៅ​ផ្សារមូលបត្រ​កម្ពុជា (CSX) ដែល​ជា​ធនាគារពាណិជ្ជកម្ម​ដំបូង​គេ​ក្នុង​ការធ្វើ​ដូច្នេះ ទោះបី​ទីផ្សារ​ហិរញ្ញវត្ថុ​កំពុងស្ថិត​នៅក្នុង​ស្ថានភាព​មិន​ប្រាកដប្រជា​ក្តី​។

វិនិយោគិន​កម្ពុជា​ជាង​ ២ ​ពាន់​នាក់​បាន​ចូលរួម​ធ្វើ​ការកំណត់ថ្លៃ​ភាគហ៊ុន​ (​ប៊ុកបៀលឌីង​) និង​ដាក់សំណើ​ទិញ​ភាគហ៊ុន​លើសពី​ចំនួន​ ៤ ​លាន​ដែល​បាន​បម្រុង​ទុក​សម្រាប់​ដំណាក់​កំណត់​ថ្លៃ​ភាគហ៊ុន​ (​ប៊ុកបៀលឌីង​) ​នេះ​គឺ​បង្ហាញ​យ៉ាងច្បាស់​ពី​ចំណាប់អារម្មណ៍​របស់​វិនិយោគិន​ទៅលើ​ធនាគារ​អេស៊ីលីដា​។

«​ខ្ញុំ​មិន​រំពឹងថា​មាន​ចំនួន​ដ៏ច្រើន​បែប​នេះ​ទេ យើង​គ្រោង​ចូលរួម​ចំណែក​តែ​ ២ ​ភាគរយ​ប៉ុណ្ណោះ​នៃ​ភាគហ៊ុន​សរុប​ដែល​ស្មើនឹង ​៨ ៧៥១ ៣៩១ ភាគហ៊ុន​។ ការចុះបញ្ជី​ភាគហ៊ុន​របស់​ធនាគារ​អេស៊ីលីដា​មិន​ទទួល​ឥទ្ធិពល​ដោយ​ផ្ទាល់​ពី​ទីផ្សារ​មូលធន ឬ​ទទួល​ឥទ្ធិពល​ពី​ទីផ្សារ​ពិភពលោក​ទេ ហើយ​ធនាគារ អេស៊ីលីដា​ផ្តោត​សំខាន់​លើ​ទីផ្សារ​ក្នុងស្រុក​។

«​កាលពីមុន​នៅពេល​មាន​បញ្ហា​ជា​សកល កម្ពុជា​មាន​សុវត្ថិភាព​ខាង​សេដ្ឋកិច្ច​។ ខ្ញុំ​ជឿជាក់​ថា វិនិយោគិន​នឹង​បន្ត​វិនិយោគ​នៅ​កម្ពុជា ពីព្រោះ​នៅពេល​វិនិយោគិន​សម្លឹងមើល​ប្រទេស​កម្ពុជា​ពួកគេ​មិន​មើល​ប្រទេស​កម្ពុជា​ជា​ប្រទេសមួយ​ទេ ប៉ុន្តែ​គេ​សម្លឹងមើល​ជា​លក្ខណៈ​ប្រទេស​អាស៊ាន​ដែលមាន​ប្រជាជន​លើស​ ៦០០ ​លាន​នាក់​។ មនុស្ស​ជាច្រើន​ព្រួយបារម្ភ​រឿង​ការដក​ពន្ធ​អនុគ្រោះ​ (EBA) ប៉ុន្តែ​វា​មិនមាន​ផលប៉ះពាល់​ច្រើន​ទេ ហើយ​ផលប៉ះពាល់​រយៈពេល​ខ្លី​គឺ​វីរុស​ដែល​ប៉ះពាល់​ដល់​មនុស្ស​គ្រប់គ្នា មិន​ត្រឹមតែ​នៅ​ប្រទេស​កម្ពុជា​ប៉ុណ្ណោះ​ទេ​។

«​ប៉ុន្តែ​កម្ពុជា​អាច​រំពឹង​ថា​នឹង​ទទួល​បាន​អត្ថប្រយោជន៍​កាន់តែ​ច្រើន​ពី​កិច្ចព្រមព្រៀង​ពាណិជ្ជកម្ម​សេរី (FTA) ជាមួយ​ប្រទេស​ចិន​នេះ​គឺជា​គន្លឹះ​សំខាន់​ដែល​វា​នឹង​ជួយ​ជំរុញ​ឱ្យ​ការវិនិយោគ​ផ្ទាល់​ពី​បរទេស​កើនឡើង​»​។

