ក្រុងទ្រីប៉ូលី៖ កងកម្លាំងគាំទ្ររដ្ឋាភិបាលបង្រួបបង្រួមលីប៊ី បានថ្លែងកាលពីថ្ងៃពុធថា ពួកគេបានដណ្តើមយកបានព្រលានយន្តហោះអន្តរជាតិ ក្រុងទ្រីប៉ូលីមកកាន់កាប់វិញ ដែលវាត្រូវបានគ្រប់គ្រងចាប់តាំងពីឆ្នាំ ២០១៩ ដោយកងកម្លាំងគាំទ្រលោក ហ្គាលីហ្វា ហាហ្វតារ នៅក្នុងការវាយប្រហារបន្តបន្ទាប់ចុងក្រោយបំផុតសម្រាប់យោធាមានមូលដ្ឋាននៅភាគខាងកើត។
លោក ម៉ូហាម៉េដ នូនូ ជាអ្នកនាំពាក្យកងកម្លាំងគាំទ្ររដ្ឋាភិបាលបង្រួបបង្រួមជាតិ (GNA) បានថ្លែងថា៖ «កងកម្លាំងរបស់យើងបានរំដោះព្រលានយន្តហោះអន្តរជាតិទ្រីប៉ូលីមកវិញទាំងស្រុង»។
ព្រលានយន្តហោះស៊ីវិលដ៏សំខាន់នៅលីប៊ី ដោយមានទីតាំងស្ថិតនៅរដ្ឋធានីភាគខាងត្បូង នៅតាមផ្លូវហាយវ៉េសំខាន់មួយទៅកាន់កណ្តាលរដ្ឋធានីទ្រីប៉ូលីរបស់ខ្លួនត្រូវបានបិទចាប់តាំងពីព្រលាននេះ បានរងការខូចខាតយ៉ាងធ្ងន់ធ្ងរ នៅក្នុងការប៉ះទង្គិចគ្នាកាលពីឆ្នាំ ២០១៤ កន្លងទៅ។
កងកម្លាំងគាំទ្រលោក ហ្គាលីហ្វា ហាហ្វតារ បានបើកការវាយប្រហារមួយទៅលើរដ្ឋធានីទ្រីប៉ូលីកាលពីខែមេសា ឆ្នាំ ២០១៩ ដោយដណ្តើមកាន់កាប់ព្រលានយន្តហោះនោះនៅក្នុងសប្តាហ៍បន្ទាប់។
ប៉ុន្តែការវាយប្រហារថ្មើរជើងបានបង្កឲ្យមានការបង្ហូរឈាមនៅក្នុងទីក្រុងទ្រីប៉ូលីរយៈពេលប៉ុន្មានសប្តាហ៍ថ្មីៗនេះ កងកម្លាំងគាំទ្ររដ្ឋាភិបាលបង្រួបបង្រួមជាតិបានដណ្តើមយកទីតាំងសំខាន់ៗជាបន្តបន្ទាប់មកកាន់កាប់វិញ។
លោក ម៉ូហាម៉េដ នូនូ បានថ្លែងថា អស់រយៈពេលជាង ២ សប្តាហ៍ ហើយកងកម្លាំងគាំទ្ររដ្ឋាភិបាលបង្រួបបង្រួមជាតិ GNA បានបើកការវាយប្រហារថ្មើរជើង និងផ្លូវអាកាសទ្រង់ទ្រាយធំជាច្រើនលើក ដោយបានធ្វើការឡោមព័ទ្ធតំបន់ព្រលានយន្តហោះអន្តរជាតិទ្រីប៉ូលី នៅមុនពេលការវាយប្រហារចុងក្រោយ ហើយដណ្តើមយកបានវាមកគ្រប់គ្រងទាំងស្រុងវិញ។
លោក នូនូ បានថ្លែងថា កងកម្លាំងគាំទ្ររដ្ឋាភិបាលបង្រួបបង្រួមបច្ចុប្បន្ន «កំពុងតាមចាប់ខ្លួនយុទ្ធជនរបស់លោក ហ្គាលីហ្វា ហាហ្វតារ ដែលរត់គេចខ្លួនទៅទិសខាងត្បូង ទៅកាន់ទីក្រុងហ្គាស់ប៊ិន ហ្គាស្ស៊ី» ចម្ងាយប្រហែល ២០ គីឡូម៉ែត្រពីរដ្ឋធានីទ្រីប៉ូលីខាងត្បូង។
ទូរទស្សន៍គាំទ្ររដ្ឋាភិបាលបង្រួបបង្រួម និងប្រព័ន្ធផ្សព្វផ្សាយសង្គមបានចែករំលែកវីដេអូជាច្រើន បានបង្ហាញកងកម្លាំងស្មោះត្រង់រដ្ឋាភិបាល បានចូលកាន់កាប់ព្រលានយន្តហោះក្រុងទ្រីប៉ូលី។
កងកម្លាំងរបស់លោក ហ្គាលីហ្វា ហាហ្វតារ មិនបានធ្វើអត្ថាធិប្បាយភ្លាមៗអំពីឧបសគ្គនោះទេ ប៉ុន្តែការបាត់បង់ព្រលានយន្តហោះបានធ្វើឲ្យកងកម្លាំងរបស់លោក ហាហ្វតារ បើកការវាយប្រហារជាបន្តបន្ទាប់ប៉ុន្មានសប្តាហ៍ថ្មីៗនេះ។
មេបញ្ជាការយោធា ដែលបានគាំទ្ររដ្ឋការគូបដិបក្ខមួយ នៅប្រទេសលីប៊ីភាគខាងកើត ហើយគ្រប់គ្រងទឹកដីភាគច្រើននៅប្រទេសលីប៊ីភាគខាងត្បូង កាលពីខែមុននេះ បានបាត់បង់មូលដ្ឋានទ័ពអាកាសអាល់វ៉ាទីយ៉ា៕ AFP/SK