វិទ្យាស្ថានធនាគារ និងហិរញ្ញវត្ថុ (IBF) កាលពីថ្ងៃពុធបានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយសាកលវិទ្យាល័យអន្តរជាតិ ផារ៉ាហ្គនដើម្បីលើកកម្ពស់កិច្ចសហការផ្សារភ្ជាប់គម្លាតជំនាញរវាងកម្មវិធីសិក្សារបស់ស្ថាប័នអប់រំ និងតម្រូវការនៃឧស្សាហកម្មធនាគារ។
ពិធីចុះហត្ថលេខានេះត្រូវបានធ្វើឡើងក្រោមអធិបតីភាព ឯកឧត្តមបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំយុវជន និងកីឡា និងទទួលបានការអញ្ជើញផ្តល់កិត្តិយសដោយលោកជំទាវ ជា សិរី ឧបការីទេសាភិបាល និងជាអគ្គនាយកបច្ចេកទេសធនាគារជាតិនៃកម្ពុជា។
ក្នុងនោះមានការចូលរួមពីក្រុមប្រឹក្សាភិបាល និងគណៈគ្រប់គ្រងជាន់ខ្ពស់នៃវិទ្យាស្ថានធនាគារ និងហិរញ្ញវត្ថុ (IBF) និងសាកលវិទ្យាល័យអន្តរជាតិ ផារ៉ាហ្គន ព្រមទាំងមន្ត្រីជាន់ខ្ពស់នៃសមាគមធនាគារនៅកម្ពុជា (ABC) និងសមាគមមីក្រូហិរញ្ញវត្ថុកម្ពុជា (CMA)។
តាមរយៈ MoU នេះ វិទ្យាស្ថាន IBF និងសាកលវិទ្យាល័យ ផារ៉ាហ្គននឹងសហការគ្នាក្នុងការផ្តួចផ្តើមគំនិតផ្សេងៗដើម្បីផ្សារភ្ជាប់គម្លាតរវាងតម្រូវការជំនាញដែលកំពុងវិវឌ្ឍន៍យ៉ាងឆាប់រហ័សនៃវិស័យឧស្សាហកម្មធនាគារ និងអ្នកដែលបណ្តុះបណ្តាលដោយប្រព័ន្ធអប់រំឧត្តមសិក្សា។
ឯកឧត្តមបណ្ឌិត ហង់ជួន ណារ៉ុន រដ្ឋមន្ត្រីក្រសួងអប់រំបានមានប្រសាសន៍ថា៖ «កម្មវិធីអប់រំឧត្តមសិក្សានៅកម្ពុជាបានពង្រីកយ៉ាងឆាប់រហ័សដើម្បីឆ្លើយតបទៅនឹងតម្រូវការនៃកំណើននៅក្នុងវិស័យផ្សេងៗ ប៉ុន្តែកំណើននេះមិនមានភាពស៊ីចង្វាក់គ្នាជាមួយនឹងតម្រូវការនៃវិស័យឧស្សាហកម្មនោះទេ ដោយសារតែមិនមានកិច្ចសហការរវាងអង្គភាពទាំង ២»។
«ខ្ញុំសូមអបអរសាទរគំនិតផ្តួចផ្តើមនេះ ដែលដឹកនាំដោយ IBF និងមានការគាំទ្រពីសំណាក់ ABC និង CMA ក៏ដូចជាកិច្ចសហប្រតិបត្តិការជាវិជ្ជមានរបស់ Paragon.U ដើម្បីចូលរួមក្នុងការសហការគ្នាជាផ្លូវការនេះ។ ខ្ញុំទន្ទឹងរង់ចាំមើលការខិតខំប្រឹងប្រែងរួមគ្នាជាច្រើនទៀតរួមទាំងសាកលវិទ្យាល័យសាធារណៈក្នុងស្រុករបស់យើង»។