លោក​បណ្ឌិត ចាន់នី បាន​ប្រែក្លាយ​ធនាគារ​អេស៊ីលីដា​ដែល​ធ្លាប់ជា​អង្គការ​ក្រៅ​រដ្ឋាភិបាល​ដែល​ផ្តោតលើ​មីក្រូហិរញ្ញវត្ថុ​ឲ្យ​ក្លាយ​ទៅ​ជា​ធនាគារ​លំដាប់​កំពូល​មួយ​នៅ​កម្ពុជា​ដែល​មាន​ចំណែក​ទីផ្សារ​ធំជាងគេ ទាំង​ឥណទាន ប្រាក់​បញ្ញើ​សន្សំ ដែល​មាន​ចំណែក​ទីផ្សារ​ជិត​ ៥០% ​។ នៅ​ដំណាច់​ខែកុម្ភៈ​ឆ្នាំ​ ២០២០ ធនាគារ អេស៊ីលីដា ភី អិលស៊ី មាន​អតិថិជន​ឥណទាន​ចំនួន​ ៤០៥ ៦២០ និង​ប្រាក់​បញ្ញើ​មាន​ចំនួន ២ ៣៦៦ ៦១១ គណនី​។

សហគ្រិន​ដ៏មាន​បទពិសោធ​រូបនេះ​ហាក់​មិន​ត្រូវបាន​រំខាន​ដោយ​សំឡេង​អវិជ្ជមាន​នានា​នៅក្នុង​ទីផ្សារ​ហិរញ្ញវត្ថុ​នោះទេ ហើយ​លោក​នៅតែ​ជឿជាក់ថា IPO ដែល​បានគ្រោង​នឹង​បោះផ្សាយ​នៅពេល​ខាងមុខ​នឹង​ក្លាយជា​រឿង​ដ៏ជោគជ័យ​ដែល​មិន​ធ្លាប់មាន​ពីមុន ហើយ​ធនាគារ​នឹង​ប្រមូល​ទុន​ទៅធ្វើ​ឱ្យ​ប្រសើរឡើង​នូវ​សេវាកម្ម​ធនាគារ​ឌីជីថល​របស់ខ្លួន​ដូចដែល​បានគ្រោង​ទុក​។

«IPO របស់​យើង​គឺ​សម្រាប់​ប្រជាជន​កម្ពុជា​។ ខ្ញុំ​សង្ឃឹមថា​នៅពេល​ធនាគារ អេស៊ីលីដា ចូលរួម​ក្នុង​ទីផ្សារ​មូលធន​នោះ​ទីផ្សារ​មូធន​នឹង​កាន់តែ​សកម្ម​ដូចជា​ទីផ្សារ​ហិរញ្ញវត្ថុ​ដែរ​។ យើង​មាន​អតិថិជន​ចំនួន​ ២,៥ ​លាន​នាក់​ដែល​ស្មើនឹង​ ៥០ ​ភាគរយ​នៃ​អតិថិជន​ធនាគារ​សរុប​នៅក្នុង​វិស័យនេះ​»​។

លោក​បណ្ឌិត​បានកត់សម្គាល់​ថា​៖ «​ជា​ផ្នែក​មួយ​នៃ​យុទ្ធសាស្ត្រ​របស់​យើង យើង​ប្រមូល​ដើមទុន ដើម្បី​ធ្វើឱ្យ​ប្រសើរឡើង​នូវ​ហេដ្ឋារចនាសម្ព័ន្ធ​ឌីជីថល​របស់​យើង​ដែល​រួមបញ្ចូល​ទាំង​មជ្ឈមណ្ឌល​ទិន្នន័យ ដែល​គ្របដណ្តប់​ទាំង​នៅលើ​ប្រទេស​​ កម្ពុជា ឡាវ និង​មីយ៉ាន់ម៉ា​។ យើង​កំពុង​បោះជំហាន​ទៅមុខ​ក្នុង​បណ្តា​ប្រទេស​ដទៃទៀត​ក្នុង​តំបន់​អាស៊ាន​ដោយ​មិនចាំបាច់​មាន​ការិយាល័យ​នៅ​ទីនោះ​»​។

ការបោះ​ផ្សាយ​លក់​មូលបត្រ​កម្មសិទ្ធ​ជា​សាធារណៈ (IPO) ដែល​ជោគជ័យ អាច​ជា​គំរូ​មួយ​នៃ​អាជីព​ធនាគារ​ដ៏អស្ចារ្យ​របស់លោក​។

យោងតាម​គេហទំព័រ​របស់​ធនាគារ​បាន​ឲ្យ​ដឹងថា​គិត​ត្រឹម​ខែកញ្ញា​ឆ្នាំមុន ធនាគារ អេស៊ីលីដា គឺជា​ធនាគារ​ក្នុង​ស្រុក​ធំជាងគេ​ផ្អែកលើ​ប្រាក់កម្ចី​សរុប​មាន​ចំនួន​ ៣,៦១ ​ពាន់​លាន​ដុល្លារ និង​ដើមទុន​សរុប​ ៨៩៨,៥៦ ​លាន​ដុល្លារ និង​ធំ​បំផុត​លំដាប់​ទី​ ២ ​ទាក់ទង​នឹង​ទ្រព្យសកម្ម​សរុប​មាន​ចំនួន​ ៦ ​ពាន់​លាន​ដុល្លារ និង​ប្រាក់​បញ្ញើ​សរុប​ចំនួន​ ៤,២៤ ​ពាន់​លាន​ដុល្លារ​៕

អត្ថបទគួរចាប់អារម្មណ៍

  • ស្ដង់ដា​គណនេយ្យ ជា​ធាតុ​ផ្សំ​ដ៏សំខាន់​មួយ​ក្នុង​ក្របខ័ណ្ឌ​គណនេយ្យ និង​ការរាយការណ៍​ហិរញ្ញវត្ថុ ព្រមទាំង​ជួយ​សម្រួល​ដល់​ក្រុមហ៊ុន​/​សហគ្រាស និង​ថ្នាក់ដឹកនាំ​របស់​ក្រុមហ៊ុន ដើម្បី​កំណត់​ឱ្យ​បាន​ច្បាស់លាស់​ពី​ស្តង់ដា​ដែល​ក្រុមហ៊ុន​បាន​ប្រើប្រាស់​សម្រាប់​ការរៀបចំ​របាយការណ៍​ហិរញ្ញវត្ថុ​។

  • ភ្នំពេញ: អស់​រយៈពេល​ជិត​ ១១ ​ខែ បន្ទាប់ពី​ការដាក់​លក់​ដំណាក់កាល​ទី​ ១ ​ប្រកប​ដោយ​ជោគជ័យ​កាលពី​ខែធ្នូ​ឆ្នាំមុន Forest Harmony ជា​ក្រុមហ៊ុន​វិនិយោគ​រួម​រវាង​វិនិយោគិន​ក្នុង​ស្រុក និង​វិនិយោគិន​ជនជាតិ​បារាំង​កាលពី​ថ្ងៃ​សៅរ៍ បាន​ប្រកាស​បើក​ដំណើរការ​គម្រោង​អភិវឌ្ឍន៍​ដំណាក់កាល​ទី​ ២ ​របស់ខ្លួន​មាន​ឈ្មោះ​ថា Golf Harmony រួមមាន ទីលាន​វាយ​កូនហ្គោល និង​គម្រោង​អគារ​ខុនដូ​។

  • ភ្នំពេញ៖ បន្ទាប់​ពី​​​ការ​​ប្រឡង​​ប្រណាំង​​​ថត​វីដេអូ ​​ដើម្បី​ផ្សព្វផ្សាយ​​ពី​សក្តានុពល​នៃ​តំបន់​សហគមន៍​​​​ទេសចរណ៍ និង​​​​​អេកូ​ទេសចរណ៍​ ​បាន​រៀបចំ​​ ២ រដូវកាល​មក​​ហើយ​​ ខណៈ​​ការ​ប្រឡង​ប្រណាំង​រដូវកាល​ទី​៣ ​​​ឆ្នាំ ​២០២០​ ក៏​បាន​មក​​ដល់​​​។

  • ភ្នំពេញៈ រដ្ឋមន្ត្រីក្រសួង​អប់រំ​យុវជន និង​កីឡា​លោក​ ហង់ជួន ណារ៉ុន បានអនុញ្ញាត​ជា​​គោលការណ៍​ឱ្យ​គ្រឹះស្ថានសិក្សា​ឯកជន​ទាំងអស់​អាច​ដំណើរការឡើង​វិញ​នូវ​សេវា​រថយន្ត​ដឹក​សិស្ស សេវា​បណ្ណាល័យ សកម្មភាព​អប់រំ​កាយ និង​កីឡា និង​សេវា​អាហារដ្ឋាន ប៉ុន្តែ​ត្រូវអនុវត្ត​នូវ​គោលការណ៍​ប្រតិបត្តិ​ស្តងដា​ (SOP) ​ឱ្យ​ម៉ឺងម៉ាត់​។

  • តាកែវៈ មន្ត្រី​ការពារ​ទេសភាព​បឹង​ព្រែកល្ពៅ​ឱ្យ​ដឹងថា សម្បុក​សត្វ​ចង្កៀលខ្យង​ជាង​ ២ ០០០ ​សម្បុក​ បានបង្ហាញ​វត្តមាន​ជា​លើកដំបូង​ក្នុង​រយៈពេល​ជាង​ ១៥ ​ឆ្នាំ​ ដែល​នេះ​ជា​កំណត់ត្រា​ថ្មី​ដែល​ពុំ​ធ្លាប់មាន​នៅក្នុង​តំបន់​ការពារ​ទេសភាព​បឹង​ព្រែកល្ពៅ​ ស្ថិត​ក្នុងស្រុក​បុរីជលសា និង​ស្រុក​កោះអណ្តែត ខេត្តតាកែវ​។

  • ស្ទឹងត្រែង/ភ្នំពេញៈ គ្រឿងញៀន​ប្រភេទ​មេតំហ្វេតាមីន​ (ice) ​ចំនួន​ ៤១ ​គីឡូក្រាម​ត្រូវ​បាន​មន្ត្រី​អាវុធហត្ថ​ខេត្ត​ស្ទឹងត្រែង​បញ្ជូន​ទៅ​សាលាដំបូង​ខេត្ត​នាថ្ងៃទី​ ២៤ តុលា បន្ទាប់ពី​បង្ក្រាប​នៅ​ស្រុក​បុរី​ឣូរស្វាយសែនជ័យ​ពី​ថ្ងៃ​ទី​ ២៣ តុលា ខណៈ​ម្ចាស់​កំពុង​រត់គេច​ខ្លួន​។