លោក ជា កញ្ញរិទ្ធិ អ្នកគ្រប់គ្រងទូទៅនៃវិទ្យាស្ថានធនាគារ និងហិរញ្ញវត្ថុបានមានប្រសាសន៍ថា៖ « គោលបំណងនៃ MoU នេះគឺដើម្បីផ្សារភ្ជាប់គម្លាត ទាក់ទងនឹងសមត្ថភាពរវាងតម្រូវការឧស្សាហកម្មនេះ និងកម្មវិធីរបស់ស្ថាប័នអប់រំ ដើម្បីធ្វើឱ្យប្រាកដថា ស្ថាប័នអប់រំ បណ្តុះបណ្តាលបាននិស្សិតស្របតាមតម្រូវការរបស់ឧស្សាហកម្មធនាគារ»។
លោកជំទាវ ជា សិរី មានប្រសាសន៍ថា៖ «នៅក្នុងការកែលម្អការអប់រំ មនុស្សគ្រប់គ្នាគួរតែដើរតួសំខាន់មួយ ជាពិសេសក្នុងវិស័យឧស្សាហកម្ម។ ធនាគារជាតិនៃកម្ពុជាបានធ្វើការជាមួយឧស្សាហកម្មដើម្បីផ្តួចផ្តើមវិទ្យាស្ថាន IBF និងរីករាយដែលបានឃើញឥទ្ធិពលវិជ្ជមានរបស់ IBF ទៅលើប្រព័ន្ធរួមនៃការកសាងសមត្ថភាពខាងធនាគារនៃនិស្សិតបញ្ចប់ការសិក្សាទៅជាអ្នកជំនាញធនាគាររួមគ្នាឆ្ពោះទៅរកសេដ្ឋកិច្ចផ្អែកលើចំណេះដឹង និងបម្រើគោលដំណងឆ្ពោះទៅរកការអភិវឌ្ឍសេដ្ឋកិច្ចរបស់ប្រទេស និងការរីកចម្រើនប្រកបដោយចីរភាព»។
លោកបណ្ឌិត អ៊ិន ចាន់នី ប្រធានសមាគមធនាគារនៅកម្ពុជា មានប្រសាសន៍ថា៖ «អនុស្សរណៈយោគយល់គ្នានៅថ្ងៃនេះគឺជានិមិត្តសញ្ញានៃព្រឹត្តិការណ៍ដ៏សំខាន់មួយដែលយើងអាចទន្ទឹងរង់ចាំនូវការខិតខំប្រឹងប្រែងបន្ថែម និងបន្តទៅមុខទៀតឥតឈប់ឈរ សម្រាប់គ្រឹះស្ថានឧត្តមសិក្សា ដើម្បីរៀបចំ និងកែលម្អកម្មវិធីសិក្សាឡើងវិញ ជាពិសេសទាក់ទងនឹងតម្រូវការវិស័យធនាគារ និងធម្មជាតិដែលមានភាពប្រែប្រួលនៃពិភពធុរកិច្ចជំនួញ»។
ឯកឧត្តម អ៊ាង សុផល្លែត ប្រធានកិត្តិយសនៃសាកលវិទ្យាល័យអន្តរជាតិ បារ៉ាហ្គន មានប្រសាសន៍ថា៖ «ពិធីចុះហត្ថលេខាលើអនុស្សរណៈនៃការយោគយល់គ្នានេះ រវាងសាកលវិទ្យាល័យអន្តរជាតិ ផារ៉ាហ្គន និងវិទ្យាស្ថានធនាគារ និងហិរញ្ញវត្ថុគឺជាសក្ខីភាពដ៏ល្អមួយនៃការប្តេជ្ញាចិត្តរបស់សាកលវិទ្យាល័យអន្តរជាតិ ផារ៉ាហ្គន ក្នុងការកសាងភាពជាដៃគូរវាងសាកលវិទ្យាល័យ និងវិស័យឧស្សាហកម្ម»។
អនុស្សរណៈនៃការយោគយល់នេះផ្តល់ជូននិស្សិត និងសមាជិកមហាវិទ្យាល័យនៃសាកលវិទ្យាល័យនូវឱកាសដើម្បីអភិវឌ្ឍ បង្កើនជំនាញ ចំណេះដឹង និងបណ្តាញរបស់ពួកគេនៅក្នុងវិស័យធនាគារ និងហិរញ្ញវត្ថុ៕